2 Kroniku 22 - ICIGHAN BIBILO

¹ Tsô mba ve tema ken Yerusalem la, ve gema Ahashia, wan na u masetyô la, ve ver un tor sha ityough nagh; gadia ikumior i i va a Mbaarabia hen afo la, ve wua ônov nav mba vesen cii. Nahan Ahashia wan u Yehoram tor u Yuda, ya tor.

² Ahashia lu anyom akunduahar kar ahar zum u a ya tor la; a tema tor inyom i môm ken Yerusalem; iti i ngô na er Atalia wan u Omri.

³ Un kpaa zaan sha gbenda u ya u Ahaba; gadia ngô na lu wasen un u henen ifer i eren.

⁴ A er ifer sha ishigh ki TER, er ya u Ahaba lu er nahan; gadia ka ve je ve lu wasen un u henen akaa shighe u ter na kpe kera la, zaan a na ken mtim ye.

⁵ A lu zan sha ityesen ve kpaa, shi a za vea Yehoram wan u Ahaba tor u Iserael sha u za nôngon ityav a Hasael tor u Shiria hen Ramoti-gileadi; kpa Mbashiria vihi Yoram iyol,

⁶ nahan a hire ken Yesereel er, i̱ va sôr un avav a i gber un hen Rama zum u a lu nôngon ityav a Hasael tor u Shiria la, Ahashia wan u Yehoram tor u Yuda va er una za nenge Yoram wan u Ahaba ken Yesereel, gadia lu uange.

⁷ Mtim u Ahashia due her Aôndo, sha mze u a za hen Yoram la; gadia er a va yô, a za a Yehoram imôngo sha u za keghen Yehu wan u Nimshi gbenda, u TER shighe un mkurem kôr un tor sha u a̱ za tim ya u Ahaba la.

⁸ Tsô er Yehu lu kuren ijir sha ya u Ahaba la yô, a zua a atiator a Yuda man ônov mba anngôôv mba Ahashia, ve lu mbatomov mba Ahashia, nahan a wua ve.

⁹ Tsô a gba keren Ahashia, ve za kôr un, a yer a lu ken Samaria; ve va a na hen Yehu, ve wua un; ve ii un, gadia ve kaa er: Un ka wan u Yehoshafati je, u a ker TER a ishima na i môm la. Nahan ma or ken ya u Ahashia u nana fatyô u teman tor yô, nan kera lu ga.

¹⁰ Zum u Atalia ngô u Ahashia nenge er wan na a kpe yô, a mough, a wua ônov mba tor mba hen ya u Yuda la cii.

¹¹ Kpa Yehoshabeati wan u tor, u kwase, za tôô Yoashi wan u Ahashia la myer, ken ônov mba tor mba i lu wuan la, a ver un a yese na ken iyou i yaven. Nahan Yehoshabeati wan u tor Yehoram, kwase u pristi Yehoyada (gadia un lu anngô u Ahashia), a yer Atalia un, nahan a wua un ga.

¹² A lu a ve myer ken iyou i Aôndo, anyom ataratar; nahan Atalia tema tor sha tar la.