2 Kroniku 16 - ICIGHAN BIBILO

¹ Sha inyom i ikundugber kar ataratar i Asa tema tor la yô, Baasha tor u Iserael kôndo sha u za nôngon ityav a Yuda, a maa Rama sha u una yange hanma or nana̱ de dugh shin nana̱ nyôr hen Asa tor u Yuda ga.

² Nahan Asa kura azurfa man zenaria ken ayou a koson akaa ker, a ken iyou i TER, kua ken iyou i tor la, a tindi i za na Benhada tor u Shiria u a lu ken Damaseku la, a kaa er:

³ Ikuryan ngi hen atô wam a we, er i lu hen atô u terem a teru nahan; nenge, m tindi u a azurfa man zenaria, yô, za bunde ikuryan you a Baasha tor u Iserael la, sha u a̱ mough hen mo kera, a̱ dem yô.

⁴ Tsô Benhada ungwa imo i tor Asa, nahan a tindi mbahemenev mba akumautya na er ve̱ za nôngo ityav a agar a Iserael; ve hemba Iyon man Dan man Abelmaim kua agar a ombon iyiav a Nafetali cii.

⁵ Tsô er Baasha ungwa nahan yô, a de u maan Rama, a undu tom na.

⁶ Nahan tor Asa lôhô Yuda cii, ve za kura awen a Rama kua ikpande i Baasha maan a mi la; tsô a za maa Geba man Misepa a mi.

⁷ Sha shighe la ornengenakaa Hanani, va hen Asa tor u Yuda, va kaa a na er: Er u suur sha tor u Shiria, u kera suur sha TER, Aôndo wou, ga yô, nahan ikumutya i tor u Shiria war sha ikev you je ve.

⁸ Mbakushi man Mbalibia ve lu zegeikum a akekeautya man mbaanyinyav kpishi dumbur je gaa? Nahan kpaa er u suur sha TER yô, A na ve sha ikev you.

⁹ Gadia ashe a TER nga jingen sha akaa a sha won cii, sha u Una pase agee Na hen mba asema a ve a lu jighilaa her a Na yô. Sha kwagh ne yô, u er ibumekwagh; gadia hii hegen je ityav mbia za u iyol.

¹⁰ Tsô ishima nyoon Asa a ornengenakaa la, a wa un ken gaadi, gadia ishima vihi un a na kpishi sha ci u kwagh ne. Man shi Asa er ior mbagenev ican hen shighe la kpaa.

¹¹ Nenge, aerenakaa a Asa a hiihii man a masetyô cii, i nger a ken ruamabera u utor mba Yuda man mba Iserael.

¹² Sha inyom i sha ikundugber kar utaankarunyiin i Asa tema tor la, angev kôr un shin angahar; angev nav mbula nyoon un ngeegh, nahan kpaa ken angev nav a ker iwasen hen TER ga, kpa a gema a lu keren iwasen hen mbaucimbiv.

¹³ Tsô Asa yav a uter nav imôngo, a kpe sha inyom i sha akunduahar kar môm i a tema tor la.

¹⁴ Ve ii un ken uwar na u a time sha ci na iyol na ken gar u Davidi yô; i gbir un sha gambe u a mgbough a ilôghonov mbi human doon atô kposo kposo, mbi i nongo mbi sha mfe u orfan u nungwan kwaghhumandoon yô, ve nande kwaghhumandoon kpishi sha ci na.