2 Kroniku 17 - ICIGHAN BIBILO

¹ Wan na, Yehoshafati tema tor sha ityough nagh; nahan a wa ago iyol sha u nôngon ityav a Iserael.

² A ver mbanôngontyav ken agar a Yuda a lun a ugil cii, shi a ver mbakuran ken tar u Yuda kua ken agar a Eferaim a ter na Asa lu ngohol la.

³ TER lu a Yehoshafati, gadia a lu zan sha gbenda u ter na Davidi vande zan la; a ker Ubaal ga,

⁴ kpa a ker Aôndo u ter na, a zenden sha atindi a Na, a er er Iserael nahan ga.

⁵ Ka nahan man TER taver tor na sha ikev na ye; Yuda cii vaan a iwua va nan Yehoshafati; nahan a lu a inyaregh man icivir kpishi.

⁶ Ishima taver un u zan sha igbenda i TER; shi a vihi ajiir a taven sha kua Asherim ken Yuda kera.

⁷ Sha inyom i sha utar i a tema tor la, a tindi atiator a na Benhail man Obadia man Sekaria man Netanel kua Mikaia er ve̱ za tese ken agar a Yuda,

⁸ kua Mbalevi kpaa a ve imôngo, lu: Shemaia man Netania man Sebadia man Asahel man Shemiramoti man Yehonatan man Adoniya man Tobiya man Tobadoniya, ka Mbalevi je la, kua upristi Elishama man Yehoram, a ve imôngo.

⁹ Ve tese ken Yuda, ve lu a ruamabera u atindiakaa a TER, ve zende ken agar a Yuda cii, ve lu tesen ior.

¹⁰ Tsô mcieryol u TER haa sha ityar i i ningir Yuda la cii, nahan ve kera nôngo ityav a Yehoshafati ga.

¹¹ Mbafiliti mbagenev va na Yehoshafati iwua man kpandegh sha tihi azurfa. Mbaarabia kpaa va na un akumauile: anomaiyôngo dubu utaan kar uhar man deri utaankaruhar, ukpev kpaa lu dubu utaankaruhar man deri utaankaruhar.

¹² Nahan Yehoshafati seer taver a taver kpishi je; a maa ayouautya ken agar a Yuda, kua agar a ombon akaa ker.

¹³ A ombo akaa kpishi ken agar a Yuda; a ver mbautyav ken Yerusalem, lu anomaior a ageegh.

¹⁴ Iyenge ve sha uya mba uter vev yô, ka i ne: Ken Yuda, mbahemenev mba nengen sha ior dubu dubu, lu Adena orhemen, a anomaior a ageegh dubu deri utar a na imôngo;

¹⁵ u dondon sha a na yô, lu Yehohanan orhemen, a ior dubu deri uhar man akunduanyiin a na imôngo;

¹⁶ u dondon sha a na yô, lu Amashia wan u Shikeri, u a na iyol na sha ikev i TER gbar gbar la, man anomaior a ageegh dubu deri uhar a na imôngo;

¹⁷ man hen Benyamin yô, lu Eliada nomor u ageegh, a ior dubu deri uhar mba lun a ada kua perutya a na imôngo;

¹⁸ u dondon sha a na yô, lu Yehoshabadi a ior dubu deri man akunduanyiin mba ve wa ago iyol sha utya a na imôngo.

¹⁹ Mban lu mbaeren tor tom, seer sha mba tor ver ve ken agar a Yuda a lun a ugil la cii.