2 Kroniku 20 - ICIGHAN BIBILO

¹ Tsô ken masejime u kwagh ne yô, Mbamoabi man Mbaamon kua Mbameuni mbagenev a ve imôngo, ve va u va nôngon ityav a Yehoshafati.

² Nahan ior mbagenev va va kaa a Yehoshafati, er: Ikpelaior kpishi i yande zegemnger ngi van num sha a we, ve due ken Shiria; nenge, mba ken Hasason-tamar (ka En-gedi je la).

³ Nahan cier Yehoshafati iyol, a ver ishima sha u keren TER; a yôô er i̱ hôr kwaghyan ken Yuda cii.

⁴ Nahan Yuda zua cii sha u keren iwasen hen TER; ve due ken agar a Yuda cii sha u va keren TER.

⁵ Tsô Yehoshafati kar za tile hen atô u ikpelaior i Yuda man Yerusalem, ken iyou i TER, sha ishigh ki tembe u he,

⁶ a kaa er: TERE, Aôndo u uter asev, We U ngu Aôndo u Sha gaa? Ka We U tem tor sha utor mba akuraior cii ye gaa? Ka sha uwegh Ough, tahav mbu lu kua agee kpaa ye, ka nahan man ma or á fatyô u hendan kwagh a We ga ye.

⁷ Aôndo wase, ka We man lu U zenda mba ve tema ken tar ne sha ishigh ki ior Ou Iserael kera, man U gema u, U na tsombor u ikaru Aberaham gbem gaa?

⁸ Nahan ve tema ker, ve maa U icighanjiir ken u, sha ci u iti You, er:

⁹ Aluer kwaghbo una tser se, shin sanker, shin mtsaha, shin bouange, shin ijen kpaa, sé va tile sha ishigh ki iyou ne, man sha ishigh You kpaa (gadia iti You ngi ken iyou ne), sé genger imo her a We ken ican yase man We kpaa Ú ungwa man Ú yima.

¹⁰ Yô, nenge, Mbaamon man Mbamoabi man mba sha uwo u Seir, mba U yange Mbaiserael u karen ken tar ve zum u ve due ken tar u Igipiti la, gadia ve kaha ape gen, ve de ve her, ve tim ve ga;

¹¹ nenge, imba iyev i ve oron se ne, er ve ve sha u va dughun se ken tar Wou kera, u U ne se dyako ne.

¹² Aôndo wase, Ú shi ôr ve ijir gaa? Gadia se mba a agee sha ikpelaior i vesen i i ve ityav hen vese ne ga, man se kera fa kwagh u sé er ga, kpa ashe ase nga sha awe.

¹³ Tsô Mbayuda cii tile sha ishigh ki TER, mbayev vev mba kiriki man kasev vev kua ônov vev kpaa.

¹⁴ Tsô Jijingi u TER sen her atô u ior sha Yahashiel wan u Sekaria, wan u Benaia, wan u Yeiel, wan u Matania, Orlevi u ken ônov mba Asav;

¹⁵ nahan a kaa er; Ver nen ato, ne Mbayuda cii, man ne mba ne tem ken Yerusalem, man we tor Yehoshafati kpaa; TER ngu kaan a ven nahan er: De cie nen ga, asema kpaa a̱ de yen ne sha ci u ikpelaior i vesen ne ga; gadia ityav ka mbi yenev ga, ka mbi Aôndo je.

¹⁶ Kper, sen nen za nôngo nen ityav a ve; nenge, mba kôndon sha mkende u Shise; nea kohol ve hen ikighir i pev sha ishigh ki desereti u Yeruel.

¹⁷ Ka ne né nôngo ityav mbin ga; wa nen ago iyol, tile nen ving, tsô né nenge myem u TER Una yima ne, we Yuda man Yerusalem; de cie nen ga, asema a̱ de yen ne kpaa ga; kper, due nen, nôngo nen ityav a ve, gadia TER ngu a ven.

¹⁸ Tsô Yehoshafati gure kuma icul inya; Yuda cii kua mba ve tem ken Yerusalem kpaa ve haa inya sha ishigh ki TER, ve civir TER.

¹⁹ Mbalevi mba ken ônov mba Mbakohati man ken ônov mba Mbakora, ve mough ve tile sha, ve civir TER, Aôndo u Iserael, sha imo i genger genger, tsung je.

