2 Kroniku 18 - ICIGHAN BIBILO

¹ Tsô zum u Yehoshafati lu a inyaregh man icivir kpishi yô, a ya ikar a Ahaba sha kwase u eren.

² Anyom nga kar kpuaa yô, a za hen Ahaba ken Samaria. Nahan Ahaba sôngo un iyôngo man abua kpishi un kua ior mba ve lu a na imôngo, shi a za un iyol er a̱ za a na imôngo hen Ramoti-gileadi.

³ Tsô Ahaba tor u Iserael pine Yehoshafati tor u Yuda, er: Ú shi za a mo imôngo hen Ramoti-gileadi kpa? A gema a kaa a na er: Mo m ngu er we nahan, ior av kpaa mba er ior ou yô, sé lu a we imôngo ken ityav mbin.

⁴ Yehoshafati shi kaa a tor u Iserael er: Ma u shi vande pinen imo i TER.

⁵ Tsô tor u Iserael kohol uprofeti kuma ior deri unyiin, a kaa a ve er: Sé za sé za nôngo ityav a Ramoti-gileadi, shin m̱ de ze ga? Ve kaa a na er: Gba zan tsô; gadia Aôndo Una na un sha ikev i tor.

⁶ Kpa Yehoshafati kaa er: Profeti ugen u Aôndo ngu heen, er sé pine nan gaa?

⁷ Tor u Iserael kaa a Yehoshafati er: Or shi môm u sé pine nan imo i TER; kpa m kôr un ihom, gadia er ma kwaghôron u profeti u dedoo sha a mo ga, saa kwaghbo tseegh; ka Mikaia wan u Imla. Kpa Yehoshafati kaa er: Tor a̱ de kaan nahan ga.

⁸ Tsô tor u Iserael yila dugwer kaa er: Za, za va a Mikaia wan u Imla fefa.

⁹ Nahan tor u Iserael man Yehoshafati tor u Yuda ve tema, hanmô nan tema sha ikônough ki torough ki nan, a iwuhanev mbi torov iyol, hen vande u gbiren alakema hen hunda u nyôron ken Samaria la; uprofeti cii lu ôron kwaghôron u profeti sha ishiv vev.

¹⁰ Sedekia wan u Kenaana er akor a iyôô, a kaa er: TER ngu kaan nahan er: Ka sha a man ú mgbegha Mbashiria zan zan vea tim ye.

¹¹ Kape uprofeti cii ve ôr la, ve kaa er: Gba zan hen Ramoti-gileadi tsô, ú za hemba; gadia TER Una na un sha ikev i tor.

¹² Ortyom u a za u za yilan Mikaia la, kaa a na er: Nenge, uprofeti cii mba haan zwa môm, mba pasen kwagh u doon tor; yô, we kpaa, kwaghôron wou a̱ lu er kwaghôron u mô ve nahan, za ôr kwagh u dedoo.

¹³ Kpa Mikaia kaa er: Er TER A lu u uma ne, kwagh u Aôndo Una kaam yô, ka un me ôr ye.

¹⁴ Ve hen tor yô, tor pine un er: Mikaia sé za hen Ramoti-gileadi, sé za nôngo ityav, shin m̱ de ze ga? A kaa a na er: Gba zan tsô, ú za hemba; á na ve sha ikev you.

¹⁵ Tsô tor kaa a na er: Ka kwa me je man me na u, ú bum wer, ú gba ôron mo kwagh ugen ga, saa u mimi tseegh ken iti i TERE?

¹⁶ Nahan a kaa er: M nenge Iserael cii hingir kughukuku sha iwo, er iyôngo i i lu a orkuran ga yô; yô, TER kaa er: Mban mba a ter ga, nahan hanmô ve, nana̱ hide hen ya u nan bem bem.

¹⁷ Tsô tor u Iserael kaa a Yehoshafati er: Ashen m kaa a we je mer, una ôron kwagh u doon ga, saa u bo tsô gaa?

¹⁸ Shi a kaa er: Nahan yô, ungwa ase imo i TER; m nenge TER tema sha ikônough Nagh ki torough, akum a Sha cii tile Un ken uwegh ku yanegh kua ku imesegh kpaa.

¹⁹ Tsô, TER pine er: Ka an nana za mee Ahaba tor u Iserael er a̱ za ken num a̱ za kpe hen Ramoti-gileadi ase? Tsô ugen ôr kwagh nahan, ugen ôr di kwagh ugen kposo.

²⁰ Nahan jijingi ugen due va tile sha ishigh ki TER, kaa er: Mo me ze mee un. TER pine un er: Ka sha nyi?

²¹ A kaa er: Me due me hingir jijingi u aiegh ken zwa u profeti nav cii, A kaa er: We ú mee un, ú hemba un kpaa, za ase za er nahan.

²² Yô, nenge, TER ver jijingi u aiegh ken zwa u uprofeti ou mban; man TER gema ôr kwagh u bo sha a we.

²³ Tsô Sedekia wan u Kenaana kporom, ta Mikaia sambe sha henge, a kaa er: Ka sha hanma gbenda man Jijingi u TER A dugh her a mo kera, A za er kwagh a wee?

²⁴ Mikaia kaa er: Yô, sha iyange la ú nenge, zum u ú nyôr ken iyou i ker atô sha u yeren la.

²⁵ Tsô tor u Iserael kaa er: Kua nen a Mikaia hide nen a na hen Amon orkurangar, man hen Yoashi wan u tor;

²⁶ kaa nen ner, tor kaa nahan er: Wa nen or ne ken gaadi, koso nen un sha kwaghyan u ican kua mngerem ma icanem kpaa, zan zan me kar hiden bem bem.

²⁷ Tsô Mikaia kaa er: Aluer wea hide bem bem yô, TER ôr kwagh a mo ga. Shi a kaa er: Ne ior cii ungwa nen.

²⁸ Tsô tor u Iserael kua Yehoshafati tor u Yuda, ve gba kôndon zan sha Ramoti-gileadi.

²⁹ Nahan tor u Iserael kaa a Yehoshafati er: Me gema iyol, man me nyôr ken utya ye; kpa we yô, haa ikav mbi torov. Tsô tor u Iserael gema iyol; maa ve nyôr ken utya je.

³⁰ Yô, tor u Shiria wa mbahemenev mba akeke a na kwagh, a kaa er: De nenge nen ityav a mbakiriki shin mbavesen kpaa ga, saa tor u Iserael tseegh.

³¹ Tsô er mbahemenev mba akeke nenge a Yehoshafati yô, ve kaa er: Ka tor u Iserael je ne. Nahan ve gema er vea nôngo ityav a na; kpa Yehoshafati genger imo, TER kpaa wase un, Aôndo yange ve, nahan ve de un.

³² Tsô er mbahemenev mba akeke za kav er i lu tor u Iserael ga yô, ve hide ve de u zendan un ijime.

³³ Tsô orgen henda ada gba keren ivaan abu tsô, za ta tor u Iserael hen ijuwan i ikav mbi utyav mbi yisan iyol a mi la; nahan a kaa a or u kôôm ikyekye na la er: Gema, hide ijime due a mo ken utya kera, gadia i vihim iyol.

³⁴ Ityav seer taver sha iyange la; tor u Iserael yier shin ikyekye, a ver ishigh ken Mbashiria zan zan aikighe; iyange i been yô, a maa a kpe.