1 Yohane 5 - ICIGHAN BIBILO

¹ Hanma or u nan ne jighjigh er Yesu ka Kristu yô, ka Aôndo A mar nan ye, man hanma or u Ter A doo nan ishima yô, un u A mar la kpaa, una doo nan ishima.

² Ka sha kwagh ne man se fe er ônov mba Aôndo ve doo se ishima ye, aluer Aôndo doo se ishima man se eren atindi a Na kpaa yô.

³ Gadia ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.

⁴ Gadia hanma kwagh u Aôndo A mar yô, hembe tar; man mhembe shon u a hembe tar yô, ka un ne; ka jighjigh wase u nan.

⁵ Ka anti nan hembe tara, saa di u nan ne jighjigh er Yesu ka Wan u Aôndo la gaa?

⁶ Ka Un u A ve sha mnger man awambe la, ka Yesu Kristu je la. Ka sha mnger tseegh ga, kpa ka sha mnger kua sha awambe kpaa. Ka Jijingi A eren shiada ye, gadia Jijingi ka u mimi je.

⁷ Mba ve eren shiada [Sha] yô, mba utar [ka Ter man Imo man Icighan Jijingi, man mba utar mban yô, ka môm.

⁸ Man mba ve eren shiada shin tar yô, mba utar] ka Jijingi man mngerem man awambe; mba utar mban cii ve zua ken u môm.

⁹ Aluer se rumun shiada u ior kpaa shiada u Aôndo hemba; gadia shiada u Aôndo yô, ka sha kwagh u Wan Na A er shiada ye.

¹⁰ Or u nan ne Wan u Aôndo jighjigh yô, nan ngu a shiada ne ken a nan. U nan ne Aôndo jighjigh ga yô, nan yila Un aie je ve, gadia nan na shiada u Aôndo A er sha kwagh u Wan Na la jighjigh ga.

¹¹ Shiada la yô, ka un ne: Aôndo na se uma u tsôron, man uma ne yô, ka ken Wan Na a lu ye.

¹² U nan lu a Wan yô, nan ngu a uma; u nan lu a Wan u Aôndo ga yô, nan ngu a uma ga.

¹³ Akaa ne m nger ne a, ne mba ne ne iti i Wan u Aôndo jighjigh yô, sha u fa nen er ne lu a uma u tsôron yô.

¹⁴ Ka vangertiôr wase u se lu a mi sha ishigh Nagh ne: ka sea sôn nyityô kwagh u a lu sha ishima Na vough yô, A ungwa se.

¹⁵ Aluer se fa, ngu ungwan hanma kwagh u se sen yô, shi se fa, se mba zuan a mbamsen mba se sen Un la cii.

¹⁶ Aluer anti or nana nenge anmgbian u nan una lu eren isholibo i i lu u zan ken ku ga yô, nana er msen, tsô Aôndo Una na nan uma, ka mba ve eren isholibo i zan ken ku ga la. Isholibo i zan ken ku kpaa ngi. Ka sha ci u ngila man m kaa mer nana̱ er msen ga.

¹⁷ Hanma kwagh u a lu u perapera ga yô, ka isholibo je; kpa isholibo igen yô, ka u zan ken ku ga.

¹⁸ Se fa, hanma or u Aôndo mar nan yô, nan eren isholibo ga, kpa u Aôndo a mar nan yô, nan kor a kura iyol i nan, mayange Orbo benden nan ga.

¹⁹ Se fa se due ken Aôndo, kpa tar cii ngu sha ikev i Orbo.

²⁰ Man shi se fa Wan u Aôndo va kera ve; A na se mkav sha u se̱ fa Un u A lu u mimi la, man se mba ken Un u A lu u mimi la, ka ken Wan Na Yesu Kristu je la. Ngun ka Aôndo u mimi man shi uma u tsôron kpaa.

²¹ Mbayev av, kemen nen ayol sha akombo.