2 Samuel 2 - ICIGHAN BIBILO

¹ Tsô er kwagh ne kar kera yô, Davidi pine TER er: M̱ kôndo m̱ za sha gar u Yuda shinii? TER kaa a na er: Kôndo; nahan Davidi pine er: Ka han m̱ kôndo? A kaa er: Ka sha Heberon.

² Tsô Davidi kôndo sha her a kasev nav uhar kpaa, Ahinoam u Yesereel kua Abigail kwase u Nabal Orkarmel.

³ Shi Davidi va a ior mba ve lu a na la kpaa, hanma or a ior mba nan; ve za tema ken agar a Heberon.

⁴ Tsô ior mba Yuda va, va shighe Davidi mkurem heregh er a̱ lu tor sha ya u Yuda. Er ve kaa a Davidi er: Ka ior mba Yabeshi-gileadi, ve ii Saulu yô,

⁵ Davidi tindi mbatyomov hen mba Yabeshi-gileadi mbala, a kaa a ve er: TER A̱ ver ne doo doo er ne er kwagh u dedoo ne a ter wen, Saulu, ne ii un yô.

⁶ TER A̱ er a ven dedoo man sha mimi kpaa; mo kpaa, me er a ven dedoo sha ci u ne er kwagh ne nahan yô.

⁷ Yô, taver nen ave a en, lu nen nomso; gadia ter wen Saulu kpe man ya u Yuda gema shighem mkurem er m̱ tema tor sha a ve.

⁸ Kpa Abiner, wan u Ner, kurutya u akumautya a Saulu vande kuan a wan u Saulu Ishibosheti, per a na, za a na ken Mahanaim,

⁹ za ver un tor sha Gileadi man sha Mbaashur man sha Yesereel man sha Eferaim man sha Benyamin kua sha Iserael cii.

¹⁰ Anyom a wan u Saulu, Ishibosheti, lu akunduahar zum u a ya tor sha Iserael la, a tema tor anyom ahar. Kpa ya u Yuda yô, dondo Davidi.

¹¹ Ayange a Davidi lu tor ken Heberon sha Mbayuda yô, lu anyom ataankarahar man iwer ataratar.

¹² Tsô Abiner wan u Ner kua mbayev mba Ishibosheti wan u Saulu, ve due ken Mahanaim ve za ken Gibeon.

¹³ Nahan Yoabi wan u Seruya kua mbayev mba Davidi kpaa, ve due ve va kohol ve hen kpe u ber u Gibeon ve tema, mban haa ber yande ne, mbala di haa yande la.

¹⁴ Tsô Abiner kaa a Yoabi er: De mbayevikaior ve̱ mough ve̱ numbe sha ishigh yasegh. Yoabi kaa er: Yô, ve̱ mough.

¹⁵ Tsô ve mough, i ôr iyenge ve, pue kar uhar sha ci u Benyamin man Ishibosheti wan u Saulu; man mbayev mba Davidi di kpaa pue kar uhar.

¹⁶ Tsô hanma or kôr ugen sha ityou, nan kuma nan sanker ken ihan, nahan ve kpe icin i môm cii; ka nahan man i ii ijiir la iti er Helkati-hasurim u ken Gibeon ye.

¹⁷ Ityav taver sha iyange la tsung; mbayev mba Davidi hemba Abiner kua ior mba Iserael.

¹⁸ Ônov mba Seruya lu her utar, ka: Yoabi man Abishai kua Asahel. Asahel yô, lu or u yevese fefa er ashim nahan.

¹⁹ Nahan Asahel cir sha Abiner, zenda un tsung, kaha ken iyan shin ken imese undu Abiner ga.

²⁰ Tsô Abiner gema ashe pine er: Ka we Asahel nee? A rumun, a kaa er: Ka mo.

²¹ Nahan Abiner kaa a na er: Kaha ken uwegh ku yanegh shin ku imesegh, za kôr wanye ugen, ngohol ikav nav mbi tswamev. Kpa Asahel rumun u kahan un ken ijime kera ga.

²² Nahan Abiner shi kaa a Asahel er: Karem ken ijime kera, ka nyi man m̱ gbihi u inya he? Nahan me zua ishigh a anngôu Yoabi nana?

²³ Nahan kpaa a rumun u karen kera mayange ga, tsô Abiner gema ityô i iwange na tume un hen uya, kar due ken ijime; a gba hen ijiir la je, a kpe; nahan mba ve va hen ijiir i Asahel gba, kpe la yô, ve tile her ving.

²⁴ Kpa Yoabi man Abishai, ve gba zendan Abiner ityô; iyange mile zum u ve ar sha igungu u Ama u a lu sha ishigh ki Gia hen gbenda u desereti u Gibeon la.

²⁵ Tsô Mbabenyamin kohol hen ijime i Abiner ve hingir ikum i môm, ve kar ve za tile sha igungu ugen.

²⁶ Tsô Abiner yila Yoabi kaa er: Sanker á gba yan gbem tsô? U fa er kwagh u masetyô á hemba vihin ishima gaa? Ka hanma shighe je man ú kaa ior wer, ve̱ de u zendan anmgbianev vev ijime?

²⁷ Yoabi kaa er: Er Aôndo A lu u uma ne yô, wea er kwagh ga yô, mimi je, ior ma ve hidi, ma ve de u zendan anmgbianev vev ijime ga, saa kper.

²⁸ Tsô Yoabi tôngo korough; ior tile, ve kera zenda Iserael ityô ga, man ve kera seer nôngon ityav kpaa ga.

²⁹ Tsô Abiner a ior nav ve tsa yemen kaka ve kar shin Araba, ve per Yordan ve kar hen Biteron cii ve va hen Mahanaim.

³⁰ Yoabi hide, de u zendan Abiner ityô; zum u a kohol ior cii yô, mbayev mba Davidi yina pue kar utaankarunyiin kua Asahel kpaa.

³¹ Kpa mbayev mba Davidi wua Benyamin kua Abiner ior deri utar man akunduatar je.

³² Ve tôô Asahel ve ii un shin uwar u ter na ken Betelehem. Yoabi a ior nav ve tsa yemen kaka, sev za av ve hen Heberon.