2 Samuel 18 - ICIGHAN BIBILO

¹ Tsô Davidi ôr iyenge i ior mba ve lu a na la, a ver mbahemenev mba hemen ior dubu dubu man mbahemenev mba hemen ior deri deri.

² Nahan Davidi pav ior mbala akum atar, a tindi ikum i môm sha ikev i Yoabi, i môm sha ikev i Abishai wan u Seruya, anngô u Yoabi, shi u môm la sha ikev i Itai, Orgati. Man shi tor kaa a ior er: Mo iyol yam kpaa me za a ven imôngo kpee.

³ Kpa ior kaa er: We ú za ga; gadia aluer se gba yevese kpaa, á lu ve kwagh ga; shin sea kpe kwe môm cii kpaa, á lu ve kwagh ga; kpa we u kuma er ior asev dubu pue nahan; nahan yô, hemba doon u we ú lu ken gar, ú gema ú wasen se.

⁴ Tsô tor kaa a ve er: Kwagh u ne nenge a doo yô, me er. Nahan tor tile hen hundagar, ior cii gba duen deri deri man dubu dubu.

⁵ Tor ta Yoabi man Abishai kua Itai icin, er: Er nen a er a Abesalom wanyekwaor la, sha ci wam. Ior cii lu ungwan er tor lu tan mbahemenev icin sha Abesalom yô.

⁶ Nahan ior due yem ken toho sha u za nôngon ityav a Iserael; ve cinge ityav shin ikô i Eferaim.

⁷ Mbayev mba Davidi za hemba ior mba Iserael ker. Iyange la i wua ior her kpishi, kuma ior dubu ikundu.

⁸ Gadia ityav mbila samber sha tar la cii; ior mba ve kpe shin ikô sha iyange la, hemba mba sanker wua yô.

⁹ Tsô Abesalom za ande sha mbayev mba Davidi. Abesalom lu yemen sha alfadari na, alfadari la za nyôr shin ayagher a zegekon u terebin, tsô ityough nagh za hange sha kon u terebin, gba zungur her, alfadari u wen tema sha mi la kar yem.

¹⁰ Orgen va nenge a na, za kaa Yoabi, er: Nenge, m nenge Abesalom ngu zungur sha terebin.

¹¹ Tsô Yoabi gema kaa a or u nan kaa un la, er: Nenge, u nenge a na je, man ka nyi u woo un u gbihi inya ga? Ma m ne u agbenger a azurfa pue kua kwange kpaa.

¹² Or la gema kaa a Yoabi er: Shin mea ngohol agbenger a azurfa dubu sha uwegh agh je kpaa ma m naregh uwegh agh sha u eren wan u tor kwagh ga; gadia tor ta u icin sha ato ase je, we man Abishai kua Itai, a kaa er: Ver nen ishima, kura nen a kura Abesalom wanyekwaor la.

¹³ Mea er a uma na dang yô (ma kwagh ma a lu tor myer ga), we iyol you kpaa ma u palegh iyol ma u undum.

¹⁴ Tsô Yoabi kaa er: Doo u me ngôôr a we nahan ga. Nahan akôr ahande atar ken uwe, a za tume Abesalom hen ishima due keela, er a lu uma her la je, hen atô u kon u terebin la.

¹⁵ Mbayev pue mba tilin Yoabi ikav mbi utyav kase un, ve ta num sha Abesalom, ve wua.

¹⁶ Tsô Yoabi tôngo korough, nahan ior hide, ve de u zendan Iserael ityô, gadia Yoabi yange ior u zan hemen.

¹⁷ Ve tôô Abesalom ve gbihi shin zegeihungwa u shin ikô, ve ta awen tihi sha mi zegenan; Mbaiserael cii yevese yem hen utenti vev.

