2 Samuel 14 - ICIGHAN BIBILO

¹ Er Yoabi wan u Seruya kav er ishima i lu tor sha Abesalom yô,

² Yoabi tindi loho hen Tekoa, i za va un a kwase u fan kwagh, a kaa a kwase la er: Shi er er u ngu zungwen ku nahan, ta ikondo uya, mkurem kpaa de shigh iyol ga, kpa er, er kwase u a zungu ku ica i gbe yô.

³ Yô, za hen tor, za ôr un kwagh nahan nahan. Tsô Yoabi tam kwaghôron wa un ken zwa.

⁴ Zum u kwase u Tekoa la, va nyôr hen tor yô, a gure a kuma ishigh inya, a sugh, a kaa er: Ahii! Tor wasem!

⁵ Tor gema pine un er: Ka nyi i tser uwe? A gema a kaa er: M ngu kwasecôghol, nomom saa,

⁶ man kpan wou u kwase ne lu a ônov uhar mba nomso, man ve mba uhar ve za nôngo num ken ityev, or u kôron ve num lu ga, nahan u môm gema wua ugen.

⁷ Man nenge, ityô cii mough num a kpan wou u kwase ne, ve kaa er: Un u a woo anngô na la, na se un, sé wua sha ci u uma u anngô na u a woo la, sé wua u yan dyako la kpaa, kape i sar ve u pirin mo anikausu u a shim her ne, er nomon a̱ de lu a iti shin tsombor sha won ga.

⁸ Tor gema kaa a kwase la er: Yem hen ya wou, mo me kaa imo sha kwagh wou.

⁹ Kwase u Tekoa la, gema kaa a tor er: Ahii! Terem tor! Ibo i̱ hide sha a mo, man sha ya u terem kpaa, tor kua ikônough nagh ve̱ lu a ishô.

¹⁰ Tor gema kaa er: Á lu anti or nana ôr ma kwagh a we yô, va a nan her a mo, tsô mayange nana kera cihi á bende u ave ga.

¹¹ Tsô a kaa er: Tor shi umbur TER, Aôndo wou, sha er or u oron iyev i awambe, nana̱ de kera ze hemen u timin ior zan zan i̱ va wua wan wam ga; tsô a kaa er: Er TER A lu u uma ne, ma gwarce u sha ityough ki wan wou môm tsô, una gba inya ga.

¹² Nahan kwase la kaa er: Shi de kpan wou u kwase a̱ shi a̱ ôr kwagh a ter na tor. A kaa er: Yô, ôr ase.

¹³ Nahan kwase la kaa er: Ka nyi u hen kwagh ne sha ior mba Aôndoo? Gadia sha kwaghôron ne nahan, tor hingir er ka or u lun a ibo yô, sha er tor a hide a or na u i zende nan la ga yô.

¹⁴ Gadia sé kpe kpee, sé lu er mngerem ma i hee inya i kera fetyô u kuran ga nahan; Aôndo kera ngohol a ngohol uma kera ga, kpa ka A ker gbenda sha er or u i zende nan la i̱ de te nan kera ga yô.

¹⁵ Er mo m ve sha u va ôron kwagh ne a terem tor nahan, ka sha ci u ior ve tem mciem iyol yô; kpa, kpan wou kaa er: De me za ôr kwagh a tor tsô, alaghga tor una er ishima i kpan na u kwase.

¹⁶ Gadia tor una ungwa, una war kpan na u kwase sha ikev i or u i lu nan ka timin mo kua wan wam, bunden se dyako u Aôndo la.

¹⁷ Nahan kpan wou u kwase kaa er: Kwaghôron u terem tor ma a lu u surun ishima; gadia er ortyom u Sha a lu nahan, kape terem tor kpaa a lu la, sha u paven mimi a ifer; TER, Aôndo wou kpaa A̱ lu a we.

¹⁸ Nahan tor gema kaa a kwase la er: Yô, de yeren mo ma kwagh u me pine u ga. Kwase la gema kaa er: Yô, terem tor a̱ ôr ase kwagh.

¹⁹ Tsô tor pine er: Uwegh ku Yoabi ku a we sha kwagh ne cii shinii? Nahan kwase la kaa er: Een, er u lu uma ne tor, ma or u geman ken iyan shin ken imese sha u undun kwagh u terem tor a kaa, môm nan ngu ga; een, ka wanakiriki wou Yoabi a we kwagh, shi ka wen a tam kwaghôron ne cii a we kpan wou u kwase ken zwa kpaa ye;

²⁰ ka sha u geman mlu u kwagh ne man wanakiriki wou Yoabi a er nahan ye; man terem kpaa ngu a kwaghfan, injakwaghfan i ortyom u Aôndo je, a fa akaa a sha won cii.

²¹ Nahan tor kaa a Yoabi er: Nenge, m gba eren kwagh ne ve; yô, za hide ase a Abesalom, wanyekwaor la.

²² Tsô Yoabi gure kuma ishigh inya, sugh, ver tor doo doo. Yoabi kaa er: Nyian, wanakiriki wou fa er i doo u a mo terem tor, sha er tor a er sha zamber u wanakiriki na yô.

²³ Nahan Yoabi mough za ken Geshur za kua a Abesalom va a na ken Yerusalem.

²⁴ Tor kaa er: A̱ yem hen ya na, a̱ de nengen a ishigh yagh ga. Nahan Abesalom nyôr hen ya na, kpa a nenge a ishigh ki tor je ga.

²⁵ Ken Iserael cii ma or kuma iwuese er Abesalom nahan ga, sha kwagh u mdooashe na; hii shin akevangahar na je zan zan due sha ityough nagh a lu a ihogholough iyol ga.

²⁶ Zum u una hondo ityough nagh yô (hanma inyom sha mbee u i a hondo ityough; gadia i yuhwa un yum, nahan a hondo ki), a kar myohom ma ice na i sha ityou, i kuma ushekel deri uhar sha ikaren i tor.

²⁷ Abesalom mar ônov mba nomso utar man wan u kwase môm, iti na er, Tamar; a lu kwase u doon ashe.

²⁸ Abesalom lu ken Yerusalem anyom kuma ahar je, kpa a nenge a ishigh ki tor ga.

²⁹ Nahan Abesalom tindi er i̱ za yila Yoabi, una tindi un hen tor, kpa a venda u van her a na; a shi a tindi kuma kwa har, kpa a venda u van.

³⁰ Nahan a kaa a mbatomov nav er: Nenge, sule u Yoabi ngu ikua a u wam, ngu a shair kimi; yô, za, za nande nen u. Tsô mbayev mba Abesalom za nande sule la.

³¹ Nahan Yoabi mough va hen ya u Abesalom va pine un er: Ka nyi mbayev ou ve nandem sule?

³² Abesalom gema kaa a Yoabi er: Nenge ase, m tindi loho her a we, mer, va heen, me tindi u hen tor, za pine un wer, inja na nan man m hir ken Geshur? Guda u ma m lu keregh zan zan nyian; yô, kam pe nengen a ishigh ki tor; aluer mea lu a ibo yô, a̱ wuam tsô.

³³ Tsô Yoabi va hen tor, va ôr un; nahan a yila Abesalom, a va hen tor, a ngurum a wa ityough inya sha ishigh ki tor; nahan tor suse Abesalom zwa.