2 Kroniku 23 - ICIGHAN BIBILO

¹ Sha inyom i sha utaankaruhar la Yehoyada taver ishima ker, nahan a zua zwa a mbahemenev mba ve lu a ior deri deri sha ikev la, lu Asaria wan u Yeroham, man Ishemael wan u Yehohanan, man Asaria wan u Obedi, man Maaseia wan u Adaia, kua Elishafati wan u Shikeri.

² Ve gba zenden ken tar u Yuda ve kura Mbalevi ken agar a Yuda cii man mbahemenev mba sha uya mba uter mba Iserael, ve va ken Yerusalem.

³ Tsô ikpelaior cii ya ikur a tor ken iyou i Aôndo. A kaa a ve, er: Nenge, wan u tor una ya tor, er TER lu kaa sha kwagh u ônov mba Davidi la.

⁴ Yô, kwagh u né er yô, ka un ne: pav nen nongo wen u u hii yaren tom sha iyange i memen la akum atar, upristi kua Mbalevi kpaa; ikum i môm i̱ lu mbakuranihinda;

⁵ ikum igen i̱ lu hen ya u tor; shi ikum igen i̱ lu hen Hundagar u Imagh; yô, ior cii ve̱ lu hen ityembe i iyou i TER.

⁶ Kpa or môm nana̱ de nyer ken iyou i TER ga, saa upristi kua Mbalevi mba ve eren tom ker la; ve yô, ve̱ nyôr gadia ve mba wang; kpa ior mbagenev cii yô, ve̱ wa iko sha imo i TER.

⁷ Mbalevi yô, ve̱ kase tor, hanma or nana̱ lu a ikav mbi utyav mbi nan sha ikev, hanma or u nana nyôr ken iyou la yô, i̱ wua nan je; kpa ne yô, lu nen a tor imôngo zum u una nyôron man una duen kpaa.

⁸ Nahan Mbalevi man Yuda cii ve er kwagh u pristi Yehoyada kaa la cii; hanma or nan kohol ior mba nan, mba ve hii yaren tom sha iyange i memen kua mba vea mem tom sha iyange i memen la kpaa; gadia pristi Yehoyada na iniongo la gbenda ga.

⁹ Pristi Yehoyada tôô awange man akuvautya kua iperutya i yan lu i tor Davidi la, i i lu ken iyou i Aôndo la, a na mbahemenev mba ve lu a ior deri deri sha ikev la.

¹⁰ A ver ior cii kase tor wa atô hanmô a ikav mbi utyav sha uwe, hii iyou vegher u ken iyan zan zan ar iyou vegher u ken imese, sha ishigh ki atse a nanden nagh sha mi kua sha ishigh ki iyou.

¹¹ Tsô ve due a wan u tor maa ve cir un idyer i tor, ve na un Shiada: ve kôr un tor; Yehoyada kua ônov nav ve shighe un mkurem; ve kaa er, Tor a̱ tsa sha won!

¹² Zum u Atalia ungwa ayôôso a ior er ve lu van iuu ember tor yô, a va hen ior ken iyou i TER;

¹³ jingi yô, a nenge tor tile hen ityô henpe nyôron la, mbahemenev kua mbaikorov tile a tor; ior mba tar la cii, lu ember, tôngon ikor; mbawanatsam kpaa lu kuhwan ityogholov, ve gba nderan icam i wuese. Tsô Atalia ande akondo a na, kaa er: I dughum myer! I dughum myer!

¹⁴ Kpa Yehoyada due a mbahemenev mba ve lu a ior deri deri sha ikev, mba ve lu sha akumautya la, a kaa a ve er: Nyôr nen a na ken atô u iniongo, due a na; or u nana za a na ityô yô, i̱ wua nan sha sanker; gadia pristi kaa er: De woo nen un ken iyou i TER ga.

¹⁵ Tsô ve na un ian er a̱ due; za ar hen hunda u anyinya her ape nyôron zan ken ya u tor yô, maa ve wua un her.

¹⁶ Tsô Yehoyada ya ikur a ior cii kua tor kpaa, er vea lu ior mba TER.

¹⁷ Tsô ior cii ve za hen iyou i Baal, ve za yôhôl i; ve hembe atse na a nanden nagh sha mi kua ieev nav, ve wua Matan pristi u Baal sha ishigh ki atsegh.

¹⁸ Man shi Yehoyada ver tom u ken iyou i TER sha ikev i upristi mba ve lu Mbalevi, mba Davidi lu pav ve iniongo iniongo ken iyou i TER er ve̱ naan iniav mbi nanden mbi TER, er i nger ken atindi a Mose nahan, a iember man atsam a wan, sha imo i Davidi.

¹⁹ Shi a ver mbakuran sha ihinda i iyou i TER, sha ci u or u nan lu wang ga yô, shin a lu sha hanma gbenda kpaa, nana̱ de nyer ker ga yô.

²⁰ A shi a tôô mbahemenev mba ve lu a ior deri deri sha ikev man ashagbaior kua uityombaiorov man shi ior mba ken inya cii, a due a tor ken iyou i TER, a sen a na; ve kar sha hunda u sha, ve za ar hen iyou i tor, ve ver tor sha ikônough ki torough.

²¹ Nahan ior mba hen tar la cii, ember; bem gba ken gar. Atalia yô, ve wua un sha sanker.