2 Samuel 22 - ICIGHAN BIBILO

¹ Tsô Davidi ôr kwagh a TER sha asemberakaa a icam ne sha iyange i TER yima un sha ikev i mbaihomov nav cii, kua sha ikev i Saulu kpaa la.

² A kaa er: TER ka vande wam man garutya wam, kua Oryiman wam kpaa;

³ Aôndo wam, vande wam u taver, ka sha a Na me suur ye; ka perutya wam man korough ku myom wam, barwoogh wam man ijiir yam i yeren kpaa, Oryiman wam; U yimam sha ikev i kwagh u aperagh;

⁴ M yer TER u A kom u á wuese Un yô, ka nahan man ka i yimam sha ikev i mbaihomov av ye.

⁵ Gadia agôndoamnger a kuugh kasem, iyuhamnger i mtim ta sha a mo.

⁶ Ikor i Sheol kasem; akaahônon a kuugh tserem.

⁷ Ken mkighir u i kighir mo ne, m yila TER; een, m yila Aôndo wam, A ungwa imo yam, ken tempel Na, mliam am nyôr Un ken ato.

⁸ Tsô tar tenger er ngigh ngigh, amagh a Sha kpaa tenger; i tenger a, sha ci u A yugh yô.

⁹ Mnyim due Un ken ahenga kôndo sha, usu due ken zwa Na hia je, aka kpaa kôr usu sha u.

¹⁰ A nelem Usha, A hungwa shin inya, angôghime lu shin angahar a Na.

¹¹ A unde sha cerubi, A purugh; een, i nenge a Na sha akper a ahumbe.

¹² A gema ime, i hingir ityumbe Na i kasen Un wan atô, mngerem ma wan ime kua abeen a il.

¹³ Sha iengem i sha ishigh Nagh la, akausu yegh.

¹⁴ TER dura Sha, Uhembansha kende a imo Na sha.

¹⁵ A ker avaan a Na, A sambe ve; inyiar Na nyiar, nzughul a ve.

¹⁶ Zum la tareghnyaagh u zegemnger due, amagh a taregh hingir ken igbar, sha myange u TER, sha m-ee u humbe u ken ahenga a Na.

¹⁷ A naregh uwegh sha A kôrom, A dughum shin uzegembamngerev;

¹⁸ A yimam sha ikev i orihom wam u ageegh, sha ikev i mba ve kerem ihom la; gadia ve hembam agee.

¹⁹ Ve ta sha a mo sha iyange i ican yam; kpa TER lu ishuur wam.

²⁰ A va a mo hen ijiir i gbanger, A yimam sha ci u i doo Un a mo yô.

²¹ TER er a mo vough sha mlu wam u perapera; A nam injar sha mwanger u ave am.

²² Gadia m wa igbenda i TER iko, m undu Aôndo wam sha u eren ifer ga.

²³ Gadia akaaôron a Na a jirigh cii lum sha ishi; m hunde ishima sha akaawan a Na kpaa ga.

²⁴ M lu jighilii sha ishigh Nagh; m kem iyol m nyagh iferkwagh yam.

²⁵ Ka nahan man TER A nem injar sha perapera wam; sha inja i mwanger wam sha ishigh Nagh ye.

²⁶ Or u nan zungu mhôônom yô, U tese di nan mhôônom Ou ma zungwen je; or u mimi yô, U tese nan mimi Wou je

²⁷ or u wang kpaa, U tese nan iyol You er U lu wang yô; kpa or u nan lu ormimi ga yô, U shi U tese nan di ishimanyoon You je.

²⁸ Gadia We U yima ior mba i kighir ve a ican yô, kpa ashe a Ou nga ihom a mbagengeseyol; U hee ve.

²⁹ Gadia U ngu imenger yam TERE; TER wanger ime yam.

³⁰ Gadia ka sha agee Ou je, man m te num sha ikumutya ye, shi ka sha agee a Aôndo wam je m tsugh gilgar m aver ye.

³¹ Gbenda u Aôndo yô, ka u jighilii je; mkaanem ma TER ma wang cii. Un ka perutya u mba ve suur sha a Na la cii.

³² Gadia ka an nan lu Aôndo, saa TER tseegh gaa? Man ka an nan lu vande, saa Aôndo wase tseegh gaa?

³³ Aôndo ka gar wam u utya u taver; A gema gbenda wam u hingir vough.

³⁴ A gema angahar a am, hingir er ka a ashim yô; A erem m tile sha ajiir a am a taven sha.

³⁵ Ngu tesen ave am ityav mbi nôngon zan zan akaseaveegh am nga hende ada u iyôgh ki bashigh.

³⁶ U nam perutya u myom Wou kpaa; ishima You i legh legh erem m gba ikôr.

³⁷ U naregh a-avenangahar am gba ca, angahar a am kpaa a dolough ga.

³⁸ M zenda mbaihomov av ityô m tim ve; m hide je ga, saa m vande timin ve.

³⁹ M tim ve, m her ve, je, ve fatyô u moughon ga; ve gbidye inya hen angahar a am.

⁴⁰ Gadia U wam agee iyol, sha u zan ityav; mba ve mough num a mo yô, U er ve ve shiligh hen ikum yam.

⁴¹ Man shi U na mbaihomov av ve yevese mo, mba ve kerem ihom yô, m tim ve.

⁴² Ve yenge keen, ve yenge keen, kpa or u yiman ve lu ga; ve nenge sha TER je kpaa, kpa A rumun ve ga.

⁴³ Tsô m kume ve, ve hingir er vuulevu u hen inya nahan, m ndyar ve er angbiôr sha igbenda nahan, m sambe ve kera.

⁴⁴ U yimam sha inyum i ior av; U kuram m hingir orhemen u akuraior. Ior mba m fe ve ga kpaa, ve hingir mba shilen mo

⁴⁵ Atôatyev va hen a mo agurenu; er ve ungwa a ungwa gwa wam tseegh tsô, ve rumun imo yam je.

⁴⁶ Atôatyev use, ve due hen ajiir a ve a ken iuv la, a akarkase iyol.

⁴⁷ TER ngu uma; i̱ wuese Vande wam; i̱ kende Aôndo u A lu vande u myom wam ne sha!

⁴⁸ Ka Aôndo u A oron iyev sha ci wam, u A ne akuraior sha ikev yam,

⁴⁹ u A due a mo sha ikev i mbaihomov av; een, U kendem sha sha mba ve hendan a mo; U yimam sha ikev i iferor.

⁵⁰ Ka nahan man me wuese We ken akuraior TERE, me wa atsam a wuese iti You kpaa ye.

⁵¹ Ngu nan tor Na myom u vesen; ngu tesen erdoo Na a u A shigh un mkurem la, a Davidi kua tsombor na gbem.