2 Kroniku 32 - ICIGHAN BIBILO

¹ Ken ijime i akaa ne man tom u i er u sha ishima i veren ne yô, Senakeribi tor u Ashiria va, va nyôr ken Yuda, va wa afo a utya kase agar a lun a ugir, lu henen er una hemba a.

² Zum u Hesekia nenge Senakeribi va man norom u nôngon ityav a Yerusalem yô,

³ a tume idyu a atiator a na man anomaior a na er vea cir amboramnger a ken akôngo a gar; tsô ve wase un.

⁴ Nahan ior kpishi kohol imôngo, ve cir amboramnger cii kua uwagh u u kar hen atô u tar la, ve kaa er: Ka sha ci u nyi man utor mba Ashiria vea va vea va zua a mngerem kpishi nahana?

⁵ Tsô a taver ishima a maa ukpekpe mba ve yôhôl la cii, a maa ayou a taven gôgônan sha mi kpaa, shi a maa kpekpe ugen ken won; a taver Milo ken gar u Davidi man a er awange kua iperutya kpishi.

⁶ A ver ukurmbautyav sha ior, a kohol ve sha ishigh nagh hen tembe u hundagar, a ôr kwagh a ve sha asema a ve, a kaa er:

⁷ Taver nen, lu nen icihi, de cie nen ga, asema a̱ de nyian ne a tor u Ashiria ga, shin sha ci u zegeikumutya u a lu a na imôngo la kpaa ga; gadia u a lu a vese a hemba u a lu a na yô,

⁸ her a na yô, ka agee a iyolough tsô, kpa her a vese yô, TER, Aôndo wase, ngu, u Una wase se, Una nôngo ityav sha ci wase. Tsô ior suur sha kwaghôron u Hesekia tor u Yuda la.

⁹ Ken masejime u kwagh ne yô, Senakeribi tor u Ashiria tindi mbayev nav hen Yerusalem (gadia a lu sha ishigh ki Lakishi a akumautya a na cii a na imôngo), a tindi loho hen Hesekia tor u Yuda man hen Yuda mba ve lu ken Yerusalem cii yô, a kaa er:

¹⁰ Senakeribi tor u Ashiria ngu kaan er: Ne mba suur sha nyi man ne gbe teman ken Yerusalem keghen ityav nahana?

¹¹ Ka icugh Hesekia a tsughun ne, sha er ne̱ kpe ijen man imura, gaa? er a kaa er: TER, Aôndo wase, Una war se sha ikev i tor u Ashiria yô.

¹² Kera ka Hesekia shon u a vihi ajiir a Na a taven sha man atse a Na a nanden nagh sha mi kera, man a kaa a Yuda man Yerusalem er: Gure civir nen sha ishigh ki atse a nanden nagh sha mi ne tseegh, shi ka sha a kpaa né nanden kwaghhumandoon gaa?

¹³ Man ne kera fa kwagh u mo kua uter av se er akuraior a ken ityar ne cii gaa? Mbaaôndo mba akuraior a ken ityar ne, ve fatyô u yiman tar ve sha ikev yam mayange je kpa?

¹⁴ Ka hanmô u ken mbaaôndo mba ken akuraior la cii, a uter av tim ve kera la, una fatyô u waren ior nav sha ikev yam, je u Aôndo wen Una fatyô u yiman ne sha ikev yama?

¹⁵ Yô, de rumun nen Hesekia a̱ tsughun ne, a̱ tsumen a ven nahan ga, man shi de kera ne nen un jighjigh kpaa ga, gadia ma aôndo môm môm u hanma ikur shin tartor fatyô u yiman ior nav sha ikev yam kua sha i uter av kpaa ga, man hire Aôndo wen Una yima ne sha ikev yam yee?

¹⁶ Mbayev nav shi seer u ôron kwagh u dang sha TER Aôndo man sha wanakiriki Na Hesekia kpaa.

