2 Samuel 1 - ICIGHAN BIBILO

¹ Tsô zum u Saulu kpe kera man Davidi za wua Mbaamaleki hide yô, Davidi tsa ken Shikelagi ayange ahar;

² tsô sha iyange i sha utar la yô, orgen due ken afo hen Saulu a akondo a anden, man lu a inya sha ityou kpaa; tsô, va ar henpe Davidi lu yô, a gba inya, a gure a ta inya.

³ Tsô Davidi pine un er: U due hana? A kaa a na er: M war a war ku ken afo a Iserael.

⁴ Shi Davidi pine un er: Ka nyi i ere? Ôrom yôô. A gema a kaa er: Ior yevese ityav, mbagenev kpishi ityav wua ve, ve kpe; Saulu kua wan na Yonatan kpaa, ve kpe.

⁵ Davidi gema pine wanye u a ôr un la er: Er nan man u fe er Saulu vea wan na Yonatan ve kpe?

⁶ Tsô wanye u a kaa un nahan la, kaa er: M gba duen sha uwo u Gilboa tsô, yô, nenge, Saulu suur sha iwange na; man akekeautya man mbaanyinyav cir sha a na.

⁷ Gem ashe nengen mo yô, a yilam. M kaa mer: Een.

⁸ A kaa a mo er: Ka we ana? M gema m kaa a na mer, mo m ngu Oramaleki.

⁹ Tsô a kaa a mo er: Yô, shi va tile hen mo heen, wuam; gadia kwagh tserem man uma wam yô, ngu her doo doo je.

¹⁰ Tsô m va tile a na, m wua un, gadia m fa una kera fatyô u shi lun uma er a vande gban la ga; nahan m tôô idyer i tor i sha ityough nagh la man ihye i ken uwegh nagh m va a mi hen terem heen.

¹¹ Tsô Davidi kôr akondo a na ande; kape ior mba ve lu a na cii kpaa ve er la;

¹² ve zungwe, ve vaa, ve mem kwaghyan zan zan iyange kar been, sha ci u Saulu vea wan na Yonatan, man sha ci u ior mba TER, kua ya u Iserael kpaa; sha er ve kpe ku u ishôm yô.

¹³ Nahan Davidi pine wanye u a va ôr un la er: U ngu or u hana? A kaa er: Mo m ngu wan u shiror, or u Amaleki.

¹⁴ Tsô Davidi kaa a na er: Ka nyi u cie u zan uwegh sha u wuan or u TER, u i shigh nan mkurem la, ga?

¹⁵ Nahan Davidi yila wanye ugen, kaa er: Kporom, ta sha a na. Tsô a gber un je maa a kpe.

¹⁶ Davidi kaa a na er: Ike i awambe ou i̱ hide sha ityough you, gadia ka zwa wou je u pase u ye, er u kaa wer: M wua or u TER, u i shigh nan mkurem yô.

¹⁷ Nahan Davidi gber kwelegh ne, ter Saulu man wan na Yonatan.

¹⁸ Shi a kaa er ve̱ tese ônov mba Yuda icam i ada; nenge, i nger i ken ruamabera u Yashar.

¹⁹ I wua icivir you sha ajiir a ou a taven sha Iserael! Anomaior gba je!

²⁰ De kera ôron kwagh la ken Gati ga, de kera yôôn un sha igbenda i Ashekelon kpaa ga, sha er ônkasev mba Mbafiliti ve̱ de ember ga, Sha er ônkasev mba mbaipusuv ve̱ de kera geren ga yô.

²¹ Ne iwo i Gilboa, avure shin ura ve̱ de kera luun sha a ven ga, shin ajiir a nan nagh kpaa ga. Gadia ka sha her man i ta perutya u anomaior kera ye, perutya u Saulu, i shighe u mkurem ga.

²² Sha awambe a mba i woo ve man sha ahôm a anomaior, ada u Yonatan hide ijime ga; sanker u Saulu kpaa hide gbilin ga.

²³ Saulu vea Yonatan ka mbadoonshima man mbasarenior kpaa, sha ayange a ve lu uma la, man ken ku kpaa ve pav ga; ve hemba ugafa kpaver, shi ve hemba begha agee kpaa.

²⁴ Ne ônkasev mba Iserael vaa nen Saulu, un u a woho ne iyol sha akondo a nyian dindee, u a er hwe sha zenaria sha akondo a en.

²⁵ Anomaior gba ken atô u utya je! I wua Yonatan sha ajiir a ou a taven sha.

²⁶ Ican tsulem ken ishima sha ci wou anngôm, Yonatan; u doom tsung; dooshima wou la kam kwagh u kpilighyol, hemba dooshima u ukase.

²⁷ Anomaior gba je! Ikav mbi utyav kpaa saa ishe!