1 Utor 4 - ICIGHAN BIBILO

¹ Nahan tor Solomon tema tor sha Iserael cii.

² Ka atiator a na ne: Asaria wan u Sadoki, lu pristi;

³ Elihorev kua Ahiya, ônov mba Shisa, lu umaga; Yehoshafati wan u Ahiludi, lu or u ngeren abaver ken takerada;

⁴ Benaia wan u Yehoyada, nengen sha ikumutya; Sadoki kua Abiatar lu upristi.

⁵ Asaria wan u Natan, nengen sha mbatarev; Sabudi, wan u Natan, lu ortaregh u vesen, man lu ikar u tor;

⁶ Ahishar lu or u nengen sha ya u tor; Adoniram wan u Abeda, lu or u nengen sha mbaerentom u i kighir ve a kighir yô.

⁷ Solomon lu a mbavesen pue kar uhar mba ve nengen sha Iserael cii, mba ve lu koson tor kua ior mba hen ya na yô; hanmô ve vaan a kwaghyan ken inyom i môm uwer môm.

⁸ Ati a ve er: Ben-hur, sha tar u iwoogh u Eferaim;

⁹ Ben-deker, ken Makasa man Shaalbim man Bete-shemeshi kua Elon-bete-hana;

¹⁰ Ben-hesedi ken Aruboti, a lu a Soko kua tar u Hefer cii;

¹¹ Ben-abinadabi, sha agungu a Dor cii; Tafati wan u Solomon lu kwase na.

¹² Baana wan u Ahiludi, ken Taanaki man Megido kua Bete-shean cii u a lu ikua ikua a Saretan, vegher u shin Yesereel la, hii hen Bete-shean zan zan za ar hen Abel-mehola, zan zan kar Yokemeam ken hemen;

¹³ Ben-geber ken Ramoti-gileadi, lu a agar a Yair wan u Manase, a a lu ken Gileadi la, shi lu a tar u Argobi u u lu ken Bashan la kpaa, ka uzegembaagarev akunduatar, mba lun a ugil man ihinda i iyôv mbi togula;

¹⁴ Ahinadabi wan u ldo, ken Mahanaim;

¹⁵ Ahimaashi, ken Nafetali, un er Basemati wan u Solomon;

¹⁶ Baana wan u Hushai, lu ken Asher man ken Bealoti;

¹⁷ Yehoshafati wan u Parua lu ken Isakar;

¹⁸ Shimei wan u Ela, lu ken Benyamin;

¹⁹ Geber wan u Uri, lu ken tar u Gileadi, ka tar u Shihon tor u Mbaamor man u Ogo tor u Bashan je la, ka un tseegh lu ortaregh ken tar la ye.

²⁰ Yuda man Iserael ve ngee kpishi er waarawa hen kpe u zegemnger nahan, ve lu yan akaa, man akaa, ve lu yagh yagh.

²¹ Solomon tema tor sha ityartor cii, hii hen ifi u Uferati zan zan ar hen tar u Mbafiliti, shi ar henpe tar u Igipiti va kighir la; ve lu tan kpandegh, shi ve lu eren Solomon tom sha ayange a a lu uma la cii.

²² Kwaghyan u Solomon u sha iyange i môm lu mwem ma tsaan uikaren ikundugber, man mwem ma kengese uikaren akunduatar;

²³ uicighanmbaabuav pue man abua agen ikundu man iyôngo deri; nahan i ôr ishôso i ken toho er mbaashim man umorya man ikpam ga, man shi uicighanmbaikeghdam kpaa ga.

²⁴ Gadia a tema tor yande Ifi keen cii, hii hen Tifesa zan zan za ar hen Gasa, sha utor mba yande Ifi keen cii; man a lu a bem hanma ijiir i i kase un cii.

²⁵ Nahan Yuda man Iserael ve tema doo doo, hanma or hen itine i wain i nan, man hen itine i tur i nan, hii hen Dan zan zan za ar hen Bersheba, sha ayange a Solomon la cii.

²⁶ Solomon lu a atôr dubu akunduahar sha ci u anyinya a kpelan un akeke, man mbaanyinyav dubu pue kar uhar.

²⁷ Mbatarev mbala ve kohol kwaghyan sha ci u tor Solomon man sha ci u mba ve yaan kwagh a tor Solomon imôngo, hanma or sha uwer u nan; ve rumun er ma kwagh a̱ ban ga.

²⁸ Shair man adenga a alakema, sha ci u anyinya man anyinya a yevese fefa la yô, i va a mi hen ijiir i i ver la; hanma or nan va a kwagh u i kaa nan yô.

²⁹ Aôndo na Solomon kwaghfan man mkav kpishi je, kua ishima i bughun, ngee er waarawa u hen kpezegemnger yô.

³⁰ Kwaghfan u Solomon hemba kwaghfan u ior mba sha ityoughkitaregh cii, kua kwaghfan u Igipiti cii kpaa.

³¹ Gadia a hemba ior mbagenev kwaghfan cii, a hemba Etan Oresera man Heman kua Kalkol man Darda, ônov mba Mahol; lu a icivir ken akuraior a a kase un la cii.

³² A dugh anzaakaa dubu utar; atsam a na lu dubu môm kar ataan.

³³ A ôr kwagh sha kwagh u ikon, hii sha kon u sedar u sha Lebanon zan zan sha kwagh u hisop u a menden sha kpekpe; shi a ôr kwagh sha kwagh u zendenya man u inyon man a akaa a kpelan iyav kua u ishu.

³⁴ Ior mbagenev mba ken akuraior cii ve va sha u va ungwan kwaghfan u Solomon, ve mough hen utor mba sha won cii, mba ve ungwa gwa u kwaghfan na la.