2 Kroniku 4 - ICIGHAN BIBILO

¹ Shi a er atse a nanden nagh sha mi a togula; ilihen i a lu aseva ikundu, igbanger i a kpaa aseva ikundu, ityaven i a lu aseva pue.

² A shi a er zegetasa u haan mngerem shimi, a ker un a ker, hii hen kur ne za ar ken ngula lu aseva pue, á lu gbilititi, ityaven na lu aseva ataan; kor u lihen aseva ikundugber a fatyô u kasen un yisan.

³ I er ieev mbi abua shin ityô na la, kase yisa kuma aseva pue je, a kase zegetasa u mnger la a tser. Abua la lu iniongo ihiar, i ker a, lu kwagh môm a zegetasa u mnger la.

⁴ A tema sha abua pue kar ahar, atar ver ishigh ken imbusutarimese, atar ver ishigh shin ityôtar, atar ver ishigh ken imbusutariyan, man atar di ver ishigh sha ityoughkitaregh; i ver zegetasa la sha a, a zua atô kimi cii.

⁵ A civir er ikevwe nahan, kur na la lu er kur u iyongo er imondon u loho nahan; a ivin sha ubav dubu utar.

⁶ A er utasa mba ôôn akaa shimi pue, a ver utaan ken uwegh ku yanegh, shi utaan ken imese, sha ci u ôôn akaa shimi, i ôôn akaa a iniav mbi nanden shimi; kpa zegetasa u mnger la yô, lu sha ci u upristi ve̱ ôôn iyol shimi.

⁷ Shi a er udaarmbaamengerev mba sha zenaria pue, vough er i tese er i̱ er ve la; a ver ve ken tempel, mba utaan ken uwegh ku yanegh, shi mba utaan ken imese.

⁸ Shi a er utebul pue, a ver ve ken tempel, mba utaan ken uwegh ku yanegh shi mba utaan ken imese. Shi a er utasa mba zenaria deri.

⁹ Man a shi a er tembe u upristi, man zegetembe u gbanger la, man ucivir sha ci u tembe, a cir ucivir mba i togula iyol.

¹⁰ A ver zegetasa u mnger la, lu iyou la vegher u ken uwegh ku yanegh, vegher u sha ityoughkitaregh, gema ver ishigh ken imbusutariyan.

¹¹ Huram er ityev man ushebul kua atasa. Kape Huram kure tom, u a er sha ci u tor Solomon ken iyou i Aôndo la;

¹² mtôm ma mhar, man adôôr a uindyuruku mba uhar mba ve lu sha ityouv mbi mtôm mara, man ukper uhar sha ci u cirin adôôr ahar a uindyuruku mba ve lu sha ityouv mbi mtô la,

¹³ man upomegraneti deri unyiin sha ci u ukper mba uhar mbala, upomegraneti iniongo ihiar sha ci u hanma kper, sha ci u cirin adôôr ahar a uindyuruku mba ve lu sha ityouv mbi mtô la.

¹⁴ A shi a er asange, man a er atasa a ôôn akaa shimi sha asange la,

¹⁵ man zegetasa u mnger môm, man abua pue kar ahar shin ityô na.

¹⁶ Ityev kpaa man ushebul man iyôv mbi dughun inyam kua ikav vev cii, Huramabi er tor Solomon mbi sha togula u engem sha ci u iyou i TER.

¹⁷ Ka hen gbulumaa u Yordan hen inya i tiher tor ker mbi ye, hen harga u Sukoti vea Sereda.

¹⁸ Kape Solomon er ikav mbila kpishi la, gadia myohom ma togula gande u karen.

¹⁹ Solomon er ikav mbi ken iyou i Aôndo cii, atse a nanden nagh sha mi a zenaria, man utebul mba ve lu a ubredi mba sha ishi sha mi la;

²⁰ man udaarmbaamengerev a amenger a ve, sha u a̱ yeghen sha ishigh ki kpar u kimi la, vough er i tese er i̱ er ve la, a er ve sha zenaria u wang;

²¹ uimondon kua amenger man akambe, lu sha zenaria cii, ka zenaria u wang je;

²² man akambe a sôron amenger a min man utasa man mbaahwa kua ugbande mba usuv, sha zenaria u wang. Sha kwagh u hunda u nyôron ken iyou yô, ucivir mba ken atô u i, sha ci u icighanjiir i hemban cii la, man ucivir mba kpoyou u vesen u tempel la, lu sha zenaria cii.