1 Utor 7 - ICIGHAN BIBILO

¹ Solomon maa iyou na anyom pue kar atar, tsô a maa a bee iyou na cii.

² Nahan a maa Iyou i Ikô i Lebanon; iniembe i i lu aseva deri, igbanger i i lu aseva akunduahargber, ityaven i i lu aseva ikundugber, i tim i sha mtôm ma ikon i sedar iniongo inyiin, i penda itiran i sedar sha mtôm mara.

³ Man i san i sha ikon i sedar sha, sha ukpo mba ayoughouv akunduahar kar utaan mba ve lu sha mtô la; sha nongo môm a lu pue kar ataan.

⁴ Uwindou lu iniongo itiar, i môôr uwindou utar utar, zua ishigh.

⁵ Ihinda cii man uwindou kpaa lu azongo anyiin anyiin akuku; i môôr uwindou utar utar.

⁶ Shi a tim Iyou i Mtô kpaa, iniembe i i lu aseva akunduahargber, igbanger i i lu aseva ikundugber, a zor puadwer sha ishigh ki i, a tim mtôm, man a cir haav sha mi.

⁷ Shi a maa dwer u ikônough ki tor kpaa, henpe una ôron ijir yô, ka dwer u ijirigh je la; i cir u ikon i sedar hii shin inya je zan zan za ar sha ihange.

⁸ Iyou na i tsan ker yô, i lu hen tembe ugen u ken ijime i dwer la, m-er u i er i, lu kwagh môm a dwer la. Shi Solomon er iyou igen er dwer la nahan sha ci u wan u Farao u a er la.

⁹ Ayou ne cii lu sha awen a mimi i maa a ye, awen a kuan, a i kar a a kar, i tôndo a sha zerto kimi kua ken won, hii shin imagh zan zan sha kur na, man hii ken won zan zan za ar sha zegetembe la.

¹⁰ Imagh nagh lu sha awen a mimi, awen a tamen, awen a lun aseva pue man awen a lun aseva anigheni.

¹¹ Sha mkur sha yô, awen agen a mimi lu, awen a kuan a i kar a a kar, man ikon i sedar.

¹² Zegetembe la, i kase un sha awen a kuan iniongo itiar man itiran i sedar nongo môm, vough er tembe u kimi u iyou i TER la nahan, man er puadwer u iyou la nahan.

¹³ Tsô tor Solomon tindi er i̱ za va a Hiram u ken Tiru.

¹⁴ A lu wan u kwasecôghol u ken kwe u Nafetali, ter na yô, lu or u Tiru u eren tom sha togula; a iv a kwaghfan man mkav, a fa u eren hanma injatom sha togula. Nahan a va hen tor Solomon a va er tom na cii.

¹⁵ A ker mtôm ma togula mhar, ityaven i hanmôgh lu aseva pue kar anigheni; i kar indi i hanmôgh sha kor u u kom aseva pue kar ahar yô.

¹⁶ A er uindyuruku uhar mba i ker a ker ve sha togula yô, sha u pendan sha ityouv mbi mtôm mara; ityaven i indyuruku u môm lu aseva ataan je, ityaven i indyuruku ugen di kpaa lu aseva ataan.

¹⁷ I er kwagh er ukper mba i tum sha ikar, inja er mshirim nahan, sha ci u uindyuruku mba sha ityouv mbi mtôm mara; utaankaruhar sha ci u indyuruku u môm, utaankaruhar sha ci u indyuruku ugen la kpaa.

¹⁸ Shi a er atam a pomegraneti; iniongo lu ihiar kase kper môm ningir tser, sha ci u cirin uindyuruku mba sha ityouv mbi mtôm mara; sha indyuruku ugen kpaa kape a er la.

¹⁹ Uindyuruku mba ve lu sha ityouv mbi mtôm ma hen puadwer la, ve lu er ka imondon u lôhô nahan, ve tav aseva anyiin.

²⁰ Ka uindyuruku mba ve lu sha mtôm ma mhar mara, vegher u sha, ikua ikua her ape ve we gbor henpe ukper ve va kighir la; atam a pomegraneti lu deri uhar kase hanma indyuruku sha nongo nongo tser.

²¹ A tim mtôm mara hen puadwer u tempel; a tim ityôgh ki ken iyan, a ii ki iti er Yakin; shi a tim ityôgh ki ken imese, a ii ki iti er Boashi.

²² Sha ityouv mbi mtôm mara i er hwe sha mi sha inja i imondon u lôhô nahan; ka ape i kure tom u mtô la.

²³ Shi a er zegetasa u haan mngerem shin mi, a ker un a ker, hii hen kur ne za ar ken ngula, lu aseva pue, a lu gbilititi, ityaven na lu aseva ataan, kor u lun aseva ikundugber fatyô u kasen un yisan.

²⁴ Akpoghol kase akur a na tser, sha hanma ishiva a lu pue, a kase zegetasa la ningir tser; akpoghol la lu iniongo ihiar, i ker a sha mi imôngo cii.

²⁵ A tema sha abua pue kar ahar, a atar ver ishigh ken imbusutarimese, a atar ver ishigh shin ityôtar, a atar ver ishigh ken imbusutariyan, shi a atar ver ishigh sha ityoughkitaregh; i penda zegetasa la sha a, a cii a na atô zua kimi.

