2 Kroniku 31 - ICIGHAN BIBILO

¹ Tsô zum u i kure akaa ne cii yô, Mbaiserael mba ve lu her cii, ve due ve za ken agar a Yuda, ve za hembe mtôm ma awenem, ve gber Asherim kera, ve hembe ajiir a taven sha man atse a nanden nagh sha mi a ken Yuda cii man a ken Benyamin man ken Eferaim kua Manase kpaa, ve vihi a ci ca cii. Tsô ônov mba Iserael cii hide, hanma or nan yem hen gar u nan hen ya u nan.

² Tsô Hesekia ver iniongo i upristi man Mbalevi sha iniongo ve, upristi kua Mbalevi cii, hanmô ve sha tom u nan, sha ci u tom u iniav mbi nanden man iniav mbi bem, sha u eren tom, man u sughun, man u wuese ken ihinda i afo a TER.

³ Man shi iwua i tor a ne sha inyaregh nagh la, lu sha ci u iniav mbi nanden: iniav mbi nanden mbi pepe man mbi aikighe, man shi iniav mbi nanden sha ayange a memen, man sha iwer i he, kua sha ayange a iniongo la, er i nger ken atindi a TER nahan.

⁴ Shi a kaa ior mba ve tem ken Yerusalem la er, ve̱ na kwar u upristi man u Mbalevi, sha u vea ver asema a ve sha atindi a TER yô.

⁵ Fese nahan, er imo la i samber yô, Mbaiserael na iyiav mbi tsutswav mbi alakema man wain man mkurem man iyough man shi akaa a a lu ken ikôngo cii; ve va a môm-ken-upue u hanma kwagh cii; ve va a mi kpishi.

⁶ Mbaiserael man Mbayuda, mba ve tem ken agar a Yuda la, ve kpaa, ve va a môm-ken-upue mba abuav man iyôngo, man môm-ken-upue ken uicighanmbaakaav mba i tsegh sha ci u TER, Aôndo ve yô, ve ta a atihi atihi.

⁷ Sha uwer u sha utar la, ve hii u tan atihi, sha uwer u sha utaankaruhar la ve kure.

⁸ Zum u Hesekia man atiator ve va, ve va nenge atihi la yô, ve wuese TER, kua ior Nav Iserael kpaa.

⁹ Tsô Hesekia pine upristi man Mbalevi sha kwagh u atihi la.

¹⁰ Nahan zegepristi Asaria, u hen ya u Sadoki, gema kaa a na er: Er ior hii u van a iniav vev ken iyou i TER yô, se ya, kuma se je, neer kpishi; gadia TER ver ior Nav doo doo man kwagh u a neer yô, ngun kpishi ne.

¹¹ Tsô Hesekia kaa er, i̱ sôr ayou a ken iyou i TER; tsô i sôr a je.

¹² Ve nyôr a iniav man môm-ken-upue mba akaav man uicighanmbaakaav sha ishima i veren; Konania, Orlevi, hingir ornengen sha akaa la, anngô na Shimei gema dondo sha a na.

¹³ Yehiel man Asashia man Nahati man Asahel man Yerimoti man Yosabadi man Eliel man, Isemakia man Mahati kua Benaia, ve lu mbahemenev sha ikev i Konania man anngô na Shimei, sha mver u tor Hesekia man Asaria or u nengen sha iyou i Aôndo ve ver ve la.

¹⁴ Kore wan u Imna, Orlevi, orkuranhunda vegher u sha ityoughkitaregh la, un lu nengen sha iniav mbi nan Aôndo sha ishima i dedoo la, lu karen kwar sha iniav mbi TER man uicighanmbaakaav mba hemban cii la.

¹⁵ Mba ve lu sha ikev na yô, lu: Eden man Miniamin man Yeshua man Shemaia man Amaria kua Shekania, ve lu ken agar a upristi, ve karen anmgbianev vev kwar sha iniongo iniongo sha ishima i veren, mbakiriki kua mbaganden cii;

¹⁶ i wa mbanomso mba i nger ve ken takerada u icombor ve la ker ga, hii hen wan ua lu anyom atar man u a hembe nahan kpaa, ka mba ve nyer ken iyou i TER sha tom u hanma iyange sha u eren ityom ve sha iniongo ve cii je la.

¹⁷ Sha mnger u i nger upristi la yô, i nger ve sha uya mba uter vev; Mbalevi yô, hii sha or u nan lu anyom ikundu man u nan hembe nahan kpaa, i nger ve sha ityom ve sha iniongo ve;

¹⁸ i nger ve ken utakerada mba icombor ve, a ônov vev cii; kasev vev man mbayev vev mba nomso man mba kasev, nongo ve cii; gadia ve lu eren tom sha uicighanmbaakaav a ishima i veren.

¹⁹ Upristi ônov mba Aron, mba ve tema ken akôngo a agar a ve la kpaa, ken hanma gar yô, ior lu mba i nger ati a ve sha u ve̱ karen upristi mba nomso cii kwar, kua hanma Orlevi kpaa u i nger nan ken takerada u icombor yô.

²⁰ Kape Hesekia er ken Yuda cii la; a er kwagh u doon man u vough man u jighilii sha ishigh ki TER Aôndo na.

²¹ Hanma tom u a kôr ave sha mi u eren yô, u ken iyou i TER, man sha atindiakaa kua atindi cii, sha u keren Aôndo na yô, a er u sha ishima na i môm je, a kure u dedoo kpaa.