2 Kroniku 8 - ICIGHAN BIBILO

¹ Tsô anyom ikundu a Solomon maa iyou i TER kua iyou na iyol na la, nga kar yô,

² Solomon maa agar a Huram na un la, a ver Mbaiserael tema ken a.

³ Nahan Solomon za hen Hamatisoba, a za hemba un.

⁴ A maa Tademor ken ikôngo, kua agar a ombon iyiav ker, a a maa ken Hamati la cii.

⁵ Shi a maa Bete-horon u Sha kua Bete-horon u Shin, agar a utya a lun a ugir kua ihinda i lun a uishindan,

⁶ shi a maa Baalati, man agar a ombon iyiav ker, a Solomon lu a mi la cii, man agar a akekeautya na cii, man agar a mbaanyinyav nav, man akaa a a sar Solomon u maan a cii ken Yerusalem man ken Lebanon, kua ken tar u a lu tor sha mi cii.

⁷ Asande a ior a Mbahiti man Mbaamor man Mbaperishi man Mbahivi man Mbayebushi a a shi her cii, mba ve lu Mbaiserael ga la;

⁸ ônov vev mba ve shi ken ijime ve ken tar la, mba Mbaiserael tim ve ga la, Solomon kighir ve a tom zan zan nyian.

⁹ Kpa Mbaiserael yô, Solomon kighir ve sha u ve̱ eren un tom u kpan ga; kpa ve lu mbautyav man ukur mba mbautyav nav mba hemban, man mbahemenev mba nengen sha akeke a na a utya kua sha mbaanyinyav nav.

¹⁰ Mban lu mbavesen mba sha tom u tor Solomon, ve lu ior deri uhar man akunduahargber, mba ve lu nengen sha ior.

¹¹ Tsô Solomon dugh Wanfarao ken gar u Davidi za wa un ken iyou i a maa un la; gadia a kaa er: Kwase wam una tema ken iyou i Davidi, tor u Iserael ga, gadia ijiir i areki u Aôndo a nyer her la, hingir icighanjiir.

¹² Tsô Solomon na TER iniav mbi nanden sha atse a TER a nanden nagh sha mi a a ta sha ishigh ki puadwer la;

¹³ i gba nan nagh vough er i ver sha hanma iyange nahan, sha imo i Mose, ka sha ayange a memen man sha ayange a iwer i he, man sha uiniongo mba i ver sha hanma inyom kwa tar yô; ka sha iniongo i bredi u i we kwa sha mi ga, man iniongo i ulahadi, kua iniongo i atumbe.

¹⁴ Sha imo i ter na Davidi yô, a ver upristi sha iniongo iniongo sha ityom ve, man Mbalevi di kpaa sha i ve, sha u ve̱ wuese TER, ve̱ eren tom sha ishigh ki upristi er i ver sha hanma iyange nahan; mbakuranhunda kpaa, i ver ve sha iniongo iniongo, sha hanma hunda; gadia kape Davidi, or u Aôndo, kaa la.

¹⁵ I undu imo i tor sha kwagh u upristi man Mbalevi sha ma kwagh ga, shin sha kwagh u ayou a koson akaa ker kpaa ga.

¹⁶ Kape i er tom u Solomon cii, hii sha iyange i timin imagh ki iyou i TER la je, zan zan iyange i i kar kuren i. Kape i kure tom u iyou i TER cii la.

¹⁷ Tsô Solomon za hen Eshion-geber kua hen Eloti kpaa, hen kpe u zegemnger ken tar u Edom.

¹⁸ Huram tindi un a utso sha ikev i mbayev nav kua mbatomov mba ve fa kwagh u zegemnger yô; ve va a mbayev mba Solomon imôngo hen Ofir, ve za kura zenaria keregh, kuma utalenti deri unyiin man akunduahargber, ve va na tor Solomon.