2 Kroniku 2 - ICIGHAN BIBILO

¹ Tsô Solomon ver ishima u maan iyou sha ci u iti i TER, man iyou i tor sha ci na kpaa.

² Nahan Solomon ver ior dubu akunduatargber mbatôônikav, man ior dubu akunduanyiin mbadughun awen sha iwo, man shi ior dubu utar man deri ataratar mbanengen sha a ve.

³ Shi Solomon tindi loho hen Huram tor u Tiru, a kaa er: Er lu u er a terem Davidi, u tindi un a ikon i sedar sha u i̱ maan un iyou i tsan ker la, yô, mo kpaa er a mo nahan.

⁴ Nenge, m ngu kohol iyol sha u maan iyou sha ci u iti i TER, Aôndo wam, sha u tseghan i sha ci Na, sha u nanden ilyôghonov mbi human doon sha ishigh Nagh, man shi sha ci u ubredi mba sha ishi mba lun her gbem la, man shi sha ci u iniav mbi nanden pepe man aikighe, sha ayange a memen sha iwer i he, man sha uiniongo mba i ver sha ashighe ashighe la, mba TER, Aôndo wase. Ka kwagh u Iserael una eren gbem je la.

⁵ Man iyou i me maa la, i kehe; gadia Aôndo wase gba ikôr hemba mbaaôndo mbagenev cii.

⁶ Kpaa ka an nana fatyô u maan Un iyougho? Gadia Sha man Sha u a hembe gban ca la je kpaa, fatyô u ngohol Un ga. Man mo m ngu nyi je u me maa Un iyou, saa di u nanden kwaghhumandoon sha ishigh nagh tsô gaa?

⁷ Yô, tindim a or u fan tom u zenaria man u azurfa man u togula man u iyôgh ki iligh, man u ikondo i nyian dindee, man i nyian bong, man i kwel, u nan fe eev; nana̱ va lu a mbafaneev mba ve lu a mo ken Yuda man ken Yerusalem, mba terem Davidi lu kohol la.

⁸ Shi tindim a ikon i sedar man i fer man i sandal i sha Lebanon; gadia m fa mbayev ou fa u gberen ikon sha Lebanon; yô, mbayev av vea lu a mbayev ou imôngo;

⁹ ve̱ kohol mo ikon kpishi; gadia iyou i me maa la, ia gba ikôr je, á kpiligh iyol.

¹⁰ Yô, kwagh u me na mbayev ou mba gberen ikon yô, ka alakema uikaren dubu ikundu, man shair uikaren dubu ikundu, man wain ubav dubu ikundu, kua mkurem ubav dubu ikundu.

¹¹ Tsô Huram tor u Tiru rumun, nger, tindi Solomon a mi, kaa er: Ka er ior mba Ter ve doo Un ishima man A ver u tor sha a ve ye.

¹² Shi Huram kaa er: I̱ wuese TER, Aôndo u Iserael, U A er Sha man tar, u A ne tor Davidi wan u fan kwagh u a iv a kwaghfan man mkav er una maa iyou sha ci u TER, man iyou sha ci u tor na kpaa.

¹³ Yô, m ngu tindin orfaneev u kaven kwagh doo doo, iti na er Huramabi,

¹⁴ ka wan u kwase u Mbadan, man ter na yô, gema lu Ortiru, u a fa tom u zenaria, man u azurfa, man u togula, man u iyôgh ki iligh, man u awen, man u ikon, man u ikondo i nyian dindee, man i kwel, man ikondo i pupuu i kôngor, man ikondo i nyian bong; ka or u fan eev, man u dughun hanma inja i uee; yô, a̱ lu a ior ou mba fan eev imôngo man shi a ior mba fan eev mba terem Davidi, teru.

¹⁵ Yô, terem a̱ tindi mbayev nav a alakema man shair man mkurem kua wain, akaa a terem a kaa la.

¹⁶ Se kpaa sé gber ikon sha uwo u Lebanon, er i sar u cii; sé tar i sé kor i, sé sen a mi shin zegemnger sé va na u hen Yopa; yô, we di ú tôô ú yem a mi sha Yerusalem.

¹⁷ Tsô Solomon ôr iyenge i akuraior agen a a lu ken tar u Iserael cii sha iyenge i Davidi ter na lu ôr ve yô, i zua a ve ior dubu deri môm kar dubu akunduahargber kar utar man deri ataratar.

¹⁸ Tsô a pande dubu akunduatargber, a ver ve er ve̱ kuran ikav, man dubu akunduanyiin er ve̱ dughun awen sha iwo, man ior dubu utar man deri ataratar er ve̱ nengen sha a ve, ve̱ naan ior tom.