¹⁷ Man shi a nger washika u tuhwan TER, Aôndo u Iserael, man shi u ôron kwagh u dang sha a Na, a kaa er: Er mbaaôndo mba akuraior a ken ityar igen la, ve yem ior vev sha ikev yam ga nahan, kape Aôndo u Hesekia kpaa Una yima ior Nav sha ikev yam ga ne.

¹⁸ Shi ve genger imo taver taver ken zwa u Mbayuda a ior mba Yerusalem mba ve lu sha gilgar la, sha u tan ve mciem iyol man nan ve anzughul, sha er vea ngohol gar la yô.

¹⁹ Man shi ve ter Aôndo u Yerusalem er ka mbaaôndo mba ior mba shin tar nahan, mba ve lu tomaveegh u ior yô.

²⁰ Tsô tor Hesekia vea profeti Yesaia wan u Amoshi, ve er msen sha kwagh ne, ve genger imo ve yila Aôndo u Sha.

²¹ Nahan TER tindi ortyom, va tim anomaior a ageegh man mbahemenev mba ukurmbautyav ken afo a tor u Ashiria. Tsô a hide hen ya na a kunya. Zum u a nyôr ken iyou i aôndo na yô, mba a mar ve iyol na je, ve wua un ker, sha sanker.

²² Kape TER yima Hesekia kua mba ve tem ken Yerusalem sha ikev i Senakeribi tor u Ashiria man sha ikev i mbagenev cii la, A na ve mmem sha hanma ian.

²³ Ior kpishi va na TER iwua ken Yerusalem. Hesekia tor u Yuda kpaa ve va un a ikav mbi injaav; tsô hen shighe la je a lu a icivir sha ashe a akuraior cii.

²⁴ Tsô sha ayange la, Hesekia gba angev je war kpen, nahan a sôn TER, TER ôr kwagh a na, shi A tese un ikav i kpilighyol kpaa.

²⁵ Kpa Hesekia er kwagh sha kwagh u doon u i er un la ga, gadia ishima kehe un ker, ka nahan man iyugh sen sha a na kua sha Yuda man Yerusalem kpaa ye.

²⁶ Kpa Hesekia hide a iyol na ijime sha mkehe u ishima na la, un a mba ken Yerusalem, nahan iyugh i TER kera sen sha a ve sha ayange a Hesekia la ga.

²⁷ Hesekia lu a inyaregh man icivir kpishi je; a er ayou a koson azurfa man zenaria ker, kua awen a injaa man ilyôghonov man iperutya kua ikav mbi dedoo anza kposo kposo kpaa;

²⁸ man ayou a ombon iyiav man wain kua mkurem ker, man atôr a hanma injauile kua atôr a iyôngo kpaa.

²⁹ Man shi a maa agar sha ci na, shi a lu a iyôngo man abua wuee, gadia Aôndo na un akaa kpishi je.

³⁰ Ka un Hesekia shon ne kpaa a cir kungômnger u Gihon u sha la, a goom a mi sen gar u Davidi vegher u shin ityôtar ye. Hesekia er tom na kure u cii doo doo.

³¹ Kpa sha kwagh u mbatyomov mba atiator a Babilon la, mba i tindi ve her a na er ve̱ va fa kwagh u kpilighyol u a er hen tar la yô, Aôndo maa undu un sha u karen un, sha u Una fa kwagh u a lu a mi ken ishima cii yô.

³² Aerenakaa agen a Hesekia man ityom na i dedoo kpaa, nenge, i nger a ken mpase u profeti Yesaia wan u Amoshi man ken ruamabera u utor mba Yuda man Iserael.

³³ Tsô Hesekia yav a uter nav imôngo, i ii un sha ijiir i taven sha hen iwar i ônov mba Davidi la; Yuda cii kua mba ve tem ken Yerusalem, ve civir ku na. Wan na Manase gema tema tor sha ityough nagh.