1 Utor 5 - ICIGHAN BIBILO

¹ Tsô Hiram tor u Tiru tindi mbayev nav hen Solomon; gayô a ungwa gwa er i kôr un tor sha ityough ki ter na; gadia Hiram vande lun huror u Davidi gbem.

² Nahan Solomon tindi loho hen Hiram, kaa er:

³ U fa er terem Davidi lu fatyô u maan iyou sha ci u iti i TER, Aôndo na, ga yô, sha ci u ityav mbi lu kase un mbi tser la, zan zan TER gema ve, ve hingir un shin akevangahar je.

⁴ Kpa hegen yô, TER, Aôndo wam nam mmem hanma ian kpaa, orhendan kwagh a mo ngu ga, ma kwagh u bo kpaa ngu ga.

⁵ Man nenge, m ver ishima u maan iyou sha ci u iti i TER, Aôndo wam, er TER lu ôr kwagh la a terem Davidi yô, A kaa er: Ka wan wou u Me ver un sha ikônough you ki torough sha ityough you la, ka un je una maa iyou sha ci u iti Yam ye.

⁶ Yô, kaa, i̱ gberem ikon i sedar sha Lebanon; mbatomov av vea lu a mbatomov ou imôngo, me na u tôndo sha ci u mbatomov cii, sha kwagh u ú kaa cii; gadia u fa, ken a vese, mbafan ikon i gberen yum er Mbashidon nahan, mba ga.

⁷ Er Hiram ungwa akaaôron a Solomon la yô, a ember kpishi, a kaa er: I̱ wuese TER nyian, u A ne Davidi wan u fan kwagh sha ikurior i vesen ne yô.

⁸ Tsô Hiram tindi loho hen Solomon, kaa er: M ungwa kwaghôron u u tindim a mi la; nahan mo kpaa me er sha ishima you cii, sha kwagh u ikon i sedar, kua sha ikon i fer kpaa.

⁹ Mbatomov av vea hungwa a i sha Lebanon vea va a mi shin zegemnger; me tar i me kor i, me sen a i shin zegemnger zan zan hen ijiir i u kaam la, tsô me sagh i her, man ú ngohol ye; yô, we kpaa, er sha ishima yam, na ior mba hen ya wam kwaghyan.

¹⁰ Nahan Hiram na Solomon ikon i sedar man ikon i fer sha ishima na cii.

¹¹ Tsô Solomon gema na Hiram alakema uikaren dubu ikundu man mkurem ma wang uikaren ikundu sha ci u kwaghyan u ior mba hen ya na; kape Solomon naan Hiram sha anyom anyom je la.

¹² TER na Solomon kwaghfan, er A tôndo zwa a na nahan; Hiram man Solomon ve lu bem ayol a ve; ve uhar ve ya ikur ayol a ve.

¹³ Tsô tor Solomon kôr ior mba ve va eren un tom u i kighir ve a kighir yô, ken Iserael cii; mbaerentom u i kighir ve a kighir mbala lu ior dubu ikundugber.

¹⁴ A tindi ve hen Lebanon, ior dubu pue sha hanma uwer, ve za musan mbagenev; uwer môm ve lu sha Lebanon, iwer ihiar ve lu hen ya; Adoniram lu or u nengen sha mbatomov mbala.

¹⁵ Shi Solomon lu a ior dubu akunduatargber mba tôôn ikav, man shi ior dubu akunduanyiin mba dughun awen sha iwo;

¹⁶ man shi mbahemenev mba Solomon mba ve lu sha tom la, lu ior dubu utar man deri utar, mba ve lu nengen sha mbatomov mbala yô.

¹⁷ Tor kaa, i dugh uzegembaawenev mba injaav, sha u timin imagh ki iyou la sha awen a kuan.

¹⁸ Mbamaankwagh mba Solomon man mbamaankwagh mba Hiram kua Mbagebal ve lu kuan a; ve sôr ikon kua awen sha ci u maan iyou la.