2 Mbakorinte 7 - ICIGHAN BIBILO

¹ Nahan yô, ne mbadoon mo ishima, er se lu a uityendezwa mban yô, se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.

² Na nen se ian ken asema a en. Se er ma or kwaghbo ga. Se vihi ma or kwagh ga, se ya mtsera sha ma or sha icugh kpaa ga.

³ M ngu ôron nahan kpaa ka u nan ne ibo ga, gadia m vande kaan ne mer, né mba se ken ishima je kuma u sé kpe imôngo shi kuma u sé lu uma imôngo kpaa.

⁴ M ngu a vangertiôr kpishi, ne mba ihagh i tan yam kpishi kpaa. M mgbough a ishimasurun, iember yam kpaa i ngee gande ken atsan a am cii.

⁵ Gadia zum u se va nyôr ken Masedonia yô, iyol yase zua a ma mmem ga, se ya ican sha hanma kwagh cii: ken won yô, lu num, ken vanger yô gema lu mciem.

⁶ Kpa Aôndo u A surun mba ve hir ayol a ve ijime la asema yô, A sur se ishima sha mve u Titu.

⁷ Lu sha mve na tseegh ga kpa lu sha ishimasurun i ne sur un ishima la, gadia a va ôr se er i hange ne a vese man er ne lu zungwen man er ne lu a ishima i tseen sha kwagh wase, nahan m hemba ember cii.

⁸ Gadia er m ne ne ishima i vihin sha washika wam la nahan kpaa, vihim ga shin er i vande vihin mo nahan kpaa; gadia m nenge washika la vihi ne kpa lu ayange kpuaa tsô.

⁹ Hegen yô m ngu ember ka sha ci u ishima i vihi ne la ga, kpa ka sha ci u ishima i vihi ne, ne gem ishima yô, gadia ishima vihi ne sha inja i Aôndo A ne la, nahan se er, kwagh saa ne a saa ga.

¹⁰ Gadia ishima i vihin i i dugh her Aôndo ka i na mgemshima u zan ken myom u á kera vaa afanyô sha mi ga yô, kpa ishima i vihin i tar ne yô i ne ku je.

¹¹ Gayô nenge imbaishima i veren i ken ven ne, ka ishima i vihin i i dugh her Aôndo la i ne ne i ye, man shi iyolpalegh man mvihi u kwagh a vihi ne ishima la man mciem, man gbashima man ishima i tseen man mtsaha u nan cii. Gadia sha hanma gbenda cii ne tese er ne lu a ibo sha kwagh ne ga yô.

¹² Nahan m nger ne kpa lu sha ci u un u a er kwaghbo la ga, shin sha ci u or u i er un kwaghbo la kpaa ga, kpa lu sha u ma i tese ishimaveren yen sha kwagh wase gbar gbar sha ishigh ki Aôndo.

¹³ Ka sha ci u nahan man i taver se ishima ye. Man ken ishimasurun yase la se hemba ember sha ci u iember i Titu, gadia ne cii ne yôhôl un ishima.

¹⁴ Gadia aluer se ta ihagh sha kwagh wen sha ato na kpaa, m va ahenge ga gadia er hanma kwagh u se ôr ne la a lu mimi nahan yô, kape ihagh i se ta sha ato a Titu kpaa i lu mimi la.

¹⁵ Ka una umbur iko yen i wan man shi er ne ngohol un a mciem man ikarikase iyol yô, ishima na i hemba lun sha a ven cii.

¹⁶ M ember gadia ishima i kera nyian mo sha kwagh wen ga.