2 Kroniku 34 - ICIGHAN BIBILO

¹ Yoshia lu anyom anigheni zum u a ya tor la; a tema tor ken Yerusalem anyom ikundugber kar môm.

² A eren kwagh u dedoo sha ishigh ki TER, a zaan sha igbenda i ter na Davidi; a kaha ken uwegh ku yanegh shin ku imesegh kpaa ga.

³ Gadia sha inyom i sha anigheni i tor na la, er a lu iyev la je, a hii u keren Aôndo u ter na Davidi; sha inyom i sha pue kar ahar la, a hii u wanger Yuda man Yerusalem sha ajiir a taven sha, man Asherim, man ieev mbi gban a gba, man mbi keren a ker la.

⁴ I hembe atse a nanden nagh sha mi a Ubaal, sha ishigh nagh je, man atse a nanden kwaghhumandoon sha mi la, a a lu sha a la, a gber a kera; a hembe Asherim man ieev mbi gban a gba kua ieev mbi keren a ker, a wua mbi, via, hingir vuwe, a urugh u sha iwar i mba yan ve na mbi nagh la.

⁵ Man shi a nande akuhe a upristi sha atse a ve, a nanden nagh sha mi la, a wanger Yuda kua Yerusalem.

⁶ Kape a er ken agar a Manase man Eferaim man Shimeon zan zan Nafetali kpaa, man sha ajiir a i vihi a kera a a kase her la kpaa.

⁷ A hembe atse a nanden nagh sha mi, a kume Asherim kua ieev mbi gban a gba, via, hingir vuwe, a gber atse a nanden kwaghhumandoon sha mi a ken tar u Iserael kera cii; nahan a hide ken Yerusalem.

⁸ Tsô sha inyom i sha pue kar anigheni i tor na, zum u a vande wanger tar kua iyou la yô, a tindi Shafan wan u Asalia, man Maaseia or u nengen sha gar, man Yoa wan u Yoahashi or u ngeren abaver ken takerada, er ve̱ za sôr iyou i TER, Aôndo na.

⁹ Tsô ve va hen zegepristi Hilkia, ve na inyaregh ki i va a ki ken iyou i Aôndo, ki Mbalevi mbakuranhunda kohol ken Manase man Eferaim, man asande a Iserael a a shi her cii, man Yuda cii, kua Benyamin, man mba ve tem ken Yerusalem kpaa la.

¹⁰ Ve kende ki ve na sha ikev i mbatomov, mba ve lu nengen sha tom u iyou i TER la; ve di ve gema ki ve na mbaerentom ken iyou i TER er ve̱ sôr iyou la, i̱ hingir dedoo;

¹¹ ka mbagbanakaa man mbamaankwagh, ve na ve ki ye, sha u ve̱ yam awen a kuan man ikon sha ci u uinderan man sha u eren ihange i ayou, a utor mba Yuda yan vihi kera la.

¹² Ior mbala er tom sha ishima i môm; mbanengen sha a ve la yô, lu: Yahati man Obadia, ka Mbalevi mba ken ônov mba Merari je la; man i ver Sekaria man Meshulam, mba ken ônov mba Kohati, er ve̱ hemen ve. Mbalevi mba ve fa u kuhwan ityougholov doo doo yô,

¹³ ve lu nengen sha mbatôônikav, shi ve lu tesen mbaerentom tom u vea er yô, hanma inja i tom cii; Mbalevi mbagenev lu mbangeren man mbanengen sha akaa kua mbakuranhunda.

¹⁴ Zum u ve dugh inyaregh ki i va a mi ken iyou i TER la yô, pristi Hilkia za zua a ruamabera u atindiakaa a TER heregh u i na un sha ikev i Mose la.

¹⁵ Tsô Hilkia kaa a Shafan orngeren la, er: M zua a ruamabera u atindigh ken iyou i TER. Nahan Hilkia gema ruamabera la na Shafan.

¹⁶ Shafan za a ruamabera la hen tor; shi a ôr tor, a kaa a na er: Tom u u ne mbayev ou cii, mba eren u je.

¹⁷ Ve dugh inyaregh ki i zough a ki ken iyou i TER la, ve gema ki, ve na sha ikev i mbanengen sha tom kua sha ikev i mbatomov kpaa.

