2 Samuel 24 - ICIGHAN BIBILO

¹ Tsô ishima shi vihi TER a Iserael, nahan A tor Davidi ityô sha u a̱ er ve kwagh u vihin yô. A kaa er: Za, za ôr iyenge i Iserael man i Yuda.

² Tsô tor kaa a Yoabi orhemen u ikumutya, u a lu vea na la, er: Za hegen, zende nyôr ken ikwe i Iserael cii, hii hen Dan zan zan za ar hen Bersheba, ôr iyenge i ior er me fa iyenge i ior cii yô.

³ Nahan Yoabi kaa a tor er: TER, Aôndo wou, A̱ seer iyenge i ior kwa deri, ashe a terem tor kpaa a̱ nenge a mi, kpa inja na nan man kwagh ne a gbe terem tor ishima yum nahana?

⁴ Nahan kpaa imo i tor hemba i Yoabi kua mbahemenev mba akumautya; tsô Yoabi kua mbahemenev mba akumautya due sha ishigh ki tor, sha u za ôron iyenge i ior i Iserael.

⁵ Ve per Yordan ve haa hen Aroer, u a lu ken uwegh ku yanegh ku gar u a lu hen atô a pev u Gati la, zan zan ve za ar hen Yaser;

⁶ shi ve za hen Gileadi, man hen tar u Tatim-hodeshi, man hen Dan-yaan man hen iningirtar i Shidon,

⁷ ve va hen garutya u Tiru, man agar a Mbahivi cii kua a Mbakanaan; nahan ve va nyôr ken Bersheba u a lu vegher u Imbusutariyan i Yuda la.

⁸ Tsô zum u ve kure ijende ve ken tar la cii yô, ve hide ken Yerusalem; ve tsa ken zende la iwer itiankarinyiin kua ayange ikundu.

⁹ Nahan Yoabi na tor iyenge i ior mba i ôr ve la; ken Iserael yô, mbanôngontyav lu dubu deri anigheni mba tsuwan sanker; man ior mba Yuda yô, lu dubu deri utaan je.

¹⁰ Tsô ishima na Davidi ibo zum u a ôr iyenge i ior kera la. Nahan Davidi kaa a TER er: M er kwaghbo kpishi je sha kwagh u m er ne; nahan kpaa, TERE, shi ese ibo i wanakiriki Wou ne kera; gadia m er ibumekwagh tsô.

¹¹ Er Davidi mough pepe yô, kwaghôron u TER va hen profeti Gadi, or u Davidi, ornengenakaa la, er:

¹² Za, za ôr kwagh a Davidi wer: TER ngu kaan nahan er: M ver u akaa atar; tsuwa kwagh u M̱ er u yô.

¹³ Nahan Gadi va hen Davidi va ôr un kwagh la, kaa a na er: Shin ka u ijen i̱ gba ken tar wou anyom ataankaraharou? Shin ka u ú yevese mbaihomov ou iwer itiar, vea lu yan we angaharou? Shin ka u bouange a̱ lu ken tar wou ayange atarou? Nenge hegen, hen kwagh u me za kaa u A tindim la yô.

¹⁴ Davidi kaa a Gadi er: Kondom iyol kpishi je; yô, sé gba sha ikev i TER tsô; gadia mhôônom Nam ma zungwen ma vese, de rumun wer m̱ gba sha ikev i or ga.

¹⁵ Tsô TER tindi bouange sha Iserael, hii pepe je zan zan ar sha shighe u i ver la; hii hen Dan zan zan za ar hen Bersheba, ior kpe dubu akunduatargber.

¹⁶ Zum u ortyom la naregh uwegh sha gar u Yerusalem sha u una tim un yô, mhôônom kôr TER sha kwaghbo la, A gema A kaa a ortyom u timin ior la er: Kuma ve; hide a uwegh ough ijime tsô. Ortyom u TER gema lu hen vande u gbiren alakema u Arauna Oryebushi la.

¹⁷ Tsô Davidi ôr kwagh a TER zum u a nenge a ortyom u a woo ior la yô, a kaa er: Nenge, m er kwaghbo, m er kwagh u vihin; kpa iyôngo ngin yô, ka nyi i ere? Yô, shi de, uwegh Ough ku̱ lu num a mo kua ya u terem tsô.

¹⁸ Tsô sha iyange la je, Gadi va hen Davidi va kaa a na er: Kôndo za ta TER atse a nanden nagh sha vande u gbiren alakema u Arauna Oryebushi la.

¹⁹ Nahan Davidi kôndo sha imo i Gadi, er TER kaa un yô.

²⁰ Tsô Arauna ta ashe, za nenge a tor a mbayev nav, lu van her a na; nahan Arauna due ngurum wa ityough inya sha ishigh ki tor.

²¹ Tsô Arauna kaa er: Ka nyi terem tor a ve hen wanakiriki na? Nahan Davidi kaa er: Ka sha u me yam vande u gbiren alakema ne a we, me ta atse a nanden nagh sha mi sha u bouange ne a̱ de u eren ior yô.

²² Tsô Arauna kaa a Davidi er: Terem tor a̱ gba tôôn kwagh u a sar un tsô, a̱ na nagh a mi; nenge, abua ngala sha ci u nagh ku nanden man shi ikav mbi gbiren alakema kua ikav mbi abuav mbila, mbi̱ lu ikon i keer usu a min;

²³ akaa ne cii, tor, Arauna na tor. Arauna shi kaa a tor er: TER, Aôndo Wou, A̱ rumun we.

²⁴ Kpa tor kaa a Arauna er: Ei, saa me yam a yam a we sha ishe i a; me na TER Aôndo wam, nagh ku nanden sha kwagh u m ngohol gbilin ga. Nahan Davidi yam vande u gbiren alakema kua abua la sha ushekel mba azurfa akunduahargber.

²⁵ Davidi ta TER atse a nanden nagh sha mi heregh, a na iniav mbi nanden man iniav mbi bem. Nahan TER rumun msen u i er sha ci u tar la yô, tsô bouange la bee hen Iserael.