1 Utor 20 - ICIGHAN BIBILO

¹ Tsô Benhada, tor u Shiria, kohol akumautya na cii, utor ikundugber kar uhar lu a na imôngo a anyinya man akeke; tsô a kôndo a za kase Samaria, a nôngo ityav a na.

² A tindi mbatyomov hen Ahaba tor u Iserael, ken gar, a kaa a na er: Benhada ngu kaan nahan er:

³ Azurfa man zenaria wou ka mba av; kasev ou kua ônov ou mba hemban doon ka mba av.

⁴ Tor u Iserael gema kaa er: Er u kaa nahan, kape i lu je la, terem tor; mo m ngu u wou kua akaa a m lu a mi cii.

⁵ Tsô mbatyomov mbala shi hide, va kaa er: Benhada ngu kaan nahan er: M tindi u loho je, m kaa mer, nam azurfa wou man zenaria wou man kasev ou kua ônov ou;

⁶ kpa kper er hegen nahan shi me tindi mbayev av her a we, ve̱ za ker ken ya wou vighe vighe kua ken uya mba mbayev ou kpaa; yô, hanma kwagh u a doo u ashe, vea tôô sha uwegh vegh, vea yem a mi.

⁷ Tsô tor u Iserael yila mbatamen cii mba hen tar la, a kaa er: Shi nenge nen er or ne a kerem iyongo yô; gadia a tindi loho er m̱ na un kasev av kua ônov av man azurfa wam man zenaria wam, kpa m nyume un ga.

⁸ Tsô mbatamen cii kua ior cii kpaa ve kaa a na er: De ongo ga, de rumun je ga.

⁹ Nahan a kaa a mbatyomov mba Benhada la er: Yô, za kaa nen terem tor, ner: Hanma kwagh u u vande tindin hen wanakiriki wou wer a̱ er yô, me er, kpa kwagh ngun yô, me fatyô u eren ga. Tsô mbatyomov mbala mough hide va ôr un.

¹⁰ Benhada shi tindi un loho er: Mbaaôndo ve̱ er a mo nahan shi i̱ hemba nahan kpaa, aluer alôgh a Samaria aa kuma ior mba ve dondom cii, er vea iv akevaveegh a mi yô.

¹¹ Nahan tor u Iserael gema kaa er: Za kaa un: Or u nan kange a kange iyol i utya yô, nana̱ de te ihagh er or u nan vande eren ikav kera la ga.

¹² Tsô zum u Benhada ungwa loho ne nahan yô, lu man msôrom ave, un kua utor, ken afo nahan a kaa a mbayev nav er: Tange nen ityav; tsô ve tange ityav sha u nôngon a gar la.

¹³ Tsô profeti ugen kporom hen Ahaba tor u Iserael, a kaa er: TER ngu kaan nahan er: U nenge ikpilaior ne kpa? Nenge, nyian Me na i sha ikev you, man ú fa er Mo M lu TER ye.

¹⁴ Ahaba kaa er: Sha ikev i ana? A kaa er: TER ngu kaan nahan er: Ka sha ikev i mbayev mba atiator a uipaven mba tar ne. Tsô a kaa er: Ka an nana hii ityava? A kaa er: Ka we.

¹⁵ Tsô a ôr iyenge i mbayev mba atiator a uipaven la, ve lu ior deri uhar man ikundugber kar uhar; ken ijime ve yô, a ôr iyenge i ior cii, ka mba Iserael cii je la, ve lu ior dubu utaankaruhar je.

¹⁶ Ve due iyange sha tembe. Benhada lu man kwagh hunden ken afo, un kua utor, ka utor mba ikundugber kar uhar mba wasen un mbala.

¹⁷ Mbayev mba atiator a uipaven la, ve vande duen; tsô Benhada tindi, nahan i va kaa un er: Ior mba duen ken Samaria.

¹⁸ A kaa er: Shin vea va á lu bem kpaa, kôr nen ve uma; man shin á lu ityav ve ve kpaa, kôr nen ve uma.

¹⁹ Kape ve due ken gar la, mbayev mba atiator a uipaven la, kua akumautya a a dondo sha a ve la.

²⁰ Hanma or wua or u nan; tsô Mbashiria yevese man Iserael gba zendan ve ijime; Benhada tor u Shiria yevese sha nyinya war a mbaanyinyav mbagenev imôngo.

²¹ Tsô tor u Iserael due wua anyinya, shi vihi akekeautya kpaa, a wua Mbashiria je falegh gba.

²² Tsô profeti kporom hen tor u Iserael kaa a na er: Za za waan ago iyol, man ver ishima kpaa, nenge sha kwagh u ú er yô; gadia sha mhii u inyom yô, tor u Shiria una shi á va nôngo ityav a we.

²³ Tsô mbayev mba tor u Shiria la, ve kaa a na er: Aôndo ve ka Aôndo u sha agungu, ka nahan man ve hembe se agee ye; sé nôngo nen ityav a ve shin pev u kpuun kpuun, nahan sé hemba ve agee kpee.

