2 Kroniku 36 - ICIGHAN BIBILO

¹ Tsô ior mba hen tar la, tôô Yehoahashi wan u Yoshia, ve ver un tor sha ityough ki ter na ken Yerusalem.

² Yehoahashi lu anyom ikundu kar atar zum u a ya tor la; a tema tor ken Yerusalem iwer itiar.

³ Kpa tor u Igipiti va dugh un tor ken Yerusalem, a ya tar la zwajirigh sha azurfa utalenti deri man zenaria utalenti môm.

⁴ Tsô tor u Igipiti gema ver anngô na Eliakim tor sha Yuda man Yerusalem, a gema un iti er Yehoyakim. Neko kua a anngô na Yehoahashi, yem a na ken Igipiti.

⁵ Yehoyakim lu anyom ikundu kar ataan zum u a ya tor la; a tema tor ken Yerusalem anyom pue kar môm; a er ifer sha ishigh ki TER, Aôndo na.

⁶ Tsô Nebukadinesar tor u Babilon mough ityav a na, va kange un sha mshir er una yem a na ken Babilon.

⁷ Nebukadinesar kura ikav mbigenev ken iyou i TER, yem a mbi ken Babilon, za ver ken tempel na, ken Babilon.

⁸ Aerenakaa a Yehoyakim agen, man akaahôngorough a a er, man ifer i i zough a mi ken a na kpaa, nenge, i nger a ken ruamabera u utor mba Iserael man mba Yuda; tsô wan na Yehoyakin gema tema tor sha ityough nagh.

⁹ Yehoyakin lu anyom pue kar anigheni zum u a ya tor la; a tema tor ken Yerusalem iwer itiar man ayange pue; a eren ifer sha ishigh ki TER.

¹⁰ Er inyom i he i kom yô, tor Nebukadinesar tindi er i̱ va a na ken Babilon, kua ikav mbi dedoo mbi iyou i TER la kpaa; a gema a ver anngô na Sedekia tor sha Yuda man Yerusalem.

¹¹ Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm;

¹² a eren ifer sha ishigh ki TER, Aôndo na; a hide a iyol na ijime sha ishigh ki profeti Yeremia ga, un u a ôron kwaghôron u TER la.

¹³ Man a hendan a tor Nebukadinesar kpaa, u lu na un bum iti i Aôndo la; a nômbo ikôl, a cighir ishima, a kera hide hen TER, Aôndo u Iserael, ga.

¹⁴ Upristi mba vesen cii kua ior kpaa, ve per atindi kpishi sha akaahôngorough a atôatyev la cii; ve hôngor a iyou i TER, i A tsegha ken Yerusalem la.

¹⁵ Tsô TER, Aôndo u uter vev, tindi mbatyomov Nav her a ve tugh man tetan sha u wan ve kwagh, sha ci u mhôônom lu kôron Un a ior Nav kua ijiir Na i teman kpaa yô;

¹⁶ kpa ve gema ve se mbatyomov mba Aôndo, ve laha kwaghôron Na, ve nenge sha uprofeti Nav kpenenene, zan zan iyugh i TER mough sha ior Nav je gbenda u vea war kera lu ga.

¹⁷ Nahan yô, A va ve a tor u Mbakaldi, a va wua ve mbayevikaior sha sanker, ken icighanjiir ve; mhôônom tsô kpa, kôr un a ma wanyekwaor ga, shin iniunkwase, shin tamenor, shin tseor u kumbur kumbur kpaa ga; A na ve sha ikev na cii.

¹⁸ Ikav mbi ken iyou i Aôndo cii, mbi vesen man mbi kiriki man inyarev mbi ken iyou i TER, man inyarev mbi tor man mbi atiator na, a va a mbi ken Babilon cii.

¹⁹ Tsô ve nande iyou i Aôndo sha usu, ve yôhôl gilgar u Yerusalem, ve nande ayou a tor a ker cii sha usu, ikav mbi doon cii, ve vihi mbi kera.

²⁰ Man mba ve war sanker yô, a yem a ve uikangen ken Babilon; ve hingir ikpan na kua i ônov nav kpaa zan zan sha ayange a tor u Pershia je;

²¹ sha u kwaghôron u TER u Yeremia lu ôr la, a̱ kure sha mi vough, zan zan tar la zua a mmem sha ayange a memen a u, gadia shighe u u hingir ice la yô, u mem zan zan anyom akunduatargber kar ivin.

²² Tsô sha inyom i hiihii i Shirushi tor u Pershia la, sha er kwaghôron u TER u Yeremia lu ôr la a̱ kure sha mi vough yô, TER tor jijingi u Shirushi tor u Pershia ityô, nahan a yôô ken tar na cii, shi i nger a nger kpaa er:

²³ Shirushi tor u Pershia ngu kaan nahan er: TER, Aôndo u Sha, nam ityartor i sha won cii, man A kaa er, M̱ maa Un iyou ken Yerusalem u a lu ken Yuda la. Yô, hanmô wen u nan lu u ken ior Nav cii yô, TER, Aôndo u nan, A̱ lu a nan, nana̱ mough, nana̱ yem keregh.