²⁶ A civir er ikevwe nahan, kur na la, lu er kur u iyongo er imondon u lôhô nahan, a ivin sha ubav dubu uhar.

²⁷ Man shi a er asange a pendan utasa sha mi pue, sha togula, iniembe i ishange i môm lu aseva anyiin, igbanger i i kpaa aseva anyiin, ityaven i i aseva atar.

²⁸ I er asange la nahan: a lu a ikpande i ken ambusu; ikpande i ken ambusu lu hen atô u mtôm ma sha azongo.

²⁹ Ikpande i ken ambusu, i i lu hen atô u mtôm ma sha azongo la, ubegha man ibua man ucerubi lu sha i, kua sha mtô kpaa; ubegha man ibua la vegher ve u sha kua u shin kpaa, i har akar a i hure a sha hwe.

³⁰ Hanma ishange lu a akaver a togula anyiin man itiran i hen atô lu i togula; mtôm ma sha azongo a anyiin lu a aheran; i ker a ker aheran la shin ityô i tasa, man akar a i hure a sha hwe lu hen kpe u a ser ser.

³¹ Zwa u i la, lu hen atô u akur a aheran a azongo na la, tav sha, ishiva i môm; zwa u i lu gbilititi lu er ima nahan, lu ishiva i môm man tiôn; zwa u i kpaa i nger akaa sha mi sha hwe; ikpande i i ken ambusu la lu a azongo anyiin akuku, lu gbilititi ga.

³² Akaver a anyiin la lu ikpande i hen ambusu vegher u shin; ave a akaver la zua sha ishange; ityaven i ikaver i môm lu ishiva i môm man tiôn.

³³ I er akaver la, lu er ikaver u ikyekye i anyinya nahan; ave a a man ajime a a man usepoke mba a man ityev mbi a la, i ker a ker cii.

³⁴ Aheran lu anyiin sha azongo a anyiin a hanma ishange, aheran la zua sha ishange.

³⁵ Sha ityough ki ishange la, i er zwa u gbilititi, ityaven i u lu tiônshiva je; sha ityough ki ishange la yô, ave a i man ikpande i ken ambusu a i zua.

³⁶ Sha ape ave a i a lu la man sha ikpande i ken ambusu a i la, a nger ucerubi man ubegha man atineavilegh sha a-an a a due sha mi cii, man akar a i hure a sha hwe, ningir tser.

³⁷ Asange a pue la, kape a er a je ne; a cii i ker a inja i môm, ikaren i môm, mluashe môm.

³⁸ A er atasa pue sha togula; hanma tasa ivin ubav akunduahar; hanma tasa lu aseva anyiin; asange a pue la, hanma ishange tasa lu sha mi môm.

³⁹ A ver asange la, ataan lu iyou vegher u ken uwegh ku yanegh, shi ataan lu iyou vegher u ken uwegh ku imesegh; shi a ver zegetasa, lu iyou vegher u ken uwegh ku yanegh vegher u sha ityoughkitaregh, ver ishigh ken imbusutariyan.

⁴⁰ Hiram er ityev man ushebul kua atasa kpaa. Kape Hiram kure ityom na cii i a er tor Solomon ken iyou i TER la;

⁴¹ mtôm mhar man adôôr ahar a uindyuruku mba ve lu sha ityouv mbi mtô la, man ukper uhar sha u cirin adôôr ahar a uindyuruku mba ve lu sha ityouv mbi mtô la,

⁴² man upomegraneti deri unyiin sha ukper mba uhar mbala, iniongo i upomegraneti ihiar sha hanma kper sha u cirin adôôr ahar a uindyuruku mba ve lu sha ityouv mbi mtô la,

⁴³ man asange pue, man atasa pue sha asange la,

⁴⁴ man zegetasa môm, man ibua pue kar ihiar i shin ityô i zegetasa la,

⁴⁵ man ityev man ushebul kua atasa; akaa ne cii Hiram er tor Solomon ken iyou i TER sha togula u engem je.

⁴⁶ Ka hen gbulumaa u Yordan hen inya i tiher, tor ker a ye, hen harga u Sukoti vea Saretan.

⁴⁷ Ikav mbila cii Solomon kar myohom ma mbi ga, gadia mbi ngee yum; myohom ma togula kpaa gande u fan.

⁴⁸ Shi Solomon er ikav mbi ken iyou i TER cii sha zenaria, ka atse a nanden nagh sha mi a zenaria, man tebul u i penda ubredi mba sha ishi sha mi la kpaa,

⁴⁹ man udaarmbaamengerev mba sha zenaria u wang, utaan ken uwegh ku yanegh, shi utaan di ken uwegh ku imesegh, sha ishigh ki kpar u kimi la; man uimondon mba ikonov mba agbaa a amenger, man akambe kpaa, sha zenaria;

⁵⁰ man ayongo man akambe a sôron amenger a min, man atasa man mbaahwa kua ugbande mba usuv, sha zenaria u wang; man ukokombo mba zenaria mba zeren ihinda i iyou i kimi, ka icighanjiir u hemban cii je la, kua sha ci u ihinda i kparyough u vesen u tempel la kpaa.

⁵¹ Er i kure tom u Solomon er ken iyou i TER cii yô, Solomon nyôr a akaa a ter na Davidi lu tsegha la, azurfa man zenaria kua ikav, a ver a ken ayou a koson akaa ker a iyou i TER la.