2 Samuel 17 - ICIGHAN BIBILO

¹ Shi Ahitofel kaa a Abesalom er: De, m̱ sange nomsombaiorov dubu pue kar uhar, m̱ mough, m̱ tôv Davidi ityô hen tugh mbun je,

² m̱ za bur un er a ver a shir ave ne, m̱ ta un mciem iyol; nahan ior mba ve lu a na ityô cii vea yevese; me mase wuan tor tseegh,

³ Me hile a ior cii her a we; mhir u ior cii ngu sha ikev i or u u keren la; nahan ior cii vea tema bem bem.

⁴ Kwaghôron la doo Abesalom kua mbatamen mba Iserael cii.

⁵ Tsô Abesalom kaa er: Yô, yila nen Hushai Orarkiti la kpaa, sé ungwa nen kwagh u wen una ôr yô.

⁶ Er Hushai za va hen Abesalom yô, Abesalom ôr kwagh a na er: Ahitofel ôr kwagh nahan nahan; nahan sé er sha imo naa? A lu nahan ga yô, we kaa ase.

⁷ Tsô Hushai kaa a Abesalom er: Mhen u Ahitofel a hen hen shighe ne yô, ka u sha mi ga.

⁸ Hushai shi kaa er: U fa teru a ior nav, ka anomaior je, man asema nga vihin ve hegen tsung er dwem u i ngohol un ônov ken toho yô; man teru kpaa ka or u fan ityav, una tsa a ior imôngo ga.

⁹ Nenge, hegen una yer shin ihungwa, shin ma ijiir igen; tsô, aluer ior mbagenev vea kpe sha num u i hii nôngon la yô, mba ve ongo cii vea kaa er: Ior mba ve lu a Abesalom ityô la, i pande i wua mbagenev.

¹⁰ Nahan or u nan lu nomor u ishima i nan i lu er begha nahan je kpaa, nana yina ishima doo doo; gadia Iserael cii fa er teru a lu nomor yô, mba ve lu a na imôngo kpaa ka anomaior mimi.

¹¹ Kpa mo yô, m hen mer: I̱ kohol Mbaiserael cii her a we, hii hen Dan zan zan ar hen Bersheba, iyenge ve i̱ ngee er waarawa u hen kpe u zegemnger nahan, we iyol you kpaa za ken utya.

¹² Nahan sé za tser un hen ijiir i a lu la, sé shile sha a na er avure nga a gba sha tar nahan; un kua ior mba ve lu a na cii, sé de ma or môm ga.

¹³ Man shi aluer una za nyôr ken ma gar ugen yô, Iserael cii vea tôô ikor vea za a mi hen gar la, sé kpera un sé za ta shin ifi je, aniwen ciôn tsô kpaa, una kera shi hen ijiir la ga.

¹⁴ Tsô Abesalom kua ior i Iserael cii ve kaa er: Mhen u Hushai Orarkiti ne, hemba mhen u Ahitofel. Gadia TER ver u i̱ bunde mhen u injaa u Ahitofel la, sha er TER Una va a kwaghbo sha Abesalom yô.

¹⁵ Tsô Hushai kaa a Sadoki kua Abiatar upristi mbala er: Kape Ahitofel a tese Abesalom kua mbatamen mba Iserael la, man kape mo di kpaa m tese ne.

¹⁶ Yô, tindi nen ase wanye fefa hegen nana̱ za pase Davidi er: De tse hen ahongo a ken desereti ne hen tugh mbun ga, a lu nan nan kpaa per, sha er i̱ de timin tor kua ior mba ve lu a na imôngo cii ga yô.

¹⁷ Yonatan vea Ahimaashi yô, ve tema hen En-rogel; kpankwase ugen za ôron ve akaa; ve, ve gema ve za ôron tor Davidi; gadia doo u á nenge a ve nyôron ken gar ga.

¹⁸ Kpa wanye ugen nenge a ve, za kaa Abesalom, nahan ve uhar cii ve mough fefa, ve za hen ya u or u ken Bahurim, u ya na lu a ijôr hen tembe yô, ve hungwa shimi.

¹⁹ Kwase la tôô ikondo cir sha ijôr la gema haa sam u alakema sha mi nahan i fa kwagh shon ga.

²⁰ Tsô mbayev mba Abesalom va hen kwase la hen ya, ve pine er: Ahimaashi man Yonatan mba hana? Kwase la kaa a ve er: Ve per uwagh. Nahan ve ker, kpa ve fatyô ga, tsô ve hide ken Yerusalem.

²¹ Tsô mba moughon kera yô, ve due shin ijôr, ve za, ve za ôr tor Davidi; ve kaa a Davidi er: Mough, per nen mngerem fefa, gadia ka imbamhen i Ahitofel a hen sha a ven je ne.

²² Nahan Davidi mough a ior mba ve lu a na cii, ve per Yordan; er sev av yô, ma or u nan per Yordan ga nan lu ga.

²³ Zum u Ahitofel nenge i er sha mhen na ga yô, a kange jaki na shidi a mough a hide ken ya, ken gar na, a sôr akaa ken ya na, tsô a sende iyol na, a kpe, i ii un shin uwar u ter na.

²⁴ Tsô Davidi va hen Mahanaim, Abesalom kpaa per Yordan, un a ior mba Iserael cii mba ve lu a na ityô cii.

²⁵ Tsô Abesalom ver Amasa orhemen sha akumautya sha ityough ki Yoabi. Amasa lu wan u or u i yilan iti na er Itera, Orishemael, u a vôso Abigail wan u Nahashi, anngô u Seruya u kwase, ngô u Yoabi la.

²⁶ Iserael man Abesalom ve haa afo ken tar u Gileadi.

²⁷ Tsô zum u Davidi va hen Mahanaim yô, Shobi wan u Nahashi ken Raba ken Mbaamon, man Makir wan u Amiel u hen Lodebar, man Barshilai, Orgileadi u ken Rogelim,

²⁸ ve va a ugambe man utasa man ityev man alakema man shair man mwem man alakema u kaan man alev a vesen kua a kiriki,

²⁹ man iyough man atumbabua a kôrough man iyôngo man ciishi u i er sha atumbabua yô, sha ci u Davidi kua ior mba ve lu a na imôngo mbala, er ve̱ ya; gadia ve kaa er: Ijen kôr ior mban, ve vôr, man imura kpaa kôr ve ken desereti.