1 Utor 6 - ICIGHAN BIBILO

¹ Shighe u Iserael due ken tar u Igipiti la, anyom kar deri unyiin man akunduanyiin, tsô sha inyom i sha unyiin i Solomon lu tor sha Iserael la, sha uwer u Shiv, ka uwer u sha uhar je la, a hii u maan iyou i TER.

² Iyou i tor Solomon maa TER la yô, iniembe na lu aseva akunduatar, igbanger na lu aseva ikundu, man ityaven na lu aseva ikundugber.

³ Puadwer u i zor sha ishigh ki kparyoughough u vesen u iyou la lu iniembe aseva ikundu sha igbanger i iyou la; igbanger na lu aseva pue sha ishigh ki iyou.

⁴ A gber iyou la a-an, a cir a ikpande atera atera.

⁵ Ken kungur u iyou la, a maa ayou ker, ningir tser, suur ken kpekpe u iyoughough kase kparyoughough kua icighankpar u hemban cii la, a maa aniyoughouv ukpo ukpo kase tser.

⁶ Kpo u shin inya la, igbangese na lu aseva ataan, u dondon la, igbanger na lu aseva ataratar, u sha utar la, igbanger na lu aseva ataankarahar; gadia a er ugbor ken won sha kpekpe kase iyou la, sha u i̱ de kera tsehen kpekpe u iyou la ga yô.

⁷ Zum u i lu maan iyou la yô, i maa i sha awen a i vande kuan a hen ijiir i dughun a la je; i lu ungwan iov i msabe shin ijembe shin hanma ikagh ki tomough ki iyôgh hen iyou la, zum u i lu maan ave la ga.

⁸ Hunda u nyôron kpoyou u shin la, lu iyou vegher u ken uwegh ku yanegh; i unden sha gogo agese agese u zan sha kpo u dondon la, shi i due sha u dondon la, i yem sha kpo u sha utar la.

⁹ Kape a maa iyou la, a kure i; a cir iyou la sha itiran kua ikpande i sedar.

¹⁰ A maa ayou a a suur ken iyou la cii, hanma kpo ityaven na lu aseva ataan, a zua sha iyou la sha ikon i sedar.

¹¹ Tsô kwaghôron u TER va hen Solomon, A kaa er:

¹² Sha kwagh u iyou i u maan ne, aluer wea zaan sha akaawan a Am, wea ôron ijir sha atindi Am, man wea waan iko sha atindi Am cii, ú eren sha mi yô, Mo kpaa, Me kure kwaghôron Wam a we, u lu M ôr a teru Davidi la,

¹³ man shi Me tema hen Mbaiserael, Me gbihi ior Av Iserael mayange ga.

¹⁴ Kape Solomon maa iyou ne, kure i la.

¹⁵ A cir ukpekpe mba iyou la kimi sha ikpande i sedar; hii sha tembe u iyou la zan zan za ar sha ikpande i sha ihange cii, a cir ikon sha mi cii; tembe u iyou la kpaa, a cir ikpande i kon u fer sha mi cii.

¹⁶ Vegher u ken ijime i iyou la, a tôndo kpar ugen sha ikpande i sedar, hii shin inya za ar sha ihange, igbanger na lu aseva ikundu; a ver kpar u kimi la sha er a̱ lu icighankpar u hemban cii.

¹⁷ Iyou la, ka kparyoughough u vesen u a lu sha ishigh ki kpar u ker atô je la, iniembe na lu aseva akunduahar.

¹⁸ Ikon i sedar cir iyou kimi; i er eev sha mi, i nger uikparen man uimondon mba ikonov sha mi; akaa ne cii lu sha ikon i sedar; i kera nengen a ma iwen ga.

¹⁹ Shi a sôr kpar u kimi ken atô u iyou la, sha u veren areki u ikuryan u TER ker.

²⁰ Kpar u kimi la yô, ilihen na lu aseva ikundu man igbanger na kpaa lu aseva ikundu kua ityaven na kpaa lu aseva ikundu, a cir un sha zenaria u wang; atse a nanden nagh sha mi yô, a cir a sha kon u sedar.

²¹ Kape Solomon cir iyou la kimi sha zenaria u wang ne; a ta mshirim ma zenaria sha ishigh ki kpar u kimi u a cir un zenaria la.

²² Iyou la cii, a cir zenaria sha mi zan zan i bee iyou la cii; atse a nanden nagh sha mi a a lu sha ci u kpar u kimi la kpaa, a cir a zenaria iyol.

²³ Ken kpar u kimi la, a er ucerubi uhar sha kon u olev, hanmô ve ityaven na lu aseva pue.

²⁴ Kpelegh ku cerubi kun lu aseva ataan, shi kpelegh ku cerubi kugenegh kpaa lu aseva ataan; hii hen ikighir i kpelegh môm zan zan za ar hen ikighir i kpelegh kugenegh lu aseva pue.

²⁵ Cerubi ugen kpaa lu aseva pue; ucerubi uhar cii, ikaren ve lu môm tsô, mluyol ve kpaa lu môm.

²⁶ Ityaven i cerubi môm lu aseva pue, kape i cerubi ugen kpaa i lu la.

²⁷ A ver ucerubi ken atô u kpar u kimi; akper a ucerubi naregh, kpelegh ku u môm bende sha kpekpe ngun, kpelegh ku ugen la kpaa bende di sha kpekpe ugen; akper a ve zua ayol a a her atô u iyou.

²⁸ A cir ucerubi zenaria iyol.

²⁹ Ukpekpe mba iyou la cii, a er eev sha mi, a nger ucerubi man avile man uimondon mba ikonov sha mi, kpar u kimi kua u ken won la kpaa.

³⁰ Tembe u iyou la, a cir zenaria sha mi, kpar u kimi kua u ken won la kpaa.

³¹ A er ucivir sha kon u olev, sha ci u hunda u kpar u kimi la; kon u hunda la lu a azongo ataan.

³² Nahan a er ucivir uhar sha kon u olev; a gba eev sha mi, a nger ucerubi man avile kua uimondon mba ikonov sha mi, a cir ve zenaria iyol, a cir ucerubi kua avile la cii zenaria iyol.

³³ Kape a er ikpande i hunda sha kon u olev sha ci u hunda u nyôron ken tempel la, i lu a azongo anyiin,

³⁴ man ucivir uhar sha ikon i fer; u môm i hure un akpaar ahar, ugen la kpaa i hure un akpaar ahar.

³⁵ A gba eev sha mi, a nger ucerubi man avile kua uimondon mba ikonov sha mi, a cir ve zenaria u i pesem un i var sha akaa a i nger la.

³⁶ A kase tembe u kimi sha kpekpe u i maa sha awen a kuan iniongo itiar, man nongo ugen sha ikpande i sedar.

³⁷ Sha inyom i sha unyiin la i tim imagh ki iyou i TER sha uwer u Shiv.

³⁸ Sha inyom i sha pue kar môm la sha uwer u Bul, ka uwer u sha anigheni je la, i bee iyou la kua akaa a i cii, sha inja i i cii kpaa. Nahan a maa i anyom ataankarahar.