2 Kroniku 1 - ICIGHAN BIBILO

¹ Tsô Solomon wan u Davidi taver sha tor na, TER, Aôndo na, lu a na, A kende a na sha kpishi.

² Nahan Solomon ôr kwagh a Iserael cii, a mbahemenev mba ve lu a ior dubu dubu sha ikev, man mba ve lu a ior deri deri sha ikev, man a mbaajiriv, man shi a hanma ityoor u ken Iserael cii, ka mbatamen mba sha uya mba uter je la.

³ Tsô Solomon kua mkohol u ior cii, ve kôndo, ve za sha ijiir i taven sha i i lu hen Gibeon la, gadia ka her man tenti u kohol ker u Aôndo, u Mose wanakiriki u TER er ken ikôngo la, lu ye.

⁴ Kpa Davidi vande tôôn areki u Aôndo ken Kiriati-yearim kera ve, a va a mi hen ijiir i Davidi sôr sha ci na la; gadia a tim un tenti ken Yerusalem.

⁵ Atse a nanden nagh sha mi a togula, a Besalel, wan u Uri, wan u Hur, er la yô, lu her, sha ishigh ki tabernakel u TER; Solomon man mkohol u ior ve za her a.

⁶ Solomon za na nagh heregh sha atse a togula sha ishigh ki TER, a a lu hen tenti u kohol ker la; a na iniav mbi nanden sha a kuma dubu.

⁷ Hen tugh mbula je, Aôndo ande hen Solomon, A kaa a na er: Sônom kwagh u a sar u u M̱ na u yô.

⁸ Tsô Solomon kaa a Aôndo er: U tese terem Davidi erdoo u vesen, man U verem tor sha ityough nagh.

⁹ Hegen yô, TERE, Aôndo, ityendezwa You a terem Davidi i kure sha mi vough; gadia U verem tor sha ior ngee er vuulevu u hen inya nahan.

¹⁰ Yô, nam mkav man mfe sha u m̱ duen, m̱ nyôron sha ishigh ki ior mban; gadia ka anti je nana fatyô u ôron imbaikpelaior You ne ijiri?

¹¹ Tsô Aôndo kaa a Solomon er: Er kwagh ne a lu u ken ishima, u sen inyaregh shin mkpeyol shin icivir shin u wuan mba ve ker u ihom kpaa ga, man u sen u tsan sha won kpaa ga, kpaa u gem u sen mkav man mfe, sha er ú fatyô u ôron ior Av ijir, mba M ver u tor sha a ve yô;

¹² yô, mkav man mfe la i na u ve; shi Me na u inyaregh man mkpeyol man icivir, imba i ma tor ugen u nan vande lun a we nan lu a min ga, man shi ma or môm kpaa nana kera zua a mi ken ijime you nahan ga.

¹³ Nahan Solomon mough sha ijiir i taven sha i sha Gibeon la, sha ishigh ki tenti u kohol ker, a hide hen Yerusalem, a va tema tor sha Iserael.

¹⁴ Tsô Solomon kohol akekeautya man mbaanyinyav; a lu a akeke dubu man deri unyiin man mbaanyinyav dubu pue kar uhar, mba a ver ve ken agar a akeke a lu ker yô, man hen tor ken Yerusalem kpaa.

¹⁵ Tor er azurfa man zenaria ngee hingir er awen nahan ken Yerusalem, man ikon i sedar kpaa ngee hingir er ikon i tur shin pev nahan, ngee je, gande.

¹⁶ Anyinya a Solomon lu a mi yô, ka ken Igipiti man ken Kue i za vaan a a ye; mbakasuav mba tor, za yamen a ken Kue sha ishe i a vough.

¹⁷ Ikyekye i ka a za va a mi ken Igipiti la, i tee i sha ushekel mba azurfa deri ataratar, nyinya yô, sha ushekel deri man akunduahargber; kape i vaan a mi, i va teen utor mba Hiti man Mbashiria kpaa la.