²⁴ Yô, er ase nahan: dugh utor kera, hanma or sha ijiir i nan, gema ver ugomna sha ityouv vev;

²⁵ yô, shi kohol akumautya, vough er akumautya a a saa u la nahan, nyinya kpaa sha ityough ki nyinya, ikyekye kpaa sha ityough ki ikyekye; yô, sé nôngo ityav a ve shin pev u kpuun kpuun, nahan sé hemba ve agee kpee je. A rumun kwaghôron ve, a er nahan kpaa.

²⁶ Tsô sha mhii u inyom la yô, tor Benhada kohol Mbashiria, kôndo sha Afeki, sha u za nôngon ityav a Iserael.

²⁷ I kohol Mbaiserael, i er ve kwaghyan u gbenda, tsô ve za u za nôngon ityav a ve; Mbaiserael haa afo sha ishiv vev er akum a ivo a kiriki ahar nahan; Mbashiria yô, iv tar la.

²⁸ Tsô or u Aôndo kporom, ôr kwagh a tor u Iserael, kaa er: TER ngu kaan nahan er: Er Mbashiria ve kaan er: TER ka Aôndo u sha agungu, ka Aôndo u shin pev u kpuun kpuun ga yô, nahan Me na ikpilaior ne cii sha ikev you, man né fa er Mo M lu TER ye.

²⁹ Ayange ataankarahar ve lu ken afo ve lu kenger ishiv ayol a ve. Tsô sha iyange i sha utaankaruhar la, ve hii ityav; Mbaiserael wua Mbashiria mba zan sha angahar ior dubu deri sha iyange i môm.

³⁰ Mba ve shi yô, ve yevese ve yem ken Afeki, ve za nyôr ken gar; nahan kpekpe u gar yôhôl kighir ior dubu ikundu kar utaankaruhar mba ve shi la. Benhada yevese nyôr ken gar za yer ken iyou i ken atô.

³¹ Tsô mbayev nav kaa a na er: Nenge, se ungwa agwa ser, utor mba ken ya u Iserael ka utor mba zungwen mhôônom; yô, sé ta ikondo uya sé kange ikor sha ityou sé due sé za hen tor u Iserael, tsô alaghga una yima uma wou.

³² Nahan ve ta ikondo uya ve kange ikor sha ityou ve va hen tor u Iserael ve va kaa er: Wanakiriki wou Benhada kaa er: M ngu zamber we, shi dem m̱ lu uma. A pine er: Ngu uma here? Ka anngôm je.

³³ Ior mbala ver ikav doo doo nahan ve kav fefa er i lu ishima na mimi je yô; tsô ve kaa er: Benhada ka anngôu je. Nahan a kaa er: Za, za va nen a na. Tsô Benhada due va her a na; a rumun un er a̱ unde sha ikyekye na.

³⁴ Tsô Benhada kaa a na er: Agar a terem lu ngohol sha ikev i teru yô, mo me hide a mi; ú lu a ian ken Damaseku er terem lu a mi ken Samaria nahan. Mo kpaa, kape Ahaba kaa la, me de u u yem sha ci u ikuryan ne. Tsô a ya ikur a na, a na un gbenda.

³⁵ Tsô orgen ken uprofeti kaa a ijende na sha imo i TER, er: Shi gbidyem. Ngula venda u gbidyen un.

³⁶ Tsô a kaa a na er: Er u vende u ungwan imo i TER yô, nenge ú moughon ú undun mo heen, tsô begha una wua u je. Tsô moughon undun un yô, begha za zua a na, wua un.

³⁷ Tsô a shi a kohol orgen a kaa er: Shi gbidyem. Ngula gbidye un, vihi un iyol je.

³⁸ Nahan profeti la mough za kegh tor gbenda, a gema iyol, a kange ikondo sha ashe.

³⁹ Tor ngur karen yô, a genger imo a yila tor; a kaa er: Wanakiriki wou nyôr ken atô u utya, tsô orgen kaha va nam or, a kaa er: Kura or ne; aluer shin a lu nan nan je kpaa nana saa yô, uma wou una lu sha ityough ki uma u nan, gayô, ú kimbi talenti u azurfa môm.

⁴⁰ Tsô er wanakiriki wou lu eren kwagh kera wue wue yô, or la osough. Tor u Iserael gema kaa a na er: Kape ijir you ia lu je la; we iyol you je u kure i.

⁴¹ Tsô a sagh ikangenev mbi sha ashe na mbila fefa, nahan tor u Iserael kav un er a lu orprofeti yô.

⁴² A gema a kaa a na er: TER ngu kaan nahan er: Er u de or u M ver un Mer a̱ tim, a osough we sha ikev yô, uma wou una lu sha ityough ki uma na, ior ou kpaa sha ityough ki ior nav.

⁴³ Tsô tor u Iserael yem hen ya na hingir zunguluu, ishima vihi un, maa a va ken Samaria.