2 Mbakorinte 9 - ICIGHAN BIBILO

¹ Sha kwagh u iwasen i sha ci u uicighanmbaiorov la yô, kera gbam u ngeren ne kwagh sha mi ga,

² gadia m fa er ne ver ishima yô, m ta ihagh sha ven hen mba ken Masedonia mer, Akaya kohol iyol ver a ver inyom i i kar la je; ken ve yô, mba ishima i veren yen ne i nder ve, ve hemba ngeen.

³ Kpa m ngu tindin anmgbianev mban sha u ihagh i se te ven la i̱ de gbe gbilin sha kwagh ne ga, sha u né lu a iyol i kohol er m vande kaan nahan la.

⁴ Aluer Mbamasedonia mbagenev vea va a mo imôngo yô, ve̱ de kohol ne a iyol i kohol ga ze, á lu nahan yô, sé gema sé ya kunya sha ishimaveren yase; ne je yô, kera ka kwagh u kaan a kaa ga.

⁵ Nahan yô m nenge doo u wan anmgbianev mban kwagh mer, ve̱ vande zan ken a ven ve̱ sôr iwua i ne tende zwa la ve̱ ver a ver je, i̱ lu her, i̱ lu iwua i sha ishima yen, i̱ de lu kwagh u i ngohol sha apera ga.

⁶ Umbur nen kwagh ne, or u tangen iyol lôôn cuku yô, ka di cuku je nana sunda ye, kpa or u nan lee wuee yô, nana sunda di wuee je.

⁷ Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.

⁸ Aôndo fatyô u nan ne mrumun u sha mhôôn cii wuee, sha u hanma shighe né lu a hanma kwagh á kuma sha hanma gbenda cii man shi né na kwagh wuee sha hanma tom u dedoo yô.

⁹ Kape i nger kpaa la er: Nan samber kwagh wuee, nan na mbaibanave, perapera u nan una lu gbem sha won je.

¹⁰ Un u A ne ortanivor la ivor, shi A lu nan bredi sha ci u kwaghyan la yô, Una na ne ivor i tan, Una seer i, shi Una seer atam a perapera wen kpaa,

¹¹ né lu a kwagh ave sha ci u nan hanma iwua gengee gengee, sha tom wase ne, á hingir u wuese Aôndo sha mi.

¹² Gadia tom u wasen a wase ne ka u wasen sha ugbayol mba uicighanmbaiorov tseegh ga, ngu nan er i̱ wuese Aôndo kpishi kpaa.

¹³ Sha ikav i tesen i tom ne yô, mba civir Aôndo sha ci u ne we iko ne rumun Loho u Dedoo u Kristu man sha ci u ne kar kwar a ve gengee gengee man a mbagenev cii kpaa.

¹⁴ Ka saren ve a ven, mba eren msen sha ci wen kpaa, sha ci u mrumun u sha mhôôn u Aôndo u a ngee ken ven yum la.

¹⁵ I̱ wuese Aôndo sha ci u iwua Na i i gande u ôron la.