2 Samuel 4 - ICIGHAN BIBILO

¹ Zum u wan u Saulu ungwa er Abiner kpe ken Heberon yô, iyol kpe un; Mbaiserael cii kpaa, kondo ve iyol.

² Wan u Saulu lu a iorov uhar, ve hemen akumautya, iti i u môm er Baana, iti i ugen la er Rekabi, ve lu ônov mba Rimon, Orbeeroti, ken ônov mba Benyamin (gadia i wa Beeroti ken Benyamin je.

³ Mbabeeroti yevese yem hen Gitaim ve lu shir ker zan zan nyian).

⁴ Kpa Yonatan wan u Saulu, lu a wan u sombon angahar. Anyom a na lu ataan zum u loho u Saulu man Yonatan va nyôr ken Yesereel la; yô, yese na tôô un nyôngoso a na; er lu nyôngoso zan fele fe fele la, a osough, a gba a sombo. Iti na er Mefibosheti.

⁵ Tsô ônov mba Rimon, Orbeeroti la, Rekabi kua Baana, ve za hen ya u Ishibosheti, oo gera gera, shighe u a lu memen iyange sha tembe la.

⁶ Ve va her a na ken atô ya je, er vea za tôô alakema yô; ve gema ve kuma un kwagh sha uya; tsô Rekabi kua anngô na Baana, ve yevese ve war.

⁷ Er ve nyôr ken ya la, un gema lu yaven sha gambe na ken iyou, nahan ve ta num sha a na ve wua, ve gber un ityough, ve yem a ityough nagh, ve kar sha gbenda u Araba, ve tsa yemen kaka.

⁸ Ve va a ityough ki Ishibosheti hen Davidi hen Heberon, ve kaa a tor er: Nenge ityough ki Ishibosheti wan u Saulu, orihom wou u lu keren we a ku la; nahan nyian yô, TER or iyev i terem tor sha Saulu kua tsombor na.

⁹ Tsô Davidi gema kaa a Rekabi kua a anngô na Baana ônov mba Rimon, Orbeeroti, er: Er TER A lu u uma ne, u A yima uma wam ken hanma ican cii yô,

¹⁰ iyange orgen va kaam er: Nenge, Saulu kpe, lu henen er un va kaam loho u dedoo je ve, nahan m kôr un m wua un ken Shikelagi, ka injar i m na un sha loho na la,

¹¹ man hile hegen u mbaaferev ve za woo ormimi ken ya na sha gambe na je, ve me kera or iyev i awambe na sha a ven me tim ne sha won kera ga yee?

¹² Tsô Davidi kaa mbayev nav; nahan ve wua ve, ve tôndo ve ave man angahar, ve hambe ve hen kpe u ber ken Heberon; kpa ve ngohol ityough ki Ishibosheti ve za ii shin uwar u Abiner ken Heberon.