2 Mbakorinte 11 - ICIGHAN BIBILO

¹ Kpash, ma ne we ishima a anibume wam ne tsô; een, wa nen ishima a mo!

² Gadia m ngu a ishima i tseen sha kwagh wen je, ka imbashima i tseen i Aôndo la, m ver ne sha ci u nom môm sha u me na ne hen Kristu er ka iniunkwase i lun wang nahan.

³ Kpa m ngu cian mer, alaghga á va vihi mbamhen enev né undu mlu u mimi [man u wang] u ken Kristu la er iyô mee Ifa sha atseregh a i nahan.

⁴ Gadia aluer orgen nana va nana va pase kwagh u Yesu ugen kposo, ka u se vande pasen ne un la ga, shin aluer ne ngohol jijingi ugen kposo, ka u ne vande ngohol la ga, shin né ngohol ivangeli igen kposo, ka i ne vande ngohol la ga yô, kpa ne gba rumun tsô.

⁵ M hen mer m yina sha uihembanmbaapostoli mban je ga.

⁶ Aluer mea lu or u fan kwaghôron ga kpaa, sha kwaghfan yô, m yina ga. M pase ne nahan gbar gbar je sha hanma gbenda cii ken hanma kwagh kpaa.

⁷ Er m hide a iyol yam ijime sha u i̱ kende ne sha, m ôr ne Loho u Dedoo u Aôndo gbilin, nahan m er ka kwaghbo shinii?

⁸ M tsuwe iniongo i Kristu igen kwagh, m ngohol injar hen ve sha u me er ne tom yô.

⁹ Zum u m lu a ven man kwagh gbam kpaa, m za ma or iyol ga, gadia anmgbianev mba ve za va ken Masedonia la ve wasem sha ugbayol av. M kura iyol yam sha hanma kwagh cii sha u me hingir ne ikav mbi yuhwan ga yô, shi me kura iyol yam nahan kpaa.

¹⁰ Er mimi u Kristu a lu hen a mo ne yô, ihagh yam i tan ne ia bundem ken avegher a Akaya ga.

¹¹ Ka sha ci u nyi? Ka sha ci u ne doom ishima gaa? Aôndo kpaa fa.

¹² Kwagh u m lu eren yô, me eren her, sha u me bunde ian i mba ve keren ian sha u vea lu er se nahan vough sha kwagh u ve lu tan ihagh sha mi la.

¹³ Ambaaior la yô, ka mbaapostoli mba aiev, ka mbatomov mba icughuv, ka ve gema ayol a ve er ka mbaapostoli mba Kristu nahan.

¹⁴ Kwagh ne kpaa ka kwagh u kpiligh iyol ga, gadia Satan je kpaa ka a gema iyol na er ka ortyom u iwanger nahan.

¹⁵ Nahan aluer mbatyomov nav kpaa vea gema ayol a ve er ka mbatyomov mba perapera yô, ka kwagh u kpiligh iyol ga. Kpa mkur ve yô, una lu vough er aeren a ve nahan.

¹⁶ M shi m ngu kaan mer ma or nana̱ de kera nengen er mo m bum ga, gayô, gba rumun nen mo er ka ibumeor nahan tsô, mo kpaa, m shi ta ihagh kpuaa yôô.

¹⁷ Kwagh u m lu ôron ne yô, ka ken Ter m lu ôron ga kpa ka er ka ibumegh nahan, ka sha u tan ihagh vangertiôr je.

¹⁸ Er mbagenev kpishi ve lu tan ihagh sha inja i iyolough yô, mo kpaa me ta ihagh,

¹⁹ gadia ne mba wan ishima a abumeaior saan saan je er ne lu mbafankwagh yum yô.

²⁰ Gayô ne mba wan ishima aluer or nana kôr ne ne lu ikpan, shin aluer or nana ya ne akaa, shin aluer or nana bume ne, shin aluer or nana gengese iyol, shin aluer or nana gbidye ne sha ishi yô.

²¹ Me gba pasen kunya wam tsô, se se yina sha kwagh la. Nahan kpaa aluer or nana cihi kwagh yô,—m gbe ôron er ka sha ibume nahan tsô—mo kpaa me cihi.

²² Ve ka Mbaheberu? Mo kpaa ka nahan. Ve ka Mbaiseraele? Mo kpaa ka nahan. Ve ka tsombor u Aberahama? Mo kpaa ka nahan.

²³ Ve ka mbatomov mba Kristu? M gbe ôron er ka orihundu nahan tsô,—m hemba je. Sha tom u eren sha ican kpaa m hemba, sha gaadi u nyôron kpaa m hemba, sha ugbidi yô, gande u ôron, sha iku i waren kpaa kwa imôngo.

²⁴ Mbayuda gbidyem akpa yina môm u lun kwa akunduahar, kuma acin ataan je.

²⁵ I gbidyem sha kwagir acin atar, i tam awen icin i môm, tso ur a mo acin atar, m shi sha kwavmnger hen iv, m tsa her kpaa.

²⁶ M zende ijende kpishi, m war ku shin uifi, m war ku hen mbanumungbenda, m war ku hen ityô yam, m war ku hen atôatyev kpaa, m war ku ken gar man ken ikôngo kpaa, m war ku shin zegemnger shi m war ku hen anmgbianev mba aiev kpaa.

²⁷ M lu eren tom sha ican, m eren tom tsung je, m tsa per ayange imôngo, m luun ijen, imura kpaa kôron mo, ashighe agen kwaghyan lum ga, wuhe lu kôron mo, m lu idyelegh kpaa.

²⁸ Man ka akaa ne tseegh ga, ishima i nyian i sha iniongo i Kristu cii ngi va tan sha a mo use use.

²⁹ Ka an nan lu isheer man mo m lu isheer ga? Ka an nan nenge gbev man i vihim ga?

³⁰ Aluer a gba u tan ihagh keng yô, me ta ihagh sha isheer yam.

³¹ Aôndo Ter u Ter Yesu Kristu u i wuese Un gbem sha won ne, A fa er i lu aie m eren ga yô.

³² Ken Damaseku or u nengen tor Areta sha gar kura gar u Damaseku sha u kôron mo,

³³ kpa i due a mo ken ian i sha gilgar i shirigh a mo shin ikese ve m war sha ikev na ye.