¹⁸ Abesalom yô, zum u a lu uma la, tôô ityôgh ki iwenegh ki shin pev u Tor, tim sha ci na, gadia a kaa er: M ngu a wan u umbur iti yam ga; nahan a ii ityôgh kila iti na; mba yilan ki er: ityôgh ki umbur Abesalom a mi, zan zan nyian.

¹⁹ Tsô Ahimaashi wan u Sadoki kaa er: De m̱ gber ayem ahegen, m̱ za ôr tor loho er TER A yem un sha ikev i mbaihomov nav yô.

²⁰ Kpa Yoabi kaa a na er: Ka we u lu or u zan a loho nyian ga, iyange igen tsô ú za a loho; nyian yô, ú za a loho u ma kwagh ga, sha ci u wan u tor a kpe yô.

²¹ Tsô Yoabi kaa a Orkushi, er: Za, za ôr tor kwagh u u nenge yô. Tsô Orkushi la wa ityough inya sugh Yoabi, tsô gba zan ayem.

²² Nahan Ahimaashi wan u Sadoki shi kaa a Yoabi er: A lu nan nan kpaa, shi rumun m̱ gber ayem, m̱ dondo Orkushi ne ijime. Yoabi pine un er: Ka nyi i lu u pe zan kpee wan wama, gadia ú zua a injar sha loho shon ga.

²³ Kpa a lu nan nan kpaa, de m̱ za ayem. A kaa a na er: Yô, gba zan tsô. Tsô Ahimaashi gber ayem gba yemen sha gbenda u kpuun kpuun la, za kar Orkushi la.

²⁴ Yô, Davidi tema hen huwa u ihindagar ihiar la, tsô orkuran unde sha haav mbu hundav, kôndo zan zan sha gilgar, te ashe yô, a za nenge or lu van ayem, nan lu tswen.

²⁵ Tsô orkuran la nenger imo, kaa tor. Nahan tor kaa er: Nana lu tswen yô, nan ngu a loho u dedoo. Er nan lu van ayem, kporom yô,

²⁶ orkuran la shi nenge orgen lu yevese van, nahan orkuran la yila orhunda, kaa er: Nenge, shi orgen ngu van ayem, nan ngu tswen. Tor kaa er: Ngula kpaa ngu van a loho u dedoo.

²⁷ Orkuran la kaa er: Sha mnenge wam yô, ayem a or u sha hemen la ka a Ahimaashi wan u Sadoki. Tor kaa er: Un ka or u injaa, ngu van a loho u dedoo je.

²⁸ Tsô Ahimaashi genger imo kaa a tor er: Bem! A ngurum, a wa ityough inya sha ishigh ki tor, a kuma ishigh inya, a kaa er: I̱ wuese TER, Aôndo wou, u A ne ior mba ve hendan a terem tor sha ikev yase yô.

²⁹ Tor pine er: Abesalom wanyekwaor la ngu dedoo kpa? Ahimaashi gema kaa er: Zum u Yoabi tindi wanakiriki u tor kua mo wanakiriki wou kpaa yô, m nenge ior zua lu eren gbugh gbu gbugh, kpa m kav kwagh shon ga.

³⁰ Tor kaa er: Na ian, hile tile keen. Tsô a hide, a tile her ving.

³¹ Tsô Orkushi la va nôôr: Orkushi kaa a tor er: Terem tor, ungwa ase loho u dedoo ne, TER or u iyev nyian sha mba ve hendan a we cii.

³² Tor pine Orkushi la er: Abesalom wanyekwaor la ngu dedoo kpa? Orkushi la gema kaa er: Mbaihomov mba terem tor, man mba ve hendan a we cii sha u vea er u kwaghbo yô, ma ve hingir er wanye la nahan.

³³ Tsô vihi tor kpishi; a unde sha iyou i sha, i sha hundagar, a gba vaan zenden kaan er: Ahii! Wan wam Abesalom, wan Wam! Wan wam Abesalom! Guda yô, mo ma m kpe sha ci wou. Ahii! Abesalom, wan wam, wan wama!