2 Kroniku 10 - ICIGHAN BIBILO

¹ Tsô Rehobiam za ken Shekem, gadia Iserael cii va hen Shekem sha u va kôron un tor.

² Er Yerobiam wan u Nebati, ungwa nahan yô (gadia a lu ken Igipiti, henpe a yevese tor Solomon a za lu la), nahan Yerobiam maa mough ken Igipiti hide.

³ Ve tindi i za yila un; tsô Yerobiam a Iserael cii ve va, ve va ôr kwagh a Rehobiam, ve kaa er:

⁴ Teru lu wa se ikav mbi yuhwan; yô, shi pande se tom u ican u teru man ikav nav mbi yuhwan mbi a wa se ne, nahan yô, sé rumun we.

⁵ A kaa a ve er: Ayange á kar atar yô, shi hide nen her a mo. Maa ior hembe yem.

⁶ Nahan tor Rehobiam tume idyu a mbatamen mba iyange ve tilen sha ishigh ki ter na Solomon, shighen u a lu uma la. A pine er: Mnenge wen yô, ngu nana, sha kwagh u me kaa ior mbana?

⁷ Ve kaa a na er: Aluer wea er a ior mban doo doo, wea er sha ishima ve, wea ôr kwagh a ve sar sar yô, nahan vea hingir mbatomov ou gbem je.

⁸ Kpa a ta imo i mbatamen ve kaa un la kera, a gema a hen kwagh a mbayev mba ve lu kwav a na, ve tilen sha ishigh nagh yô.

⁹ A pine ve er: Mhen wen yô, ngu nana, sha kwagh u se̱ kaa ior mban mba ve er kwagh a mo, ve pinim er: Heghem se ikav mbi teru lu wa se la?

¹⁰ Tsô mbayev mba ve lu kwav a na la, ve kaa a na er: Yô, kaa ior mba ve er kwagh a we mban, ve kaan er: Teru wa se ikav mbi yuhwan, kpa we yô, pande se mbi la; kaa a ve nahan wer: Ihôwe-ikumbul wam hemba kehen a iwenge i terem.

¹¹ Yô, aluer terem lu wan ne ikav mbi yuhwan yô, mo me seer ne mbi; aluer terem lu tsahan ne sha akpa, mo me tsaha ne sha kwagir.

¹² Tsô Yerobiam a ior cii ve va hen Rehobiam sha iyange i sha utar, sha imo i tor kaa a ve la yô, er: Shi va nen her a mo sha iyange i sha utar la.

¹³ Nahan tor gema ôr kwagh a ve sha tswam; tor Rehobiam venda imo i mbatamen la,

¹⁴ a gema a ôr ve kwagh sha imo i mbayevikaior mbala, a kaa er: Terem lu wan ne ikav mbi yuhwan, mo me seer ne mbi; terem tsaha ne sha akpa, mo me gema me tsaha ne sha kwagir.

¹⁵ Kape tor wa ior iko ga la; gadia lu sha awashima u Aôndo je, sha er TER Una kure kwaghôron Na u Ahiya Orshilon ôr a Yerobiam wan u Nebati sha imo i TER la.

¹⁶ Zum u Iserael cii ve nenge er tor wa ve iko ga yô, ior gema kaa a tor er: Kwar wase shi ngu ken Davidi hana? Se kera mba a dyako ken wan u Yese kpaa ga; hanma or nana̱ yem hen tenti u nan, ne Iserael. Yô, gba nôngon sha ya wou iyol you tsô, Davidi. Nahan Iserael cii ve hembe ve yem hen utenti vev.

¹⁷ Kpa Mbaiserael mba ve lu ken agar a Yuda yô, Rehobiam tema tor sha a ve.

¹⁸ Nahan tor Rehobiam tindi Hadoram u a lu nengen sha mbatomov mba i kighir ve a tom la; kpa Mbaiserael ta un awen, ve wua. Tsô tor Rehobiam unde ikyekye na fefa sha u yevese yemen ken Yerusalem.

¹⁹ Kape Iserael hendan a ya u Davidi la, zan zan nyian ne.