2 Kroniku 30 - ICIGHAN BIBILO

¹ Tsô Hesekia tindi loho hen Iserael cii kua Yuda, shi a nger uwashika hen Eferaim man Manase er, ve̱ va hen iyou i TER ken Yerusalem, ve̱ va ya iniongo i Paseka i TER, Aôndo u Iserael.

² Gadia tor zua zwa un a atiator a na, man mkohol u ior i ken Yerusalem cii er vea ya Paseka sha uwer u sha uhar.

³ Gadia ve fatyô u yan un hen shighe la ga, sha ci u upristi mba ve wanger ayol a ve la, ve lu kpeghee tsô, man ior kpaa lu a kohol ken Yerusalem ga.

⁴ Kwagh ne doo tor kua mkohol u ior cii.

⁵ Tsô ve ver tindi er, i̱ yôô ken Iserael cii, hii hen Bersheba zan zan ar hen Dan er, ve̱ va ya Paseka u TER, Aôndo u Iserael, ken Yerusalem; gadia i lu yan un a ior kpishi er i vande ngeren er i̱ er nahan la ga.

⁶ Tsô mbatyomov za a uwashika mbala mba ve due hen tor man atiator a na la, ve za hen Iserael cii man Yuda, sha imo i tor, ve kaa er: Ne Mbaiserael, shi hide nen hen TER, Aôndo u Aberaham man u Isaka kua u Iserael, sha u A̱ hide hen mba ve wer sha ikev i utor mba Ashiria ve shi her ne.

⁷ De kera luun nen er uter enev, shin er anmgbianev enev nahan ga, mba ve er TER, Aôndo u uter vev kwaghbo man A gema ve ve hingir kwagh u tan mke iyol er ne nengen nahan.

⁸ Hegen yô, de kera nembe nen ikôr er uter enev lu er nahan ga, kpa na nen TER ayol a en, nyôr nen hen icighanjiir Na u A tsegh un gbem ne, civir nen TER, Aôndo wen, sha ci u iyugh Na i taveraa i̱ kar her a ven kera.

⁹ Gadia aluer shi nea gema hen TER yô, anmgbianev enev kua ônov enev vea zua a mhôônom ma zungwen hen mba ve yem a ve uikangen la, shi vea hide hen tar ne je, gadia TER, Aôndo wen, ngu a erdoo, man shi zungu mhôônom kpaa, man Una gema ishigh Nagh her a ven kera ga, aluer né gema ishima né hire her a Na yô.

¹⁰ Tsô mbatyomov mbala zende sha agar agar ken tar u Eferaim man u Manase zan zan ve za ar hen Sebulon kpaa; kpa ve gema ve se a se ve ibumegh, ve naha ve tar kpaa.

¹¹ Nahan kpaa, ior mbagenev ken Asher man ken Manase kua Sebulon ve hide ayol a ve ijime, ve va ken Yerusalem.

¹² Shi ken Yuda kpaa TER na ve u lun ishima i môm, u eren sha tindi u tor kua atiator, sha imo i TER la.

¹³ Tsô ior kpishi kohol ken Yerusalem sha u yan iniongo i bredi u i we kwa sha mi ga yô, sha uwer u sha uhar la, lu zegemkohol je.

¹⁴ Nahan ve mough, ve kura atse a nanden nagh sha mi a ken Yerusalem la kera, kua atse a nanden kwaghhumandoon sha mi la cii kpaa, ve kura a kera, ve haa shin uwagh u Kideron.

¹⁵ Tsô ve sôngo Paseka sha uwer u sha uhar ayange a u pue kar anyiin la; upristi man Mbalevi kpaa, kunya kôr ve, nahan ve wanger ayol a ve, ve va a iniav mbi nanden ken iyou i TER.

¹⁶ Ve va tile ken ajiir a ve sha iniongo ve, sha tindi u Mose or u Aôndo la; upristi tsenda awambe a ve ngohol sha ikev i Mbalevi la.

¹⁷ Gadia ior lu ken mkohol kpishi mba ve vande wanger ayol a ve ga yô; ka nahan man Mbalevi lu sôngon aniyôngov mba Paseka sha ci u hanma or u nan lu wang ga yô, sha u ve̱ lu TER kwagh u wang yô.

¹⁸ Gadia ior kpishi mba ken Eferaim man Manase man Isakar kua Sebulon, ve lu a wanger ayol a ve ga, nahan kpaa ve ya Paseka, lu er i nger la nahan ga. Kpa Hesekia sôn sha ci ve, kaa er: TER u zungwen mhôônom, A̱ de hanma or isholibo i nan,

¹⁹ u nan ver ishima u keren Aôndo TER, Aôndo u uter mba nan yô, shin er nan lu wang sha mwanger u icighanjiir la ga kpaa.

²⁰ Nahan TER ungwa msen u Hesekia la, A war ior.

²¹ Tsô Mbaiserael mba ve lu ken Yerusalem la, ve tsa ayange ataankarahar, ve lu yan iniongo i bredi u i we kwa sha mi ga la, a iember kpishi; Mbalevi kua upristi kpaa ve lu wuese TER ayange ayange sha ityogholov mbi kaan, mbi wuese TER a mi.

²² Hesekia ôr kwagh sha ishima i nongo u Mbalevi cii, mba ve fe tom u TER dedoo la. Ayange ataankarahar cii, ve lu yan iniongo, ve lu nan iniav mbi bem, ve lu sughun TER, Aôndo u uter vev.

²³ Tsô mkohol la cii, ver ishima u vea shi á ya iniongo ayange agen ataankarahar kpaa yô, nahan ve ya iniongo ayange a ataankarahar shon la, a iember je.

²⁴ Gadia Hesekia tor u Yuda na mkohol anomabua dubu man iyôngo dubu utaankaruhar; atiator kpaa na mkohol anomabua dubu man iyôngo dubu pue, upristi kpishi je, wanger ayol a ve.

²⁵ Mkohol u ior mba Yuda cii a upristi kua Mbalevi, man mkohol u ior mba ve due ken Iserael cii, man shi ushirmbaiorov mba ve due ken tar u Iserael, kua mba ve tem ken Yuda yô, ve gba ember.

²⁶ Nahan iember lu kpishi ken Yerusalem, gadia hii sha ayange a Solomon wan u Davidi tor u Iserael la je, i lu a er injakwagh ne ken Yerusalem nahan ga.

²⁷ Tsô upristi man Mbalevi mough, ver ior doo doo. Nahan i ungwa imo ve, msen ve kpaa kôndo ar sha icighanjiir Na u teman, za ar Sha je.