2 Samuel 11 - ICIGHAN BIBILO

¹ Tsô sha inyom i he, sha shighe u utor ka ve zaan ityav la yô, Davidi tindi Yoabi a mbashilen un kua Iserael cii; ve za tim Mbaamon, ve za kase Raba sha utya. Kpa Davidi yô, lu ken Yerusalem.

² Tsô er iyange i bee yô, Davidi mough sha gambe na gba zenden sha tembeyough u sha u tor; a ta ashe sha tembeyough u sha la, a nenge kwase lu ôôn iyol; kwase la doo ashe tsung.

³ Tsô Davidi tindi er i̱ za pine kwagh u kwase la. Orgen kaa er: Kera ka Batesheba wan u Eliam, kwase u Uria Orhiti ne gaa?

⁴ Tsô Davidi tindi mbatyomov za kua a na; ve hen a na yô, a yav a na (gadia a sember wanger iyol na sha mlu na u wang ga la). Tsô a hide hen ya na.

⁵ Kwase la maa jile iyol; nahan a tindi Davidi loho er: M wa iyav.

⁶ Tsô Davidi tindi loho hen Yoabi, kaa er: Tindi Uria Orhiti la a̱ va her a mo. Tsô Yoabi tindi Uria va hen Davidi.

⁷ Zum u Uria va hen Davidi yô, a pine un mlu u Yoabi kua mlu u ior cii, man er ityav mbi lu yô.

⁸ Nahan Davidi gema kaa a Uria er: Za hen ya wou, za ôô angahar. Tsô Uria due hen ya u tor, i tindi un a iwua i cir un a mi ijime.

⁹ Kpa Uria tsa hen hunda u ya u tor a ior mba ter na imôngo, a za hen ya na je ga.

¹⁰ Kpa er i za kaa Davidi er: Uria za hen ya na ga yô, Davidi kaa a Uria er: Ka ken zende u za hir gaa? Man ka nyi u ze hen ya wou ga?

¹¹ Uria gema kaa a Davidi er: Areki man Iserael kua Yuda mba tsan ken atumbe; terem Yoabi man mbashilen terem mba ken afo ken toho, man mo m̱ gema m̱ yem hen ya wam, m̱ za ya kwagh m̱ ma kwagh shi m̱ tsa a kwase wama? Er u lu uma ne, m bum uma wou, mayange me er nahan ga.

¹² Nahan Davidi kaa a Uria er: Yô, nyian kpaa tsa tsô, kper me na u gbenda. Tsô Uria shi tsa hen Yerusalem sha iyange la.

¹³ Kper nan Davidi yila un, a va ya kwagh shi a ma kwagh a na imôngo, tsô a gba hunden; iyange been yô, a due a za yav sha gambe na a mbashilen ter na imôngo, kpa hen ya na yô, a za ga.

¹⁴ Tsô kper nan pepe yô, Davidi nger Yoabi washika, tindi Uria a min.

¹⁵ Ken washika shon la a nger a kaa er: Ver Uria ken hemen henpe ityav mbi hembe taver yô, hide nen ijime undu nen un, sha u i̱ wua un yô.

¹⁶ Tsô zum u Yoabi lu nengen mker u gar la yô, a ver Uria henpe a fe anomaior a mimi a lu yô.

¹⁷ Tsô ior mba ken gar la due, va nôngo ityav a Yoabi; nahan mba shilen Davidi mbagenev kpe: Uria Orhiti la kpaa kpe.

¹⁸ Nahan Yoabi tindi loho i za ôr Davidi akaa a a er ken utya cii;

¹⁹ shi a kaa ortyom la er: Zum u ú ôr tor akaa a a er ken utya cii yô,

²⁰ man aluer ishima á vihi tor, je una pine u er: Ka nyi ne nenge ityav ne mgbôghom a gar ikua ikua nahana? Ne fa er vea tile sha gilgar vea ker gaa?

²¹ Ka anti iyange nan ta Abimeleki wan u Yerubesheti? Kera lu kwase man tile sha gilgar ta un anishwa a kpe hen Tebeshi ye gaa? Inja na nan ne ze ikua ikua a gilgar nahana? Yô, Shighe la ú kaa wer, wanakiriki wou Uria, Orhiti, la kpaa, a kpe.

²² Tsô ortyom la yem za ôr Davidi kwagh u Yoabi a tindi un a mi la cii.

²³ Ortyom la za kaa a Davidi er: Ior mbala hemba se, ve due ve va kohol se ken ikôngo je, se daa ve, se za ar hen hundagar je.

²⁴ Mbakeren avaan sha gilgar ta mbayev ou; mbayev mba tor mbagenev kpe, wanakiriki wou Uria, Orhiti la kpaa, kpe.

²⁵ Tsô Davidi kaa a ortyom la er: Za kaa Yoabi nahan, wer, kwagh la a̱ de kera vihin we ishima ga, gadia sanker gbe yan tsô, sange a sange ga; yô, seer nôngon nen ityav a gar la zan zan hemba nen un; za taver un ishima nahan.

²⁶ Zum u kwase u Uria ungwa er nom na Uria kpe yô, a vaa ku u nom na.

²⁷ Er shighe u zungwen ku la bee yô, Davidi tindi i za kua a na, i va a na hen ya na, a maa a hingir kwase na, a mar un wan u nomso. Kpa kwagh u Davidi er la yô, vihi TER ishima.