2 Samuel 9 - ICIGHAN BIBILO

¹ Tsô Davidi kaa er: Ma or shi shi hen ya u Saulu sha u me er a nan dedoo sha ci u Yonatan je kpa?

² Wanye ugen lu hen ya u Saulu iti na er Shiba; i yila un a va hen Davidi, tor pine un er: Ka we Shiba nee? A kaa er: Ka mo wanye wou je ne.

³ Tor pine er: Ma or shi shi hen ya u Saulu u me er a nan dedoo sha erdoo u Aôndo gaa? Shiba kaa a tor er: Wan u Yonatan shi, kpa a sombo angahar.

⁴ Tor pine un er: Ngu hana? Shiba gema kaa a tor er: Ngu ken ya u Makir wan u Amiel ken Lodebar.

⁵ Tsô tor Davidi tindi i za tôô un hen ya u Makir wan u Amiel ken Lodebar.

⁶ Nahan Mefibosheti, wan u Yonatan, wan u Saulu, va hen Davidi, va gure kuma ishigh inya civir un. Davidi kaa a na er: Mefibosheti. A rumun er: Mo wanakiriki wou ne!

⁷ Davidi kaa a na er: De cie ga, gadia mimi je me er a we dedoo sha ci u teru Yonatan; me hide u a tar u teru, Saulu, cii; ú ya kwagh sha tebul wam gbem.

⁸ Tsô a gure a civir, a kaa er: Wanakiriki wou ngu di nyi, u kenger un, mo u m lu iwa i kpen nee?

⁹ Nahan tor yila Shiba, wanakiriki u Saulu la, kaa a na er: Kwagh u ngise lu u Saulu cii kua ya na cii kpaa, m na wan u orvesen wou ne.

¹⁰ Kahan un sule, we a ônov ou kua mbashilen we; vaan a iyiav kpaa sha u wan u orvesen wou a̱ zuan a kwaghyan yô; Mefibosheti wan u orvesen wou yô, una yaan kwagh sha tebul wam gbem. Yô, Shiba lu a ônov mba nomso pue kar utaan man mba shilen un ikundu.

¹¹ Tsô Shiba kaa a tor er: Kwagh u terem tor a kaa wanakiriki na yô, kape wanakiriki wou una er je la. Nahan Mefibosheti gema yaan kwagh sha tebul u Davidi, er ka ma wan u tor nahan.

¹² Mefibosheti lu a wan u nomso u kiriki iti na er Mika. Mba ve lu hen ya u Shiba cii yô, ve lu mba shilen Mefibosheti.

¹³ Nahan Mefibosheti tema ken Yerusalem; gadia yaan kwagh sha tebul u tor gbem. Un lu or u sombon angahar cii.