2 Kroniku 15 - ICIGHAN BIBILO

¹ Tsô Jijingi u TER sen sha Asaria wan u Obedi;

² nahan a mough a za kegh Asa gbenda; a kaa a na er: Ungwam nen, we Asa, kua Yuda cii man Benyamin; TER ngu a ven, er ne lu a Na yô; aluer né ker Un yô, né zua a Na je; kpa aluer né undu Un yô, Un kpaa Una undu ne.

³ Nenge, ayange vese je, Iserael lu a Aôndo u mimi ga, pristi u tesen kwagh lu ga, man atindi kpaa lu ga,

⁴ kpa er ve hide hen TER, Aôndo u Iserael, ve ker Un zum u ican er ve la, ve zua a Na.

⁵ Sha ayange la bem lu a or u duen man a or u nyôron kpaa ga, kpa atsan kpishi lu sha ior mba ve tema ken ityar la cii.

⁶ Ikurior igen lu ihom a ikurior igen, gar ugen lu ihom a gar ugen, gadia Aôndo nzughul a ve sha akaa a tseren ve kposo kposo.

⁷ Kpa ne yô, taver nen ayol, ave a̱ de kpeen ne ga, gadia á na ne injar sha tom wen.

⁸ Zum u Asa ungwa kwaghôron ne, man mpase u profeti Obedi yô, a taver ishima, a due a akaa a hôngorough ken tar u Yuda man Benyamin kera cii, man ken agar a a ngohol sha tar u iwoogh u Eferaim la kpaa; shi a sôr atse a TER a nanden nagh sha mi a a lu sha ishigh ki puadwer u TER la.

⁹ Nahan a kohol Yuda cii kua Benyamin man ushirmbaiorov mba ve tem a ve, mba ve due ken Eferaim man Manase kua ken Simeon, gadia ior kpishi due ken Iserael va kohol un er ve nenge TER, Aôndo na, lu a na yô.

¹⁰ Nahan ve kohol ken Yerusalem sha uwer u sha utar, sha inyom i sha pue kar utaan i Asa tema tor la;

¹¹ ve na TER nagh sha iyange la, sha ishar i ve va a mi yô, ibua deri utaankaruhar man iyôngo dubu utaankaruhar.

¹² Shi ve ya ikur er vea ker TER, Aôndo u uter vev, a ishima ve cii kua uma ve cii;

¹³ man aluer anti or nana ker TER, Aôndo u Iserael ga yô, á wua nan, a lu wanye shin orvesen shin nomsoor shin kwase kpaa.

¹⁴ Ve bum a TER sha imo i taver man a iember sha ibusa man ikor i tôngon.

¹⁵ Yuda cii ember sha ci mbum la; gadia ve bum a ishima ve i môm je, shi ve ker Un sha gbashima kpaa, nahan ve zua a Na; TER kpaa na ve mmem hen ningir la cii.

¹⁶ A dugh Maaka, ngô u tor Asa, ken nagbaa kera, gadia a er eev mbu ndôhôr ishima sha ci u Ashera; Asa vihi eev nav mbula kera, hembe mbu avur avur, nande mbu shin uwagh u Kideron.

¹⁷ Kpa i vihi ajiir a taven sha a hen Iserael la kera ga; nahan kpaa ishima i Asa lu jighilii sha ayange na cii.

¹⁸ Akaa a ter na lu tsegha la, kua a un iyol na kpaa tsegha la, azurfa man zenaria kua ikav kposo kposo, a va ver a ken iyou i TER Aôndo.

¹⁹ I kera nôngo ityav ga zan zan anyom ikundugber kar ataan a Asa tema tor la.