2 Kroniku 9 - ICIGHAN BIBILO

¹ Zum u torkwase u Sekeba ungwa gwa u Solomon yô, a va u va karen Solomon sha mbampin mba cimin ken Yerusalem, a va a ior mba va veren un kpishi, man urakumi mba tôôn ilyôghonov man zenaria kpishi, kua awen a injaa; zum u a va hen Solomon yô, a ôr akaa a a lu un ken ishima cii.

² Solomon pase un akaa a a pine un la cii; ma kwagh hemba Solomon u pasen un ga.

³ Tsô er torkwase u Sekeba nenge kwaghfan u Solomon, kua iyou i a maa la,

⁴ man kwaghyan u sha tebul na, man injamtem i mbayev nav, man injamtil i mbatomov nav, kua akondo a ve a iyolough, man mbanan un kwaghman kua akondo a ve a iyolough, kua agbur a na a a unden sha mi zan sha iyou i TER yô, kondo un iyol gbong.

⁵ Tsô a kaa a tor er: Gwa u m ongo ken tar wam sha akaa a ou kua mfe wou yô, ka mimi.

⁶ Nahan kpaa m na jighjigh sha kwaghôron ve ga, zan zan m va nenge sha ashe am ne; man nenge, kwaghfan wou u hemban ne, vegher na tsô kpaa i ôrom ga; u gande gwa u m ongo yô.

⁷ Saan ior ou iyol, saan mbayev ou mban iyol, mba ve til sha ishigh you gbem, ve ongo kwaghfan wou ne.

⁸ I̱ wuese TER, Aôndo wou, u u doo Un ishima, A ver u sha ikônough Nagh ki torough er u̱ tema tor sha ci u TER, Aôndo wou; ka er Iserael a doo Aôndo wou ishima, er Una ver ve ve̱ lu gbem yô, ka nahan man A ver u tor sha a ve er u̱ ôron ijir, shi u̱ eren perapera kpaa ye.

⁹ Tsô a na tor zenaria kuma utalenti deri man ikundu, man ilyôghonov kpishi, man awen a injaa; mayange ilyôghonov mbi a ngee er torkwase u Sekeba va na tor Solomon la nahan ga.

¹⁰ Mbayev mba Huram kpaa man mbayev mba Solomon mba ve za tôô zenaria hen Ofir la, ve va a ikon i sandal man awen a injaa kpaa.

¹¹ Tor er agbur a unden zan sha iyou i TER kua sha iyou i tor kpaa sha ikon i sandal la, kua umolo man mbaadiguve sha ci u mbawanatsam, mayange i lu a vande nengen a anza la nahan ken tar u Yuda ga.

¹² Tor Solomon na torkwase u Sekeba akaa a a sar un cii, hanma kwagh u a sôn yô; gema hemba kwagh u un va na tor la cii. Tsô a mough a yem hen tar na, un a ior nav.

¹³ Myohom ma zenaria ma Solomon a zua a mi sha inyom i môm yô, lu zenaria kuma utalenti deri ataratar man akunduatar kar ataratar;

¹⁴ i ôr kwagh u mbazendenkpenga man mbateenkasua hen ityôinya ve zua a mi la, ga; utor mba Arabia cii kua ugomna mba ken tar na kpaa ve va naan Solomon zenaria man azurfa.

¹⁵ Tsô tor Solomon var iperutya deri uhar sha zenaria, a vihi zenaria kuma ushekel deri ataratar sha hanma perutya.

¹⁶ Shi a var akuvautya kpaa deri sha zenaria, a vihi zenaria kuma ushekel deri utar sha hanma akuvautya; tor ver ve ken Iyou i Ikô i Lebanon.

¹⁷ Man shi tor er zegeikôn u tor sha anyi a nortar, a cir un zenaria u wang iyol.

¹⁸ Agbur a unden sha ikônough ki torough kila lu ataratar, ijiir i pendan angahar kpaa lu, i er i sha zenaria, i zua i sha ikônough ki torough kila, man i gema i wa un igyar i kôron ave sha mi, vegher ne, man vegher la, henpe teman la; ubegha uhar tile hen igyar i kôron ave sha mi la;

¹⁹ ubegha pue kar uhar tile sha agbur a unden ataratar ken imbusu ne man ngila kpaa; mayange je i er kwagh nahan ken ma tartor ugen ga.

²⁰ Ayongo a man kwagh a mi a tor Solomon cii lu a zenaria; ikav mbi ken Iyou i Ikô i Lebanon cii kpaa, lu mbi zenaria u wang; azurfa yô, lu kwagh u ikoogh sha ayange a Solomon la ga.

²¹ Gadia tor lu a utso mba ve zaan hen Tarshishi a ior mba Huram imôngo; anyom a kuman atar yô, utso mba Tarshishi ve va kwa môm, ve va a zenaria man azurfa man anyi a nortar man ikarakya kua upikoki.

²² Kape tor Solomon hemba utor mba sha won cii inyaregh kua kwaghfan la.

²³ Utor mba sha won cii sar ve u nengen a Solomon sha u ungwan kwaghfan na u Aôndo A na un ken ishima la.

²⁴ Hanmô ve nan lu van a iwua i nan, lu ikav mbi i er sha azurfa, man mbi sha zenaria, man akondo, man ikav mbi utyav, man ilyôghonov, man anyinya kua mbaalfadari, anyom anyom.

²⁵ Solomon lu a atôranyinya dubu unyiin man akekeautya man mbaanyinyav dubu pue kar uhar; a ver ve sha agar a akekeautya a lu ker yô, kua hen tor ken Yerusalem kpaa.

²⁶ A tema tor sha utor cii, hii hen ifi u Uferati zan zan za ar hen tar u Mbafiliti, za kighir hen kpe u Igipiti kpaa.

²⁷ Tor er azurfa ngee hingir er awen nahan ken Yerusalem, ikon i sedar kpaa ngee hingir er ikon i tur i shin pev, ngee je, gande u ôron.

²⁸ I za vaan Solomon a anyinya ken Igipiti kua ken ityar igen cii.

²⁹ Aerenakaa a Solomon agen, a hiihii man a masetyô cii, i nger a ken akaaôron a profeti Natan man ken kwaghôron u profeti u Ahiya Orshilon, kua sha mbampase mba Ido, or u nengen akaa sha kwagh u Yerobiam wan u Nebati la, gaa?

³⁰ Solomon tema tor ken Yerusalem sha Iserael cii anyom akunduahar.

³¹ Tsô Solomon yav a uter nav imôngo, i ii un ken gar u ter na Davidi; wan na Rehobiam tema tor sha ityough nagh.