1 Yohane 2 - ICIGHAN BIBILO

¹ Mbayev av, akaa ne m ngu ngeren ne a sha u de kera eren nen isholibo ga yô. Aluer anti or nana er isholibo kpaa, se mba a Orwasen hen Ter, Yesu Kristu Orperapera.

² Ka Un je A lu iwom i asorabo ase ye, man ka a ase tseegh ga, kpa ka a tar cii je.

³ Ka sha kwagh ne je man se fa er se fe Un ye, aluer sea kuran atindi a Na yô.

⁴ U nan kaa er: M fa Un, kpa nan kera we atindi a Na iko ga yô, nan ngu or u aiegh je, mimi ngu ken a nan ga.

⁵ Kpa u nan we kwaghôron Na iko yô, mimi je ka ken a nan man dooshima u Aôndo a kom vough ye.

⁶ U nan kaa er nan ngu ken a Na je yô, ka u nana zenden er Un lu zenden nahan keng.

⁷ Ne mbadoon mo ishima, ka ma tindi u he m ngeren ne ga, kpa ka tindi u tse u ne lu a mi sha hiihii je la kwaghôron u ne ungwa la, ka un a lu tindi u tse la ye.

⁸ Nahan kpaa ka tindi u he m ngeren ne ye, u a lu mimi ken a Na man shi ken a ven kpaa, gadia ime ngi karen man iwanger i mimi gba mondon ve.

⁹ U nan kaa er nan ngu ken iwanger, kpa nan gem nan ker anmgbian u nan ihom yô, nan ngu ken ime heregh.

¹⁰ U anmgbian u nan a doo nan ishima yô, ka ken iwanger nan lu ye, ityôkwagh i nan gbev mbu nôngon ngi ken a nan je ga.

¹¹ U nan ker anmgbian u nan ihom yô, nan ngu ken ime shi nan zenden ken ime kpaa, nan fa henpe nan ze kpaa ga, gadia ime pir nan ashe.

¹² M ngu ngeren ne, mbayev av, gadia i de ne asorabo a en sha ci u iti Na.

¹³ M ngu ngeren ne, uter, gadia ne fa Un u A lu sha hiihii je yô. M nger ne ikaior gadia ne hemba Orbo.

¹⁴ M nger ne mbayev gadia ne fa Ter. M nger ne uter gadia ne fa Un u A lu sha hiihii je yô. M nger ne ikaior gadia ne taver iyol man kwaghôron u Aôndo kpaa ngu ken a ven man ne hemba Orbo.

¹⁵ Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga.

¹⁶ Gadia akaa a a lu shin tar cii, isharen i iyolough, man isharen i ashee man ihagh i uma ne, ka a Ter ga, ka a taregh tsô.

¹⁷ Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.

¹⁸ Mbayev, ka shighe u masetyô je ne, man er ne ungwa ner Antikristu ngu van yô, shin hegen je kpaa Mbaantikristu due, mba imôngo je, ka nahan man se fe er i lu shighe u masetyô je ne ye.

¹⁹ Ve due ken vese, kpa ve lu mba ken a vese ga, gadia vea lu mba ken a vese yô, ma ve lu a vese heregh, kpa ve due sha u á pase er i lu ve cii ve lu ken vese ga yô.

²⁰ Kpa ne yô, ne mba a mshigh u u A lu Icighan la, ne cii, ne fa.

²¹ M nger ne ka sha ci u ne lan mimi ga, kpa ka sha ci u ne fe un, man ken mimi yô, ma aie ngu ga.

²² Ka an nan lu or u aieghe, saa di u nan nyiman er Yesu ka Kristu ga la? Ka nan je nan lu Antikristu ye, u nan nyiman Ter man Wan la.

²³ Hanma or u nan nyiman Wan la, Ter kpaa nan ngu a Na ga; u nan pasen Wan ken igbar yô, nan ngu a Ter kpaa.

²⁴ Ne yô, kwagh u ne ungwa sha hiihii je yô, a̱ lu ken a ven; aluer kwagh u ne ungwa sha hiihii la una lu ken a ven yô, ne kpaa né lu ken Wan man ken Ter kpaa.

²⁵ Man ityendezwa i A tende a vese ne yô, ka uma u tsôron.

²⁶ Akaa ne m nger ne ka sha kwagh u mba ve nenge u mgbeghan ne sha gbenda kera la.

²⁷ Kpa ne yô, mshigh u ne zua a mi her a Na la, ngu lun ken a ven, kera gba u ma or nana tese ne ga, kpa mshigh Na ne, a tesen ne kwagh sha akaa cii, un ka u mimi, ka u aiegh ga, man er a tese ne nahan yô, lu nen ken a Na kpaa.

²⁸ Hegen yô, mbayev av, lu nen ken a Na sha er, aluer á va pase Un yô, sé lu vangertiôr, kunya u̱ de ker se sha ishigh Nagh sha m-ande Na la ga.

²⁹ Aluer ne fa er A lu u perapera yô, ne fa hanma or u eren perapera yô, ka Un a mar nan ye.