2 Kroniku 27 - ICIGHAN BIBILO

¹ Yotam lu anyom ikundu kar ataan zum u a ya tor la; a tema tor ken Yerusalem anyom pue kar ataratar; iti i ngô na er Yerusha, wan u Sadoki.

² A eren kwagh u dedoo sha ishigh ki TER, er ter na Ushia lu eren nahan cii; kpa a nyôr ken tempel u TER ga. Kpa ior yô, ve lu eren kwaghbo heregh.

³ A maa hunda u sha, u iyou i TER, gir u Ofel la kpaa a maa un kpishi.

⁴ Man shi a maa agar sha tar u iwoogh u Yuda; shin akô kpaa, a maa ayouautya kua ayou a taven gôgônan.

⁵ Shi a nôngo ityav a tor u Mbaamon kpaa, a hemba ve. Nahan Mbaamon na un azurfa kuma utalenti deri, man alakema kuma uikaren dubu pue kua shair kpaa dubu pue, hen inyom la je. Kape Mbaamon na un sha inyom i sha uhar kua i sha utar la kpaa.

⁶ Nahan Yotam hingir or u ageegh, gadia a zende jighilaa sha ishigh ki TER, Aôndo na.

⁷ Aerenakaa agen a Yotam man ityav nav mbi nôngon cii, kua aeren a na kpaa, nenge i nger a ken ruamabera u utor mba Iserael man mba Yuda.

⁸ A lu anyom ikundu kar ataan zum u a ya tor la, man a tema tor ken Yerusalem anyom pue kar ataratar.

⁹ Tsô Yotam yav a uter nav imôngo, ve ii un ken gar u Davidi; wan na Ahashi gema tema tor sha ityough nagh.