2 Kroniku 19 - ICIGHAN BIBILO

¹ Tsô Yehoshafati tor u Yuda hide hen ya na ken Yerusalem doo doo.

² Ornengenakaa Yehu wan u Hanani, due va kegh un gbenda, a kaa a tor Yehoshafati er: Doo u ú wasen mbaafereve, man mba kôron TER ihom kpaa ve̱ doo u ishimaa? Sha ci u kwagh ne yô, iyugh i TER ngi van sha a we.

³ Nahan kpaa i zua a akaadoon her a we, gadia u vihi Asherim ken tar ne kera, shi u ver ishima u keren TER kpaa.

⁴ Tsô Yehoshafati maa a tema ken Yerusalem; a shi a due a gba zenden zan hen ior, a hii hen Bersheba zan zan za ar sha tar u iwoogh u Eferaim, a hire a ve hen TER, Aôndo u uter vev.

⁵ A ver mbaajiriv ken tar la, ken agar a lun a ugir ken Yuda, sha agar agar;

⁶ a kaa a mbaajiriv mbala er: Ver nen ishima sha kwagh u ne eren yô; gadia ne mba ôron ijir sha ci u or ga, kpa ka sha ci u TER; man Un ngu a ven imôngo hen ijir.

⁷ Yô, mciem ma cian TER ma lu sha a ven; ver nen ishima er nen nahan; gadia ma ifer ngi hen TER, Aôndo wase, man msange u sha dooshima kpaa ga, man u ngohol inyaregh ki yamen ishô kpaa ga.

⁸ Ken Yerusalem kpaa, Yehoshafati ver Mbalevi mbagenev kua upristi man mbahemenev mba sha uya mba uter mba Iserael sha ci u ijir i ôron i TER, man ijir i akaa a kperan. Tsô ve hide ken Yerusalem.

⁹ Man shi a wa ve kwagh, a kaa er: Er nen kwagh nahan sha mcie u cian TER la, sha ishima i veren man sha ishima i môm.

¹⁰ Hanma ijir i anmgbianev enev mba ve tem ken agar a ve, vea va a mi her a ven yô, shin a lu kwagh u iwooor shin kwagh u atindi kua atindiakaa man akaawan kua ajiraôron, wa nen ve kwagh, ve̱ de luun a ibo hen TER, er iyugh ia va sha a ven kua anmgbianev enev, ga; er nen nahan, tsô né kera lu a ibo ga.

¹¹ Nenge, pristi u tamen Amaria ngu nengen sha a ven sha akaa a TER cii; man Sebadia, wan u Ishemael, orvesen u sha ya u Yuda ngu nengen sha akaa a tor cii; man Mbalevi vea lu mbatomov sha ishigh yenegh. Lu nen taveraa, er nen nahan. TER A̱ lu a mbamimi!