2 Samuel 23 - ICIGHAN BIBILO

¹ Ka akaaôron a Davidi a masetyô ne: Davidi wan u Yese ngu ôron, or u i kende un sha la, ngu ôron, ka or u Aôndo u Yakob, u i shigh un mkurem, or u doon ishima ken atsam a Iserael je la.

² Jijingi u TER ôr kwagh ken a mo, kwaghôron Na kpaa ngu sha nombor wam,

³ Aôndo u Iserael kaa kwagh, Vande u Iserael ôr kwagh a mo: Or u hemban u a tem tor sha ior, u a tem tor, a cie Aôndo,

⁴ una lu er iwanger i pepe, er iyange ka ia duen nahan, er sev mbu abeen ka a lu ga la, iyange i wanger; man er ura ka u nôô, toho u mende shin inya u hôm nahan.

⁵ Kape ya wam a lu hen Aôndo je la gaa? Gadia A ya ikur i tsôron a mo, i i vande sôron i vighe vighe, man ka i bunden ga kpaa; gadia myom wam cii kua isharen yam cii, Una er er vea vese gaa?

⁶ Kpa agbilinaior yô, a cii, nga er usaa mba i hee kera nahan, gadia á kôr ve sha uwe ga;

⁷ kpa a lu or ka benden a ve yô, nana̱ vande lun a ikagh ki iyôgh man ihandeiwange sha uwe, á nande ve sha usu purututu hen ijiir la je

⁸ Anomaior a Davidi lu a mi yô, ka ati a ve ne: Or u hen Shebeti, Ortakemoni, orvesen u mbahemen ityav, ka Adino Oreseni je la, a nôngo ityav a ior deri anigheni a wua ve icin i môm.

⁹ Ken ijime na yô, lu Eleasar, wan u Dodo, wan u Orahohi, lu u môm ken anomaior atar a a lu a Davidi ityô la; zum u ve lu suwen num a Mbafiliti mba ve kohol sha u nôngon ityav la, Mbaiserael lu kôndon yô,

¹⁰ a mough a tile sha, a wua Mbafiliti zan zan uwegh kpe un, uwegh nagh var sha sanker na kpaa; TER na zegemhembe sha iyange la; ior mase van un ijime sha u va yan ishar tseegh.

¹¹ Or u nan dondo sha a na yô, lu Shama, wan u Agee, Orharari. Mbafiliti kohol imôngo henpe sule u alev a vegh vegh lu yô; ior yevese Mbafiliti.

¹² Kpa un yô, tile her atô u sule la, a sendegh her, a wua Mbafiliti; TER na mhembe u vesen.

¹³ Ior itiar ken mbahemenev mba ikundugber mbala, ve sen ve va hen Davidi sha ayange a sundan iyiav, hen bar u Adulam; ikumutya i Mbafiliti gema haa afo shin pev u Refaim.

¹⁴ Hen shighe la Davidi lu ken garutya; ikumutya i Mbafiliti gema haa ken Betelehem.

¹⁵ Tsô sar Davidi tsung, a kaa er: Ma or ma nan shi nem mngerem ma shin ijôr i Betelehem i i lu hen hunda la, ma m me!

¹⁶ Tsô anomaior atar la tor hen atô u ikumutya i Mbafiliti za kese mngerem shin ijôr i Betelehem i i lu hen hunda la, ve va na Davidi; kpa a kera rumun u man ma ga, a gema a haa ma inya sha ishigh ki TER.

¹⁷ Shi a kaa er: TERE, me er nahan mayange ga, kera ka awambe a ior mba ve te uma ve kera gaa? Nahan a rumun u man ga. Ka kwagh u anomaior atar la er je ne.

¹⁸ Abishai, anngô u Yoabi wan u Seruya, lu orhemen ken ve mba utar mbala. A kende iwange na sha ior deri utar a wua ve je, nahan a due iti ken ve mba utar mban.

¹⁹ Ka un je a hemba icivir ken ve mba utar mban ye gaa? Nahan i ver un orhemen ve, nahan kpaa a ar sha mba utar mba hiihii la ga.

²⁰ Benaia, wan u Yehoyada, wan u nomor ugen u ken Kabeseel, u a er akaa a vesen yô, a wua ônov mba Ariel, Ormoabi, uhar; shi a hungwa shin ihungwa a wua begha sha shighe u senou lu haan la.

²¹ A wua Origipiti kpaa, or u kuman ashe; Origipiti la lu a iwange sha uwe, kpa a sen hen a na a gbough, a tsuwe Origipiti la iwange sha uwe, a wua un sha iwange na la je.

²² Ka akaa a Benaia wan u Yehoyada a er je ne, a due iti ken anomaior atar la.

²³ A hemba mba ikundugber mbala icivir cii je, kpa a ar sha mba utar mba hiihii mbala ga. Davidi ver un orvesen u mbakuran un.

²⁴ Asahel anngô u Yoabi, lu u môm ken mba ikundugber la; man Elhanan wan u Dodo u hen Betelehem;

²⁵ Shama, Orharodi; Elika Orharodi;

²⁶ Helese Orpalti; Ira wan u Ikeshi, Ortekoa;

²⁷ Abieser Oranatoti; Mebunai Orhusha;

²⁸ Salmon, Orahohi; Maharai, Ornetofa;

²⁹ Helebi wan u Baana, Ornetofa; Itai wan u Ribai u hen Gibea u ken Mbabenyamin la;

³⁰ Benaia, Orpiraton; Hidai u hen iwagh i Gaashi;

³¹ Abi-albon, Orarbati; Asemaveti, Orbahurim;

³² Eliaba, Orshaalbon; ônov mba Yashen; Yonatan;

³³ Shama, Orharar; Ahiam wan u Sharar Orharar;

³⁴ Elifeleti wan u Ahashebai, wan u Ormaakati; Eliam wan u Ahitofel, Orgilo;

³⁵ Hesero, Orkarmel; Paarai, Orarebi;

³⁶ Igal wan u Natan, Orsoba; Bani, Orgadi;

³⁷ Saleki Oramon; Naharai, Orbeeroti, tilin Yoabi wan u Seruya ikav mbi utyav;

³⁸ Ira, Oriteri; Garebi, Oriteri;

³⁹ Uria, Orhiti; kohol ve cii kuma ikundugber kar utaankaruhar je.