²⁰ Ve mough pepe, ve za nyôr ken desereti u Tekoa; mba ngur yemen hemen yô, Yehoshafati tile sha, kaa er: Ungwam nen, Yuda, man ne mba ne tem ken Yerusalem! Na nen TER, Aôndo wen, jighjigh, ka nahan man né tile dông ye; uprofeti Nav kpaa na nen ve jighjigh, ka nahan man á kpe ne iyol ye.

²¹ Tsô a hen kwagh a ior, nahan a ver mbagenev er ve̱ wa atsam ve̱ wuese TER, ve̱ wuese a uicighanmbaakondov iyol, ve̱ zaan ikumutya ken hemen, ve̱ kaa er: Wuese nen TER, gadia erdoo Na ngu gbem sha won.

²² Zum u ve hii icam i wam man u wuese, yô, TER ver mbagenev myer er ve̱ kegh Mbaamon man Mbamoabi kua ior mba sha uwo u Seir, mba ve va ityav hen Yuda la; nahan i hemba ve je.

²³ Gadia Mbaamon man Mbamoabi, ve mough ityav a ior mba ve tem sha uwo u Seir la, er vea wua ve, vea tim ve purututu. Tsô, zum u ve wua ior mba ve tem sha Seir la, ve bee yô, ve gema ve gba timin ayol a ve.

²⁴ Zum u Yuda va hen igungu u mbakuran u a lu ken desereti la yô, ve nenge ikpelaior; yô, nenge, ve hingir akom hen inya gbulugh gbulugh, ma or môm nan war ga.

²⁵ Er Yehoshafati a ior nav ve va u yan ishar yô, ve zua a akaa her a ve kpishi; akondo kua ikav mbi hweev mbi injaav mbi ve kura sha ci u ayol a ve la, ngee je gande ve u yemen a mi cii; ayange atar je ve lu kuran ishar, gadia i ngee kpishi.

²⁶ Sha iyange i sha unyiin la, ve kohol shin Pev u Beraka, gadia ve wuese TER ker; ka nahan man i yilan ijiir la er, Pev u Beraka, zan zan nyian ye.

²⁷ Tsô ior i Yuda kua i Yerusalem cii gba hiden, Yehoshafati lu ve sha hemen; ve gba hiden ken Yerusalem a iember, gadia TER na ve iember ken asema sha mbaihomov vev.

²⁸ Tsô ve nyôr ken Yerusalem a mbaadiguve man umolo kua ikor i tôngon, ve za ken iyou i TER.

²⁹ Mcieryol u TER haa sha utor mba sha tar cii, zum u ve ungwa er TER A nenge ityav a mbaihomov mba Iserael yô.

³⁰ Nahan bem gba ken tar u Yehoshafati; gadia Aôndo na, na un mmem, hanma ian cii.

³¹ Yehoshafati tema tor sha Yuda; a lu anyom ikundugber kar ataan zum u a ya tor la, man a tema tor anyom ikundu kar ataan ken Yerusalem; iti i ngô na er Asuba wan u Shilhi.

³² A zende sha gbenda u ter na Asa, a kaha a undu u ga, a lu eren kwagh u jighilii sha ishigh ki TER.

³³ Nahan kpaa, i vihi ajiir a taven sha la, kera ga; ior kpaa lu a ver asema a ve sha Aôndo u uter vev ga.

³⁴ Aerenakaa a Yehoshafati agen, a hiihii man a masetyô cii, nenge, i nger a ken ruamabera u Yehu wan u Hanani, u i we ken ruamabera u utor mba Iserael la.

³⁵ Ken masejime ne yô, Yehoshafati tor u Yuda la, ya ikur a Ahashia tor u Iserael; un yô, eren ifer kpishi;

³⁶ a ya ikur a na er vea gba utso mba vea za a mi hen Tarshishi yô; ve er utso mbala ken Eshion-geber.

³⁷ Tsô Elieser wan u Dodavahu u Maresha ôr kwaghôron u profeti sha Yehoshafati, a kaa er: Er u ye ikur a Ahashia yô, TER tim ityom you kera. Nahan utso mbala hembe, ve kera fatyô u zan hen Tarshishi ga.