2 Samuel 16 - ICIGHAN BIBILO

¹ Er Davidi za poson ityough ki igungu la ciôn yô, Shiba wanakiriki u Mefibosheti va kohol un a ujaki uhar a ushidi; ve tôô ikpenbredi deri uhar man asume a atam a wain a uman deri man atam a ikon a vian deri kua ikpa i wain.

² Tor pine Shiba er: Ka u ka eren nyi a akaa nee? Shiba kaa er: Ujaki yô, ka sha ci u mbayev mba tor ve̱ henda, ubredi man atam a ikon a vian ne yô, ka sha ci u mbayev ve̱ ya, wain yô, ka sha ci u mba ve ver ken toho yô, ve̱ ma.

³ Tsô tor pine er: Wan u orvesen wou ngu hana? Shiba gema kaa a tor er: Nenge, a tema ken Yerusalem, gadia ngu kaan er: Nyian, ya u Iserael vea hidem a tor u terem.

⁴ Nahan tor kaa a Shiba er: Nenge, akaa a a lu a Mefibosheti cii a hingir a ou. Nahan Shiba kaa er: M gure m civir, ma i shi doo terem tor a mo.

⁵ Zum u tor Davidi va ar hen Bahurim yô, nengen, or ugen u hen tsombor u ya u Saulu, iti na er Shimei, wan u Gera, due; a due, a gba tuhwan zan.

⁶ Shi a ker Davidi awen, kua mbayev mba tor Davidi cii, shin er ior cii kua anomaior cii lu un ken uwegh ku yanegh man ku imesegh nahan kpaa.

⁷ Shimei lu tuhwan kaan er: Yem kera, yem kera, we or u haan awambe, we gbilinor ne;

⁸ TER gema awambe a ya u Saulu cii, u u tem tor sha ityough nagh la, hile sha ityough you; TER gema tor na sha ikev i wan wou Abesalom ve; nenge, kwagh tser u sha ifer you, sha ci u u lu or u haan awambe yô.

⁹ Nahan Abishai wan u Seruya pine tor er: Inja na nan iwa i kpen ne i gbe tuhwan terem tor nahana? Shi de m̱ per, m̱ za gber un ityough.

¹⁰ Tor kaa er: Ka nyi i zoughom a ven, ne ônov mba Seruya? Aluer a tuhwa, man aluer ka TER je A kaa a na er: Tuhwa Davidi yô, ka anti nana cihi nana pine er: Ka nyi u eren nahana?

¹¹ Shi Davidi kaa a Abishai kua mbayev nav cii er: Nenge, wan wam u a dugh ken iyol yam je kpaa, ngu keren mo a ku, man hile Orbenyamin nee? De nen un kera, a̱ gba tuhwan tsô, gadia ka TER je A ne un ian ye.

¹² Alaghga Aôndo Una nenge ican yam, man TER Una gema á er a mo dedoo sha ci u ityuhwanev mbi a tohom nyian ne.

¹³ Nahan Davidi a ior nav cii ve kar sha gbenda, Shimei kpaa lu teran sha kpe u igungu, tuhwan zan, keren un awen, haan ihundu.

¹⁴ Tsô tor a ior mba ve lu a na imôngo cii, ve za ar ape gen, iyol kpe ve cii, nahan a mem her.

¹⁵ Tsô Abesalom, a ior cii, ka ior i Iserael je la, ve va ken Yerusalem, Ahitofel kpaa lu a na.

¹⁶ Er Hushai, Orarkiti, ikar u Davidi, va hen Abesalom yô, Hushai kaa a Abesalom er: Tor a̱ lu uma, tor a̱ lu uma.

¹⁷ Tsô Abesalom kaa a Hushai er: Ka erdoo wou a ikaru je nee? Ka nyi u ze a ikaru imôngo ga.

¹⁸ Hushai kaa a Abesalom er: Ka nahan ga; kpa un u TER kua ior mban man Iserael cii ve tsough yô, mo kpaa me lu u na, me tema a na kpaa.

¹⁹ Man shi: Ka an, mo me er nan tomo? Kera ka sha ishigh ki wan na gaa? Er m lu eren tom sha ishigh ki teru nahan, kape me er sha ishigh you kpaa la.

²⁰ Tsô Abesalom kaa a Ahitofel er: Yô, ôr ase mhen wou sha kwagh u sé er yô.

²¹ Ahitofel kaa a Abesalom er: Yô, yav a kasev mba sha uika mba teru, mba a undu er ve̱ kuran ya ne; nahan Iserael cii vea ungwa er u hingir kwagh u duen teru ishima yô; tsô ave a mba ve lu a we cii, aa taver.

²² Nahan ve samber Abesalom tenti sha tembe u iyoughough sha; tsô Abesalom yav a kasev mba sha uika mba ter na sha ishigh ki Iserael cii.

²³ Mhen u Ahitofel u a henen hen ayange la yô, lu er or u nan pin imo i Aôndo yô, kape hanma mhen u Ahitofel kuman Davidi kua Abesalom la.