2 Kroniku 12 - ICIGHAN BIBILO

¹ Tsô zum u tor u Rehobiam taver man a lu a agee kpaa yô, a gema a undu atindiakaa a TER, un kua Iserael cii.

² Nahan sha inyom i sha utaan i tor Rehobiam la yô, Shishaki tor u Igipiti kôndo sha u va nôngon ityav a Yerusalem, sha ci u ve er TER kwaghbo yô,

³ a va a akekeautya dubu man deri uhar man mbaanyinyav dubu akunduatar; man ior mba ve va a na ken Igipiti yô, gande u ôron, Mbalibia man Mbasuki kua Mbaetiopia.

⁴ A ngohol agar a Yuda a lun a ugir man a mase van ken Yerusalem ye.

⁵ Tsô profeti Shemaia va hen Rehobiam man hen atiator a Yuda mba ve kohol ken Yerusalem sha ci u kwagh u Shishaki yô, a kaa a ve er: TER ngu kaan nahan er: Ne ne tam kera, ka nahan man Mo kpaa Me na ne sha ikev i Shishaki ye.

⁶ Tsô atiator a Iserael kua tor kpaa ve hide ayol a ve ijime, ve kaa er: TER ka u perapera je.

⁷ Er TER nenge ve hide ayol a ve ijime nahan yô, imo i TER va hen Shemaia, A kaa er: Ve hide ayol a ve ijime, nahan Me tim ve ga, shin ciôn Me yima ve; ka sha ikev i Shishaki man á haa iyugh Yam sha Yerusalem ga.

⁸ Nahan kpaa vea lu ikpan na, sha u ve̱ fa er tom Wam u lu man er tom u utor mba ityar igen di u lu yô.

⁹ Tsô Shishaki tor u Igipiti kôndo sha u va nôngon ityav a Yerusalem, a kura ikav mbi injaav mbi ken iyou i TER, kua ikav mbi injaav mbi ken iyou i tor; a kura ca ca; shi a kura iperutya i zenaria i Solomon er la kpaa.

¹⁰ Nahan tor Rehobiam gema er iperutya igen sha togula sha ityouv mbi ingila, a ver i sha ikev i mbahemenev mba mbakuran, mba ve kuran hundaya u tor yô.

¹¹ Tsô hanma shighe u tor una nyôron ken iyou i TER yô, mbakuran ve tôô i man ve shi ve hide a i ken iyou i mbakuran.

¹² Er a hire a iyol na ijime nahan yô, iyugh i TER kar her a na kera, nahan A kera tim un ca ca ga; akaadoon agen lu ken Yuda kpaa.

¹³ Tsô tor Rehobiam seer taver ken Yerusalem, a tema tor; Rehobiam lu anyom akunduahar kar môm zum u a ya tor la, a tema tor anyom pue kar ataankarahar ken Yerusalem, ka gar u TER tsuwa ken ikwe i Iserael cii, er Una ver iti Na ker la; iti i ngô na er Naama, wan u Mbaamon.

¹⁴ A er ifer, gadia a ver ishima u keren TER ga.

¹⁵ Aerenakaa a Rebobiam a hiihii man a masetyô yô, i nger a ken akaaôron a profeti Shemaia man a Ido ornengenakaa, sha inja i takerada u icombor la gaa? Ityav lu hen atô u Rehobiam a Yerobiam gbem.

¹⁶ Tsô Rehobiam yav a uter nav imôngo, i ii un ken gar u Davidi; wan na Abiya tema tor sha ityough nagh.