¹⁸ Orngeren Shafan shi kaa a tor er: Pristi Hilkia nam ruamabera; nahan Shafan ôr kwagh kimi sha ishigh ki tor.

¹⁹ Er tor ungwa akaaôron a atindiakaa la yô, a ande akondo a na.

²⁰ Nahan tor kaa a Hilkia man Ahikam wan u Shafan man Abedon wan u Mika man Shafan orngeren kua Asaia wanakiriki u tor, er:

²¹ Za, za pine nen TER sha ci wam man shi sha ci u ior mba ve shi her ken Iserael man Yuda, sha kwagh u akaaôron a ruamabera u i zough a mi ne; gadia iyugh i TER haa sha a vese kehe yum, gadia uter asev lu wan iko sha kwaghôron u TER, sha u eren sha kwagh u i nger ken ruamabera ne cii ga.

²² Tsô Hilkia kua mba tor tindi ve la ve za hen profeti u kwase Hulda, kwase u Shalum, wan u Tokati, wan u Hasera, orkuran iyou i akondogh (ya na lu ken Yerusalem ken gar u he), ve za ôr un kwagh la nahan.

²³ Nahan a gema a kaa a ve er: TER, Aôndo u Iserael, ngu kaan nahan er: Za, za kaa nen or u a tindi ne her a mo la, ner:

²⁴ TER ngu kaan nahan er: Nenge, Me va a ican sha ijiir ne, kua sha mba ve tem ken i kpaa, ka afan a i nger a ken ruamabera u ve er sha ishigh ki tor u Yuda la cii;

²⁵ gadia ve undum, ve gema ve nande mbaaôndo mbagenev kwaghhumandoon, sha u vea bamem sha tom u ave ve la cii yô; ka nahan man á haa iyugh Yam sha ijiir ne, á pir i kpaa ga ye.

²⁶ Kpa tor u Yuda u a tindi ne sha u né va pine imo i TER yô, za kaa nen un nahan ner: TER, Aôndo u Iserael, ngu kaan nahan er: Sha kwagh u akaaôron a u ongo la yô,

²⁷ er u lu a ishima i legh legh, u hire a iyol you ijime sha ishigh ki Aôndo, zum u u ongo kwaghôron Na u sha ijiir ne kua sha mba ve tem ken i kpaa, man u hire a iyol you ijime sha ishigh Yagh, u ande akondo a ou, u vaa sha ishigh Yagh kpaa yô, nahan Mo kpaa M ungwa u, kape TER A kaa la.

²⁸ Nenge, Me kohol we a uter ou imôngo, á hungwa a we shin uwar bem bem, ashe ou aa nenge bokwagh u Me va a mi sha ijiir ne kua sha mba ve tem ken i ne ga. Tsô ve shi ve hide hen tor ve va ôr un nahan.

²⁹ Tsô tor tindi i za kohol Mbavesen mba Yuda cii kua mba ken Yerusalem kpaa.

³⁰ Nahan tor kôndo za sha iyou i TER a ior mba Yuda cii, man ior mba ken Yerusalem man upristi kua Mbalevi, man ior cii, mbavesen kua mbakiriki cii; tsô a ôr akaaôron a ken ruamabera u ikuryan u i zua a mi ken iyou i TER la cii, sha ato ve.

³¹ Tor tile hen ijiir na, nahan a tôndo zwa sha ishigh ki TER er una dondo TER man una waan atindi a Na iko man mbampase Nav kua akaawan a Na kpaa, a ishima na cii, kua uma na cii kpaa, una er sha akaaôron a ikuryan a i nger ken ruamabera la vough.

³² A er mba i zough a ve ken Yerusalem kua Benyamin cii ve̱ nyôr ken ikuryan na la. Nahan mba ve lu ken Yerusalem ve er sha ikuryan i Aôndo, Aôndo u uter vev la, vough.

³³ Tsô Yoshia dugh akaahôngorough a ken ityar i Mbaiserael kera cii; a gema mba i zough a ve ken Iserael cii, ve hingir mba civir TER, Aôndo ve. Sha ayange a a lu uma la cii, ve de u dondon TER, Aôndo u uter vev ga.