2 Kroniku 3 - ICIGHAN BIBILO

¹ Tsô Solomon hii u maan iyou i TER hen Yerusalem sha uwo u Moria, henpe TER ande hen ter na Davidi la, sha ijiir i Davidi sôr, hen vande u gbiren alakema u Ornan Oryebushi la.

² A hii u maan sha uwer u sha uhar ayange a u ahar, sha inyom i sha unyiin i a ya tor la.

³ Amagh a Solomon tim sha u maan iyou i Aôndo yô, ka a ne: Iniembe na lu aseva akunduatar sha inja i ikaren i tse la, igbanger na yô, lu aseva ikundu.

⁴ Puadwer u sha ishigh ki iyoughough la, iniembe na lu aseva ikundu sha igbanger i iyou la, ityaven na lu deri man ikundu; a cir un zenaria u wang kimi.

⁵ A cir iyou i hemban vesen la ikon i fer, shi a cir i zenaria u dedoo, a er hwe sha mi, a nger avile man mshirim sha mi.

⁶ A er hwe sha iyou la sha awen a injaa; zenaria la lu u ken Parvaim.

⁷ A cir iyou la zenaria, ihange man ikpandeihinda i shin man ukpekpe kua ucivir mba i cii; a er ieev mbi ucerubi sha ukpekpe.

⁸ A er icighankpar u hemban cii la kpaa, iniembe na lu aseva ikundu sha igbanger i iyou la, man igbanger na lu aseva ikundu; a cir i zenaria u dedoo kuma utalenti deri ataratar.

⁹ Iyohov mbi ukusa lu ushekel mba zenaria akunduahargber. Ukpombaayoughouv mba shaav kpaa a cir ve zenaria.

¹⁰ Ken icighankpar u hemban cii la, a er ieev mbi ucerubi ihiar; i cir mbi zenaria iyol.

¹¹ Iniembe i akper a ucerubi lu aseva ikundu, iniembe i kpelegh ku cerubi môm lu aseva ataan, suur ken kpekpe iyou; iniembe i kpelegh kugenegh la kpaa lu aseva ataan, zua sha kpelegh ku cerubi ugen la.

¹² Kpelegh ku cerubi ugen lu aseva ataan, suur ken kpekpe iyou; kpelegh kugenegh la kpaa lu aseva ataan, gema zua a kpelegh ku cerubi u hiihii la.

¹³ Iniembe i akper a ucerubi mban samber kuma aseva ikundu; ve tile sha angahar a ve, ve ver ishiv sha iyou la.

¹⁴ Shi a er ikondo i yisan, i kwel, man i nyian dindee, man i nyian bong kua i pupuu i kôngor, a er ucerubi sha i.

¹⁵ Sha ishigh ki iyou la yô, a tim mtôm mhar, ityaven mbi ma lu aseva ikundugber kar ataan, indyuruku u a lu sha hanma ityôgh, lu aseva ataan.

¹⁶ A er mshirim er ikar nahan a har ma sha uindyuruku mba sha mtô la; a er upomegraneti deri, a zer ve sha mshirim mara.

¹⁷ A tim mtôm mara sha ishigh ki tempel, ki mômough ken uwegh ku yanegh, kigenegh ken imese; a ii ki ken uwegh ku yanegh la iti er Yakin, man ki ken imese la, a ii ki iti er Boashi.