2 Kroniku 26 - ICIGHAN BIBILO

¹ Tsô ior mba Yuda cii ve tôô Ushia, a lu anyom pue kar ataratar, ve ver un tor sha ityough ki ter na Amashia.

² Ka un je a maa Eloti, a hide a mi hen Yuda ye, ken ijime i tor yav kera a uter nav imôngo la.

³ Ushia lu anyom pue ka ataratar zum u a ya tor la; a tema tor anyom akunduahargber kar ahar hen Yerusalem; iti i ngô na er Yekolia u hen Yerusalem.

⁴ A er kwagh u dedoo sha ishigh ki TER, er ter na Amashia er nahan cii.

⁵ A ver ishima u keren Aôndo sha ayange a Sekaria, u a lu tesen er i̱ civir Aôndo la. Sha ayange a a lu keren TER la yô, Aôndo na un mkpeyol.

⁶ A due a za nôngo ityav a Mbafiliti, a hembe gilgar u Gati man gilgar u Yabene kua gilgar u Ashedodi; a maa agar ken tar u Ashedodi, kua hen atô u Mbafiliti kpaa.

⁷ Aôndo wase un u nôngon ityav a Mbafiliti man Mbaarabia mba ve tema ken Gur-baal, kua a Mbameun kpaa.

⁸ Mbaamon kpaa lu tan Ushia kpandegh; iti na za gwa zan zan nyôr ken Igipiti je, gadia lu a tahav kpishi je.

⁹ Shi Ushia maa ayou a taven gôgônan ken Yerusalem hen Hundagar u Zongo la, man shi hen Hundagar u Pev la, kua hen iniuugh ki gilgar, a taver ve sha ikav mbi utyav.

¹⁰ Shi a maa ayou a taven gôgônan ken desereti; a time azôr kpishi, gadia a lu a ilev kpishi shin pev kua sha tar u delaa kpaa; a lu a mbashilensule man mbasôron ikon i wain sha iwo kua hen ipusuinya kpaa, gadia un lu or u sule doon un mimi.

¹¹ Man shi Ushia lu a ikumutya, ve zaan ityav akum akum, sha iyenge i orngeren Yeiel kua Maaseia ornengen sha ve, ve ôr la, sha ikev i Hanania, u môm ken mbavesen mba tor la.

¹² Iyenge i mbahemenev mba sha uya mba uter cii, anomaior a ageegh, lu dubu uhar man deri ataratar.

¹³ Ikumutya lu sha ikev ve, lu ior dubu deri utar dubu kar utaankaruhar man deri utaan, mba ve nôngon ityav ngeegh, ve wasen tor sha mbaihomov nav yô.

¹⁴ Ushia er ikumutya la cii, iperutya man awange man aderashouja man uriga mba iyôv man mbaada kua awen a mzu.

¹⁵ Ken Yerusalem yô, a er akeke a nôngon ityav a mi, a i er a sha kwaghfan, er a̱ tile sha ayou a taven gôgônan kua sha azongo, sha u keren avaan man uzegembaawenev a mi. Iti na za gwa yem ca, gadia a zua a iwasen i kpilighyol zan zan a taver je.

¹⁶ Kpa zum u a taver la yô, ishima gengese un, nahan a er kwaghbo, a per tindi u TER, Aôndo na; gadia a nyôr ken tempel u TER er una nande kwaghhumandoon sha atse a nanden kwaghhumandoon sha mi la.

¹⁷ Tsô pristi Asaria va un ken ijime, a upristi mba TER mbagenev akunduanyiin, ior mba taver asema,

¹⁸ ve hendan a tor Ushia, ve kaa a na er: Ushia, u nanden TER kwaghhumandoon ne, ka kwagh wou ga, saa upristi, ônov mba Aron mba i tsegha ve er ve̱ nanden kwaghhumandoon la; due ken icighanjiir ne kera, gadia u per tindi; man kwagh ne kpaa ú zua a icivir hen TER Aôndo ga.

¹⁹ Kpa ishima vihi Ushia; er a lu a gbande u nanden kwaghhumandoon sha uwe, man er ishima lu vihin un a upristi nahan yô, imande maa due un sha icul sha ishigh ki upristi ken iyou i TER la je, hen kpe u atse a nanden kwaghhumandoon sha mi la.

²⁰ Tsô er zegepristi Asaria man upristi cii lu kenger un yô, nenge, imande lu un sha icul, nahan ve mgbegha un kera fefa; een, un iyol na je kpaa, a kar fefa, a due, gadia TER tsaha un.

²¹ Nahan tor Ushia lu orimande zan zan a kar kpen a mi, a tema ken iyou igen kposo, gadia lu orimande, i pav un a iyou i TER; wan na Yotam lu nengen sha ya u tor, lu ôron ior mba tar la ijir.

²² Aerenakaa agen a Ushia a hiihii man a masetyô yô, profeti Yesaia, wan u Amoshi nger a.

²³ Tsô Ushia yav a uter nav imôngo; ve ii un a uter nav imôngo hen ijiir i waregh i utor, gadia ve kaa er: Ka orimande; wan na Yotam gema tema tor sha ityough nagh.