2 Samuel 21 - ICIGHAN BIBILO

¹ Sha ayange a Davidi la, ijen gba anyom atar, sha adondo adondo; nahan Davidi ker ishigh ki TER. TER kaa a na er: Ka sha ci u ike i awambe ngi sha Saulu kua ya na sha ci u a wua Mbagibeon.

² Tsô tor yila Mbagibeon, kaa a ve er (Mbagibeon yô, ka mba ken nongo u Mbaiserael ga, kpa ka mba ken Mbaamor mba ve shi her la, man iyange Mbaiserael ve bum a ve; kpa Saulu yô, lu un ka wuan ve, sha ci u ishima i tseen na sha Mbaiserael kua Mbayuda),

³ Davidi kaa a Mbagibeon er: M̱ er a ven nana? Man ka nyi me er ve, me wam ne, sha er né ver dyako u TER doo doo?

⁴ Mbagibeon kaa a na er: Ka kwagh u azurfa shin zenaria a gbe se a Saulu kua ya na ga; man shi ka kwagh wase u wuan ma or ken Iserael kpaa ga. Tsô a pine er: Ne hen nana, m̱ er ne nyi?

⁵ Ve kaa a tor er, or u lu wua se man shi wa ishima u timin se er se̱ de kera luun ken ma veghertar u Iserael ga la,

⁶ i̱ na se ônov mba nan utaankaruhar, sé sende ve sha ishigh ki TER ken Gibea u Saulu, or u TER lu tsuwa un la. Tor kaa er: Me na.

⁷ Kpa tor yima Mefibosheti, wan u Yonatan, wan u Saulu, sha ci u mbum u TER u a lu hen atô ve la, ka hen atô u Davidi vea Yonatan, wan u Saulu je la.

⁸ Nahan tor gema kôr ônov mba Risepa wan u Aya, uhar, mba a mar a Saulu yô, ka Armoni man Mefibosheti; man ônov mba Merabi, wan u Saulu, utaan, mba a mar a Aderiel wan u Barshilai, Ormekolati la,

⁹ a na ve sha ikev i Mbagibeon, ve sende ve sha uwo la, sha ishigh ki TER, ve mba utaankaruhar mbala cii, ve kpe icin i môm; lu sha shighe u sundan iyiav i wua ve ye, lu sha ayange a i hii u sundan shair la.

¹⁰ Tsô Risepa, wan u Aya la tôô bufu samber sha iwen sha ci na, hii sha mhii u sundan iyiav je zan zan shighe u ura kar nôôn sha akom la; mayange a rumun u inyon i sha i̱ gba sha a ve tetan ga, shin ishôso i utu kpaa ga.

¹¹ Tsô i za ôr Davidi kwagh u Risepa wan u Aya, kwase u Saulu u sha uika la, a er yô.

¹² Tsô Davidi za za tôô akuhe a Saulu man akuhe a wan na Yonatan, sha ikev i ior mba Yabeshi-gileadi mba ve za ii a hen kpuun kpuun u Bete-shan, henpe Mbafiliti lu sende ve sha iyange i Mbafiliti wua Saulu sha Gilboa la;

¹³ a za kura akuhe a Saulu man akuhe a wan na Yonatan, a va a min, shi ve kura akuhe a mba i sende ve la kpaa,

¹⁴ ve va ii akuhe a Saulu man a wan na Yonatan ken tar u Benyamin ken Sela, shin uwar u ter na Kishi; ve er sha imo i tor cii. Ken masetyô la yô, Aôndo ungwa msen u i er sha ci u tar la yô.

¹⁵ Er Mbafiliti shi va nôngo ityav a Iserael yô, Davidi sen a mbayev nav, ve za nôngo ityav a Mbafiliti; nahan Davidi vôr.

¹⁶ Ishebi-benobi u a lu môm ken ônov mba Rafa, u myohom ma iwange na kuma ushekel mba togula deri utar la, a kange sanker u he shin iwenge, a lu henen er una wua Davidi.

¹⁷ Kpa Abishai wan u Seruya wase un, a gber Orfiliti la, a wua. Tsô ior mba Davidi bum a na, kaa er: Ú kera zaan ityav a vese mayange ga, sha er ú pir imenger i Iserael ga yô.

¹⁸ Tsô, ken masetyô la, i shi i nôngo ityav a Mbafiliti hen Gobi; nahan Shibekai, Orhusha, wua Sav, u a lu môm ken ônov mba Rafa la.

¹⁹ I shi i nôngo ityav hen Gobi a Mbafiliti; nahan Elhanan, wan u Yaare-Oregim, Orbetelehem, wua Goliati, u ihande i iwange na lu er igaikondo nahan la.

²⁰ Shi i nôngo ityav hen Gati, orgen lu ker u taven tsung, hanma uwegh nagh lu a ahôaveegh ataratar man hanma nguhar kpaa lu a ahôangahar ataratar, kohol a cii ka ikundu kar anyiin je la; un kpaa lu Orrafa.

²¹ Er a gba lahan Iserael yô, Yonatan wan u Shimei, anngô u Davidi, wua un.

²² Mba unyiin mban cii, lu ônov mba Rafa ken Gati; Davidi man mbayev nav wua ve.