2 Samuel 5 - ICIGHAN BIBILO

¹ Tsô ikwe i Iserael cii va hen Davidi hen Heberon, ve va ôr kwagh, ve kaa er: Nenge, se mba ikuhe you, kua inyam you kpaa.

² Sha ayange a tsuaa a Saulu lu tor sha a vese la, lu we je u hemen Iserael, u duen a ve shi u nyôron a ve kpaa ye; man TER kaa a we er: Ka we ú kura ior Av Iserael, shi ka we ú lu orhemen u Iserael kpaa ye.

³ Nahan mbatamen mba Iserael cii va hen tor hen Heberon; tor Davidi ya ikur a ve hen Heberon sha ishigh ki TER; nahan ve shighe Davidi mkurem, ve ver un tor sha Iserael.

⁴ Ka zum u Davidi lu anyom ikundugber la, a ya tor ye; a tema tor anyom akunduahar.

⁵ Ken Heberon yô, a lu tor sha Yuda anyom ataankarahar man iwer ataratar; ken Yerusalem yô, a tema tor sha Iserael cii kua Yuda, anyom ikundugber kar atar.

⁶ Tsô tor a ior nav, ve za ken Yerusalem sha u za nôngon ityav a Mbayebushi, mba ve tema ken tar la. Ve kaa a Davidi er: Ú nyôr heen ga, mbaapirashe kua mbasombon tseegh kpaa, vea zenda u; ve lu henen er: Davidi una fatyô u nyôron ker ga.

⁷ Nahan kpaa, Davidi za hemba garutya u Shion, ka gar u Davidi je la.

⁸ Sha iyange la je Davidi kaa er: Hanma or u i sar nan pe hemban Mbayebushi yô, nana̱ kôndo sha akpamnger, nana̱ wua mbaapirashe kua mbasombon mba ve doo Davidi ishima ga la. Ka nahan man i kaa er: Mbaapirashe man mbasombon ve̱ de nyer ken iyou ga ye.

⁹ Davidi za tema ken garutya la, a ii un iti er: Gar u Davidi. Davidi shi maa gar la ningir tser, hii hen Milo zan zan nyôr kimi.

¹⁰ Nahan Davidi yem hemen hemen, gadia TER, Aôndo u akum a Sha, lu a na.

¹¹ Tsô Hiram tor u Tiru tindi mbatyomov hen Davidi a ikon i sedar man mbagbanikon kua mbamaankwagh er ve̱ va maa Davidi iyou.

¹² Nahan Davidi kav er TER A ver un tor sha Iserael man shi A kende tor na sha kpishi sha ci u ior Nav Iserael yô.

¹³ Davidi shi seer eren kasev mba sha uika kua kasev mbagenev ken Yerusalem zum u a mough hen Heberon kera la; shi a mar ônov mba nomso kua mba kasev.

¹⁴ Ati a mba a mar ve ken Yerusalem la yô, ka Shamua man Shobabi man Natan man Solomon

¹⁵ man Ibehar man Elishua man Nefegi man Yafia

¹⁶ man Elishama man Eliada kua Elifeleti.

¹⁷ Zum u Mbafiliti ungwa er ve shighe Davidi mkurem ve kôr un tor sha Iserael yô, Mbafiliti cii kôndo sha u va keren Davidi; tsô Davidi ongo nahan yô, a sen hen garutya.

¹⁸ Yô, Mbafiliti va va samber shin pev u Refaim.

¹⁹ Tsô Davidi pine TER, kaa er: M̱ kôndo m̱ za nôngo ityav a Mbafiliti? Ú na ve sha ikev yam shinii? TER kaa a Davidi er: Kôndo; gadia Me na Mbafiliti sha ikev you kpee je.

²⁰ Nahan Davidi va hen Baal-perashim; tsô Davidi hemba ve heregh; a kaa er: TER ande nyôr ken mbaihomov av sha ishigh yagh er ka m-ande u mnger yô. Ka nahan man a ii ijiir la iti er, Baal-perashim ye.

²¹ Ve undu akombo ve her; Davidi kua ior nav ve kura a.

²² Tsô Mbafiliti shi kôndo, ve samber shin pev u Refaim.

²³ Zum u Davidi pine TER yô, A kaa er: De kende ga, wa nev ken ijime ve, tsô ú za ta num sha a ve hen atine a balsem.

²⁴ Tsô zum u ú ungwa acin sha ityouv mbi ikon i balsem yô, mough fefa, gadia TER kar hemen we sha u za hemban akumautya a Mbafiliti ve.

²⁵ Davidi er er TER kaa un nahan; a hemba Mbafiliti, hii hen Geba zan zan za ar hen Geser.