2 Mbakorinte 1 - ICIGHAN BIBILO

¹ Paulu, apostoli u Kristu Yesu u sha ishima i Aôndo man Timoteu anmgbian, mba sughun nongo u Kristu u Aôndo u u lu ken Korinte la kua uicighanmbaiorov mba ve lu ken Akaya cii.

² Mrumun u sha mhôôn a̱ lu sha a ven man bem mba ve dugh her Aôndo man shi hen Ter Yesu Kristu la.

³ I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii,

⁴ Un u A surun se asema sha atsan a ase cii sha er se kpaa se fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la.

⁵ Gadia er atsan a Kristu a ngee ken vese yô, kape ishimasurun yase kpaa i ngee sha Yesu Kristu je la.

⁶ Aluer se mba yan ican kpaa, ka sha u i̱ sur ne asema yô, man ka sha ci u myom wen kpaa. Aluer mba surun se ishima kpaa, ka sha ci u ishimasurun i i lu nan ne u ne̱ taver ishima a atsan a se kpaa se lu yan la.

⁷ Ishimaverenkeghen yase sha a ven ngi taveraa gadia se fa, er ne nyer nongo ken atsan a yan nahan yô, kape shi né nyôr nongo ken ishimasurun kpaa la.

⁸ Gadia anmgbianev, sar se pe ma ne lan atsan a a tser se ken Ashia la ga, i kighir se je gande, hemba agee ase ken inya je, se kera fa mwar wase ga.

⁹ Se yô, i lu se je er i ôr se ijir i kuugh kera ve yô, lu sha u se̱ de suur sha ayol a ase ga, kpa se̱ suur sha Aôndo u A nderen mbakpenev la.

¹⁰ Un u A yima se sha imbaku i vesen ne shi Una yima se kpaa la, ka sha a Na je se veren ishima se lu keghen ser, shi Una yima se kpaa ye.

¹¹ Ne kpaa ne mba wasen se sha mbamsen enev mba ne sen sha ci wase la, sha u ior kpishi vea naan ishughun sha ci wase tsung sha ci u mrumun u sha mhôôn u i ne se la.

¹² Gadia ihagh yase yô, ka i ne, ka shiada u imo i ken ishima yase, er se lu zenden ken tar, jim je yô lu hen a ven, lu sha icighanmlu man mimi u Aôndo lu sha mfe u iyolough ga, kpa lu sha mrumun u sha mhôôn u Aôndo je.

¹³ Gadia se mba ngeren ne kwagh ugen ga, saa kwagh u ne lu ôron kaven kpaa la. M ngu veren ishima mer né kav, né bee cii,

¹⁴ di er ne vande kaven kpuaa ner: se mba ihagh yen vough er ne kpaa ne lu i yase nahan sha iyange i Ter wase Yesu la.

¹⁵ Er m fe kwagh ne dedoo nahan yô, kera je kpaa m wa ken ishima u vanden van hen ven sha u né shi né zua a iember i sha kwa har yô.

¹⁶ Ma m kar ken ven ma m ze Masedonia, shi ma m mough ken Masedonia ma m hir ken a ven, ne ma ne wem ikav u zan ken Yudia ye.

¹⁷ Er m we ishima nahan yô, lu sha beer tsô zee? Shin akaa a m we ishima mer me er la, m gba wan ishima sha inja i iyolough tsô, “een” wam kua “ei” hingir kwagh môm zee?

¹⁸ Aôndo ka u jighjigh, kwaghôron wase a ven lu “een” vea “ei” imôngo ga.

¹⁹ Gadia Yesu Kristu Wan u Aôndo u se ôr ne kwagh Na la lu mo man Siluanu man Timoteu, lu “een” vea “ei” imôngo ga, kpa ken a Na yô, lu “een” vough.

²⁰ Gadia uityendezwa mba Aôndo cii, ken A Na yô, ka “een” ka nahan man se rumun amen ken a Na sha ci u icivir i Aôndo ye.

²¹ Un u A ver se ken Kristu a ven imôngo shi A shigh se mkurem kpaa yô, ka Aôndo.

²² Ka Un kpaa A ver se ikav shi A ne se ibumun ken asema ase ye, ka Jijingi je la.

²³ Kpa m ngu yilan Aôndo shiada sha uma wam mer, ka sha u yiman ne a yima je m kera ve ken Korinte ga ye.

²⁴ Ka er se mba yan tor sha kwagh u jighjigh wen u nan ga, kpa se mba eren tom a ven imôngo sha ci u né ember yô, gadia ka sha jighjigh u nan man ne til taveraa ye.