2 Kroniku 35 - ICIGHAN BIBILO

¹ Tsô Yoshia er Paseka u TER ken Yerusalem; ve sôngo iyôngo i Paseka sha uwer u hiihii, ayange a u pue kar anyiin la.

² A ver upristi sha tom ve, a taver ve asema sha tom u iyou i TER,

³ Shi a kaa a Mbalevi mba ve tesen Iserael cii, mba i tsegh ve sha ci u TER la, er: Ver nen icighanareki ken iyou i Solomon wan u Davidi tor u Iserael maa la; kera gba u né tôôn un sha avande ga; yô, gba eren nen TER, Aôndo wen tom tsô, kua ior Nav Iserael kpaa.

⁴ Wa nen ago iyol, sha uya mba uter enev, sha iniongo yen, er Davidi tor u Iserael lu nger nahan, man er wan na Solomon kpaa lu nger la.

⁵ Tile nen ken icighanjiir sha ikwe i uya mba uter, mba anmgbianev enev, ior mba ken inya la, ipaven i nongo u Levi môm sha ci u hanma kwe.

⁶ Sôngo nen Paseka, wanger nen ayol a en, sôr nen un sha ci u anmgbianev enev, er nen sha imo i TER i Mose lu kaa la.

⁷ Tsô Yoshia na ior mba ken inya mba ve kohol her la cii ilev, lu agumaiyôngo man agumaivo, mbin cii lu sha ci u iniav mbi Paseka, iyenge i mbi ar dubu ikundugber man shi ibua di dubu utar; mbin nahan cii lu inyarev mbi tor.

⁸ Atiator a na kpaa na ior iwua a ishima i dedoo, upristi kua Mbalevi kpaa. Hilkia man Sekaria kua Yehiel, mbanengen sha iyou i Aôndo, ve na upristi ilev dubu uhar man deri ataratar man ibua deri utar, sha ci u iniav mbi Paseka,

⁹ Konania kpaa, man anmgbianev nav Shemaia man Netanel, man Hashabia man Yeiel man Yosabadi, mbavesen mba Mbalevi, ve na Mbalevi agumaiyôngo man agumaivo dubu utaan man ibua deri utaan sha ci u iniav mbi Paseka.

¹⁰ Kape i sôr akaa i ver je la, upristi tile sha ajiir a ve, Mbalevi kpaa sha iniongo ve, sha imo i tor.

¹¹ Tsô ve sôngo Paseka; upristi tsenda awambe a ve ngohol sha ave ve la; nahan Mbalevi gba burun.

¹² Ve pav iniav mbi nanden, ve ver er vea kar mbi sha uipaven mba uya mba uter mba ior mba ken inya la, sha u vea na TER nagh, er i nger ken ruamabera u Mose nahan. Kape ve er a ibua kpaa la.

¹³ Nahan ve mgbagh Paseka sha usu, sha tindi; kpaa iniav mbi tseghan yô, ve jiidi mbi shin uitye man ilwese kua utasa; ve tôô mbi fefa, ve za na ior mba ken inya.

¹⁴ Ken masejime la yô, ve sôr sha ci u ayol a ve man sha ci u upristi kpaa; gadia upristi, ônov mba Aron, ve lu eren tom gbem sha u nan nagh sha iniav mbi nanden man sha ahôm zan zan tugh; ka nahan man Mbalevi ve sôr sha ci ve ayol a ve kua sha ci u upristi ônov mba Aron kpaa ye.

¹⁵ Mbawanatsam, ônov mba Asav kpaa, lu sha ijiir ve sha imo i Davidi vea Asav man Heman man Yedutun ornengenakaa u tor; mbakuran kpaa lu sha hanma hunda; gba u ve undu tom ve kpee ga, gadia anmgbianev vev Mbalevi ve sôr kwagh sha ci ve.

¹⁶ Kape i sôr tom u TER sha iyange shon la je la, sha u eren Paseka man u nan iniav mbi nanden sha atse a nanden nagh sha mi a TER la, sha imo i tor Yoshia.

¹⁷ Tsô Mbaiserael mba ve lu her la, ve er Paseka hen shighe la, man iniongo i bredi u i we kwa sha mi ga la, ayange ataankarahar.

¹⁸ Hii sha ayange a profeti Samuel la je i er injainiongo i Paseka er ngin nahan ken Iserael ga; ma tor u Iserael u nan er Paseka er Yoshia nahan a upristi man Mbalevi man Yuda cii man Iserael mba ve lu her la kua mba ve tem ken Yerusalem kpaa, nan ngu ga.

¹⁹ I er Paseka ne sha inyom i sha pue kar anigheni a tor u Yoshia la.

²⁰ Ken masejime u akaa ne cii, er Yoshia sôr tempel kera yô, Neko tor u Igipiti kôndo sha u za nôngon ityav a Karkemishi hen ifi u Uferati; tsô Yoshia due er una za nôngo ityav a na.

²¹ Kpa a tindi mbatyomov her a na, a kaa er: Ka nyi i zoughom a we, we tor u Yuda nee? Ka we, m ve u nôngon ityav a we nyian ga, kpa ka ya u m lu ihom a na la, man Aôndo kpaa kaa er M̱ za fefa; yô, de bamen Aôndo u A lu a mo ne, A̱ tim u ga.

²² Kpa Yoshia rumun u geman ishigh kera den un ga, kpa a er ayom, a gema iyol sha u una nôngo ityav a na yô, a kera wa iko sha imo i Neko i i due sha zwa u Aôndo la ga, nahan a va ityav shin pev u Megido.

²³ Tsô mbakerenavaan ta tor Yoshia, nahan tor kaa a mbayev nav er: Tôôm nen heen kera, gadia i vihim iyol kehelee.

²⁴ Tsô mbayev nav dugh un shin ikyekye na, wa un shin ikyekye na i sha uhar i a lu a mi la, ve va a na ken Yerusalem, maa a kpe; i ii un ken iwar i uter nav. Yuda cii kua Yerusalem zungwe ku u Yoshia.

²⁵ Yeremia kpaa dugh kwelegh sha ci u Yoshia; mbawanatsam mba nomso cii kua mba kasev kpaa ve ter Yoshia ken ukwelegh vev zan zan nyian; gema hingir ieren ve u eren nahan ken Iserael je; nenge, i nger ve ken Ukwelegh.

²⁶ Aerenakaa a Yoshia agen man aeren a na a dedoo, a sha a kaa a i nger a ken atindi a TER la,

²⁷ man aeren a na a hiihii kua a masetyô kpaa la, nenge i nger a ken ruamabera u utor mba Iserael man mba Yuda.