1 Utor 9 - ICIGHAN BIBILO

¹ Tsô zum u Solomon bee u maan iyou i TER kua iyou i tor, man hanma kwagh u a sar Solomon u eren cii yô,

² TER shi ande hen Solomon m-ande u sha kwa har, er lu ande her a na hen Gibeon nahan.

³ TER kaa a na er: M ungwa msen wou man zamber wou u u zamber sha ishigh Yagh yô; M tsegha iyou i u maa ne, m ver iti Yam Mer i̱ lu her gbem; ashe Am kua ishima Yam kpaa vea lu sha i gbem.

⁴ Man we yô, aluer wea zenden sha ishigh Yagh, er teru Davidi nahan a ishima i wang man sha perapera, wea eren akaa a M kaa u cii, wea veren ishima sha akaawan a Am man ajiraôron a Am yô,

⁵ Mo kpaa Me taver ikônough you ki torough sha Iserael gbem sha won, sha ityendezwa i M tôndo a teru Davidi Mer, ú ban a or u nana tema sha ikônough ki torough ki Iserael ga la.

⁶ Kpa aluer ne de u dondon Mo, ne shin ônov enev, nea waan atindi Am man akaawan a Am a M ver sha ishigh yenegh la iko ga, nea gema nea za civir mbaaôndo mbagenev nea gure nea civir ve yô,

⁷ Me dugh Iserael ken tar u M ne ve ne kera, man iyou i M tsegh sha ci u iti Yam ne, Me kar a i sha ishigh Yagh kera; Iserael una hingir kwagh u wan ishenge a min ken akuraior cii;

⁸ shin er iyou ne i gbe ikôr nahan kpaa, hanma or u nana kar hen i cii, á kpiligh nan iyol, nana gbidye vaa; man shi vea kaa er: Ka nyi man TER A er a tar ne kua iyou ne nahana?

⁹ Nahan vea gema á kaa er: Ka sha ci u ve undu TER, Aôndo ve, u A due a uter vev ken tar u Igipiti, ve gem ve ker mbaaôndo mbagenev ve gur ve civir ve, ve er ve tom kpaa yô; ka nahan man TER A ve a kwaghbo ne cii sha a ve nahan ye.

¹⁰ Tsô anyom ikundu a Solomon maa ayou ahar la nga kar yô, ka iyou i TER kua iyou i tor je la,

¹¹ (Hiram tor u Tiru yô, na Solomon ikon i sedar man ikon i fer kua zenaria, er i sar un cii), nahan tor Solomon na Hiram agar ikundu ken tar u Galilia.

¹² Nahan Hiram due ken tar u Tiru sha u va nengen agar a Solomon na un la, kpa a doo un ga.

¹³ Tsô a gema a kaa er: Ka nyi agar u nem ne nahana, anngômô? Nahan maa a ii a iti er, Tar u Kabul, zan zan nyian.

¹⁴ Hiram kpaa tindi tor a utalenti mba zenaria deri man ikundu.

¹⁵ Ityôkwagh i tor Solomon kighir ior a tom yô, lu sha ci u maan iyou i TER man iyou na man Milo man gilgar u Yerusalem man Hasor man Megido kua Geser.

¹⁶ Farao tor u Igipiti vande kôndon, ngohol Geser, nande un sha usu, wua Mbakanaan mba ve tema ken gar la, gema na wan na u kwase iwua, kwase u Solomon la.

¹⁷ Nahan Solomon maa Geser man Bete-horon u Shin la,

¹⁸ man Baalati man Tamar ken ikôngough ki hen tar la,

¹⁹ man agar a ombon iyiav ker, a Solomon lu a mi la cii, man agar a akekeautya a na man agar a mbaanyinyav nav man akaa a a sar Solomon u maan a cii ken Yerusalem man ken Lebanon kua ken tar u a lu tor sha mi cii.

²⁰ Asande a ior a Mbaamor man Mbahiti man Mbaperishi man Mbahivi man Mbayebushi a a shi her cii, mba ve lu Mbaiserael ga la,

²¹ ônov vev mba ve shi ken ijime ve ken tar la, mba Mbaiserael fatyô u timin ve kera ga la, Solomon kighir ve a tom zan zan nyian.

²² Kpa Mbaiserael yô, Solomon gema ve hingir ikpan ga; kpa ka ve ve lu mbautyav man mbatomov nav man atiator a na man ukurmbautyav nav man mbahemenev mba nengen sha akeke na kua mbaanyinyav nav kpaa ye.

²³ Mbavesen mba sha tom u Solomon yô, lu ior deri utaan man akunduahargber, mba ve nengen sha ior mba eren tom.

²⁴ Er Wanfarao kough hen ya u Davidi za nyôr hen iyou na i Solomon maa un la yô, maa a maa Milo je.

²⁵ Sha hanma inyom Solomon a na iniav mbi nanden man mbi bem kwa tar sha atse a TER A nanden nagh sha mi a a ta la; a nanden kwaghhumandoon sha atse a sha ishigh ki TER la. Kape a eren ken iyou la je ne.

²⁶ Shi tor Solomon er utso ken Eshion-geber u a lu ikua ikua a Eloti, hen kpe u Zegemnger u Nyian, ken tar u Edom.

²⁷ Hiram kpaa tindi mbayev nav sha utso mbala, ka mba eren tom u utso, mba ve fe zegemnger, sha u ve̱ za a mbatomov mba Solomon imôngo yô.

²⁸ Nahan ve za hen Ofir ve za kura zenaria keregh, kuma utalenti deri unyiin man ikundu, ve va na tor Solomon.